காலம் - எண்ணக் கவி'தைகள்' (கோவி.கண்ணன்)

காணமல் போன சொற்கள் !

2011-09-08T20:21:00.001-07:00

நம் உரையாடல்கள் அனைத்தையும்
அலைபேசிகள் தின்று தீர்ந்துப் போனபின்
நம் திருமணம் நடந்ததா ?

இன்றும் தான் பேசுகிறோம்
'சரி' என்ற ஒற்றைச் சொற்களால்
முடிந்துவிடுகிறதே நம் உரையாடல்கள் !

ஹைகூ......வுங்க !

2010-06-18T01:18:00.000-07:00

சிறகுகளின் பசை !

எண்ணைப் பசை இருந்தும் தண்ணீர் மூழ்கி
எழ முடியாமல் தவித்துக் கொண்டிருந்தது பறவைகள் !

மரம் வளர்ப்போம் !

அழிந்த மரங்களின் காகித் கூழ்களில்
அழகான வாசகம் 'மரம் வளர்ப்போம்.....மனிதம் காப்போம்'

குக்கர் விசில் !

குயில் கறி வெந்த குக்கரும்
இனிமையாக விசலடிதது வெந்ததை அறிவிக்க !

அக்டோபர் இரண்டு !

அந்த நாளிலும் டாஸ்மாக் கதவு இடுக்கு வழியாக
கள்ளத்தனமாக நுழைந்தது காந்திப்படம்

அணையும் விளக்கு !

இறப்பின் நொடிகளை துடிப்புகளாக அறிவித்துக்
கொண்டிருந்தது ஒரு சாலை விளக்கு !

சில்லரைத் தனம் !

பிச்சைகாரனிடம் சில்லரை இல்லை என்று கைவிரிக்கக் காரணமான
நூறு ரூபாய் அர்சனைத் தட்டில் விழுந்தது !

பெரியார் தாசன் ஆனதென்ன அப்துல்லா !

2010-03-31T20:28:00.000-07:00

நாத்திகன்

ஆத்திகன் ஆனான்

முதலில்

புத்தனாக, பின்

இஸ்லாமியனாக, இந்(து)த

ஆத்திகர்கள் மகிழ்ந்ததாகத்

தெரியவில்லை.

பிறகு ஏன் நாத்திகன் மீதான வெறுப்பு ?

இங்கே

கடவுள் நம்பிக்கை என்பதெல்லாம்

வெறும் மதமும், மதம் சார்ந்த

நம்பிக்கைகள் மட்டுமே...

என்பதற்கு மற்றொரு சான்று

பெரியார் தாசன் !

பிறப்பும் இறப்பும் !

2009-12-03T01:50:00.000-08:00

குறை,
அறுவை,
வலி,
சுகம்,
தாயின் மகப்பேறு போலவே
மரண வேளைகள்,
நோய்,
விபத்து,
வலி,
ஓய்வு என்பதாக
நிகழ்ந்து கொண்டிருக்கிறது !

தாய்மை !

2009-10-12T04:36:00.000-07:00

அப்பாவுக்கு மகிழ்வுடன்
"டாடா" காட்டும்
எந்த ஒரு குழந்தையும்,
அம்மாவுக்கு
"டாடா" காட்டும் போது
மட்டுமே அழுகின்றது.

நண்பர்கள் நன்னாள் கவிஜை !

2009-08-02T23:46:00.001-07:00

நன்றாகப் படிக்கிறேன் கவலைப்படாதிங்க,

சீக்கிரம் வேலை கிடைச்சிடும் கவலைப்படாதிங்க,

உடம்புக்கு ஒண்ணும் இல்லை அனத்தாதீர்கள்,

என்றெல்லாம் உறவுகளிடம் சொன்னாலும்

படிக்கவே பிடிக்கவில்லை,

வேலைத் தேடுவது கஷ்டமாக இருக்கிறது,

மனசும் சரி இல்லை,

உடம்பும் சரி இல்லை

என்ற உண்மைகளுடன்,

பருவச் சீற்றத்தின் தணிப்புக்காக

அங்கு சென்று வந்ததிலிருந்து

"அங்கு" எரிகிறது என்று நண்பனிடம் தான் சொல்லமுடிகிறது.

