பாடமான மூளைகள் (நூலகம்) !

திரு சிவபாலன் நூலகம் பற்றிய பதிவு எழுதியிருக்கிறார். யாருக்கும் தோழன் இல்லையென்றால் நூலுக்கு தோழனாக இருக்கலாம். நானும் நூலுக்குத் தோழன்தான் ! நூலகம் பற்றி(ல்) எழுதியது இது

பாடமான மூளைகள் !

மூளை இறந்துவிட்டால்
இறப்பென்பது சரியா ?

இல்லை என்றது
நூலகத்தில்
பாடம் செய்யப்பட்டு
பதிவு செய்யப்பட்ட
மூளைகளின் பாடங்கள் !

இறப்பைத் தாண்டி வாழுகின்றவர்கள்
இங்குதான் வாழ்கின்றனர் !

வள்ளுவனும் கம்பனும்
ஓய்வெடுப்பதும்,
ரவிவர்மாவும், டாவின்சியும்
ஓவியம் சொல்லித்தருவதும்,
கலைகளின் விதைகள் இருப்பதும்
இங்குதான் ! இங்குதான் !

காசு, பணம் தேடும்
வழிகளின் வரைபடமும்,
கல்விக் கேள்விகள் விடைபெறுவதும்,
ஆத்திகம், நாத்திகம் அருகருகே இருப்பதும்,
மதங்கள் சண்டையின்றி தோழமையோடு இருப்பதும்,
அறிவியல் கண்டுபிடிப்புகளின் அறிவிப்பை செய்வதும்
இங்குதான் இங்குதான் !

நூல்கள் இருக்கும் வரை 'வாழ்ந்து'
இறந்தவர்கள் பேசிக் கொண்டேதான் இருக்கிறார்கள்
நூல்களின் வாயிலாக !

நூலகம் வெறும் நூலகம் அன்று !
அது வாழ்ந்துக் கொண்டு இருப்பவர்களுக்கான
நினைவு(கள்)அகம் !