மனதின் பயணம் !(கவிதை)

பிம்பங்களை தோற்றுவித்து
திணறி போகிறது மனம் !
எது உண்மை ?
எது பொய் ?
என்ற தேடலில் எப்போதுமே ஆராயாமல்,
ஆள்மனப் பகுப்பில்
வாய்மையை புதைத்து
உண்மையைவிட நன்மை
எது என்பதை மட்டும் பார்த்து
நினைப்பதிலேயே மனம்
திருப்தியுடன் நின்றுவிடுகிறது !

நன்மை என்று நினைத்ததெல்லாம்
எந்த நன்மையும் செய்துவிடவில்லை !
தீமை என்று நினைத்ததெல்லாம்
தீண்டி விடவும் வில்லை !
என்ற கடைசி நொடி சுயதரிசனத்தில்
வாய்மை எனும் கல்
ஆழ்மனக் கண்ணாடி மீது விழ
உடனே உடைந்து போகிறது பிம்பங்கள் !
மனம் தொலைந்து போகிறது !
எல்லாவற்றையும் அங்கேயே
போட்டுவிட்டு,
தொலைந்த மனதை தேடி
மற்றுமொரு பயணத்திற்கு
தயாராகிறது நித்ய ஜீவன் !