- அன்புடன்
கோவியார்.

பின்குறிப்பு : யூசுப் பால்ராஜ் ஐயங்கார், கீழ்கண்ட படத்துடன் கவிஜையை மொக்கை மின் அஞ்சலில் அனுப்ப, எனக்குள்ள தூங்கிக்கொண்டு இருந்த கவிஜன் விழித்துக் கொண்டான்.

கருமையின் நிறம் !

2009-07-29T23:35:00.000-07:00

ஆரவாரமற்ற இருட்டில்
தனிமை சூழ்ந்த ஒற்றையடிப் பாதையில் நடந்தபடி
முற்றும் துறந்த மனதுடன்
சுற்றும் முற்றும் பார்க்கிறேன்.

காய்ந்த மனதில்,
பொறுக்கி வைத்த சுள்ளிகளாக
கடந்து போன நினைவுகளின்
தீப் பிடித்து எரிந்து மீந்த சாம்பலாக
கடந்த காலம்

பாழடைந்த கிணற்றின்
சிதலமடைந்த சுவற்றின் விழாத நம்பிக்கையில்
பெருந்துளையில் வளர்ந்து கொண்டிருந்த
ஆல விருட்ச எண்ணங்கள்

மழை நேரத்தில் கரைந்தொழுகும்
புற்றின் ஈரமணலில் நெளிந்து துடிக்கும்
கரையான்களின் கடைசி நேர முயற்சியாக
துடித்துக் கொண்டிருந்த என் மனதில்

இதற்கும் மேல் பின் நவீனத்துவக் கவிதை
எப்படி எழுதவேண்டும் என்று தெரியாததால்
வெயில் காலத்து ஆற்று நடுமுதுகின் பதிந்த மணல்களை
பேய்காற்று பீய்த்தெரிந்து வரண்ட திட்டாக்கும் திட்டத்துடன்
ஒவ்வொரு முடிகளாக பிய்த்துக் கொண்டிடிருந்தது
விரல்கள் !

- இது கவிஜையான்னு கேட்கிறவங்க...முதலில் அவர்களை நிறுத்தச் சொல்லுங்க... தலைப்புக்கும் கவிஜைக்கும் என்ன தொடர்ப்புன்னு சொல்லுங்க...எனக்கு தெரியவில்லை :)

பட்டையைக் கிளப்பும் ஜெ, பதுங்கும் திமுக கூட்டணி

2009-05-07T02:48:00.000-07:00

கத்திரி வெயிலில் மேலும் சூட்டைக் கிளப்பும் வகையில் ஜெ வின் பேச்சும் தேர்தல் பரப்புரை பயணமும் அமைந்திருக்கிறது. கட்சி சாராது திமுக அனுதாபிகளாக இருந்த (என்போன்றோர்கள்) ஜெ வின் பேச்சை வெகுவாக ரசிக்கின்றனர். திமுகவின் குடும்ப ஆட்சிக்கு முற்றுப் புள்ளி வைக்க ஜெ-வால் தான் முடியும் என்கின்றனர்.

ஒவ்வொரு மாவட்டத்திலும் அந்த மாவட்டச் சிறப்புகளைச் சொல்லிவிட்டு, அந்த மாவட்டத்தில் அதிமுக காலத்தில் செயல்படுத்தப்பட்ட திட்டங்களைச் சொல்லி, திமுகவின் மீதும் தமிழக திமுக கூட்டணி தலைவர் மீது சரமாரி ஏவுகனைக் குற்றச் சாட்டு தாக்குதல் தொடுக்கிறார். 'மக்களை சந்திக்க பயந்து போய் மருத்துவ மனையில் படுத்துக் கொண்டார் கருணாநிதி, கருணாநிதியை வீட்டுக்கு அனுப்பி ஓய்வு கொடுங்கள் ' என்கிற ஜெவின் அட்டாக் திமுகவினரை பெரிதாகவே தாக்கி இருப்பது ஸ்டாலின் 'நாகரீகமற்றவராக பேசுகிறார் ஜெ' என்ற பதில் பேச்சில் தெரிகிறது.

தேர்தல் பரபரப்பில் பரப்புரை (பிரச்சார) பயணம் செய்வதில் பிறகட்சியினரைக் காட்டிலும் ஜெ மிகவும் சுறுசுறுப்பாக இருக்கிறார். கருணாநிதி காங்கிரசுகாரர்களான காமரசரை 'காமராசரின் வாடகை வீட்டை படம் பிடித்த கருணாநிதி ஏழையின் வீட்டைப் பாரிர் என்று முரசொலியில் படம் போட்டு அவமானப்படுத்தினார், பக்தவச்சலத்தை பத்துலட்சம் பக்தவச்சலம்' என்று சொன்னார்' என்று காங்கிரசையும் திமுகவையும் பற்ற வைத்தார் ஜெ, வழக்கமாக கருணாநிதி மட்டுமே பழசை கிண்டி கிண்டி பேசுவார். ஜெவின் ஈழம் பற்றி தெளிவான பேச்சு பலரைக் கவர்ந்திருக்கிறது

ஜெ-வின் தேர்தல் உத்தி சிறப்பாகவும் கவனம் ஈர்பாகவும் இருப்பதாக பார்வையாளர்கள் கருதுகின்றனர். திமுக திணருவதைப் பார்க்கும் போது கட்சி சார்பில்லாமல், தொண்டராக இல்லாமல் இருக்கும் திமுக அனுதாபிகள் திமுகவின் நிலை குறித்து பரிதாபப்படுகின்றனர். நானும் தான் :)
ஜெ என்றால் வெற்றி என்று மீண்டும் நிருபணம் செய்துவிடுவார் என்று நன்றாகவே தெரிகிறது.

கருணாநிதி கர்ணனாக இருந்தாலும் கூட்டு சேர்ந்தது துரியோதனர்களிடம் என்பதால் தற்போதைக்கு திமுக கூட்டணி பற்றி அனுதாபம் மட்டுமே படமுடிகிறது. சோனியா தமிழக (காங்கிரஸ் மற்றும் திமுக) ஆதரவை பெரிதாக கணக்கிட்டுக் கொள்ளவில்லை, எனவே தேர்தலுக்கு பிறகு திமுகவை கழட்டிவிடுவது கிட்ட தட்ட உறுதியாகிவிட்டதாக சோனியாவின் தமிழக பரப்புரை பயணம் நிறுத்தப்பட்டதை வைத்து பார்வையாளர்கள் கூற ஆரம்பித்துவிட்டார்கள்.

ஜெ... ஜெ... என தமிழுணர்வாளர்களை இந்த தேர்தல் முடிவு உற்சாகப்படுத்தும் என்று தெரிகிறது.

(தேர்தல் முடிவு மட்டும் தானா உற்சாகப்படுத்தும் அதன் பிறகுமா ? என்பதை பொறுத்து இருந்துதான் பார்க்க வேண்டும்)

தேர்தல் உடன்படிக்கை !

2009-03-26T09:14:00.000-07:00

தேர்தல் வந்துவிட்டது,
எந்த அலையும் வீசவில்லை
என்கிறார் முதல்வர்
விலைபோகும் அளவுக்கு
இடைத் தேர்தல் அல்லதான் !

இலவச வலைகளால்
உங்களுக்கே வாக்குகள் கிடைக்கலாம்,
இன்னும் கூட வாக்குக்கு வழியுண்டு,

ஈழவர்களின் நலனுக்கு தீக்குளித்த
கட்சிக்காரர்களின் கருகிய படம் இருந்தால்
ஆளுக்கு 4 தொகுதிகள்
ஆளும் கட்சிக்கு கூட்டணிக்கு கிடைக்கலாம் !

தேர்தல் உடன்படிக்கைபடி
முத்துக்குமாரின் படம் யாருடைய
பிரச்சாரத்துக்கு என்கிற கேள்விக்கு
யாருக்கும் இன்னும் விடைதெரியவில்லை !

தமிழ்பேச்சுக் கவிஞர்கள் !

2008-12-05T21:53:00.000-08:00

வறுமைகள் கூட இவர்கள் வரிகளின் பொற்காசுகள் !
சிறுமைகள் கூட இவர்களின் கவிதை அலங்காரங்கள் !

துன்பவேளையை கவிதை யாழாக இசைப்பவர்கள்,
இன்ப வேளையை கவிதையில் ஏளனம் செய்பவர்கள் !

நாட்டுப்பற்றும் இவர்களால் நக்கல் செய்யப்படும் !
வீட்டுப்பற்றும் இவர்களால் சிக்கல் ஆகிவிடும் !

சோற்றுக்கு வழிதேடாமல் தூற்றலால் பசியாறுவார்கள் !
மாற்றுக்கு துணியில்லாவிட்டாலும் காற்றுக்கு ஆடை தைப்பார்கள் !

நெருப்பு சுடுவதுதான் இயற்கையா ? எங்கள் சொற்களின்,
வெறுப்பு சுடாவிட்டால் நீர் இயற்கை எய்தியவர் என்பர் !

வெடிகுண்டு வெடித்துவிட்டால் வெகுண்டெழு(த) - வரி
அடிகொண்டே அனைத்தையும் அடக்கிவிட நினைப்பர் !

பொடிபோட காசு இல்லை என்றால், தேசம்
அடியோடு வறுமையால் வாடுவதென்பர் !

அரசியல்வாதிகள் நாட்டை கெடுத்துவிட்டர் என்பர், சோம்பியிருந்தே
அரிசிகூட இவர்கள் கவிதையால் வெந்துவிடுமென்பர் !

வரிகளை வரிசை மாற்றிப் போட்டுவிட்டு, போற்றிக் கொடுக்கும்
பரிசுக்கு என் கவிதை பெற வாய்ப்பில்லை என்பர் !

கற்கண்டு இனிப்பதெல்லாம் இனிப்பா ? என்
சொற்கண்டால் அவை வெறும் இளிப்பே என்பர் !

சமூக அவலம் இவர்களின் எழுத்துக்கு தீனி, அதைப் போக்கி
சுமூகமாக்க இவர்கள் இறங்கியிருக்கிறார்களா நானி ?

பின்குறிப்பு : கவிஞர் நெல்லக் கண்ணன் நடத்தும் விஜய் தொலைக்காட்சி தமிழ் பேச்சுக்கும் இந்த கவிதைக்கும் தொடர்ப்பு இல்லை :)

சிங்கை பதிவர் சந்திப்பு நினைவூட்டல் !

2008-09-16T19:05:00.000-07:00

வரும் சனிக்கிழமை மாலை 3 மணி முதல் வீட்டில் இருந்து 'இப்ப வர்றிங்களா இல்லையா ?' என செல்பேசி மிரட்டல் வரும் வரை சிங்கை புக்கிட் கொம்பா எம்ஆர்டி நிலையத்துக்கு அருகில் பதிவர் சந்திப்பு நடை பெற இருப்பதாக ஏற்கனவே ஜோசப் பால்ராஜ் பதிவில் அழைப்பு விடுக்கப்பட்டு இருக்கிறது.

சென்ற முறை சந்திப்புகள் ஞாயிற்றுக் கிழமைகளில் நடந்ததால், ஏன் சனிக்கழைமைக் கூட வைக்கலாமே என கேட்டு கலக குறல்கள் ?:))) எழுந்ததால், இந்த முறை சனிக்கிழமை வைக்கலாம் என்று பதிவர்களால் ஒருமனதாக தீர்மாணிக்கப்பட்டு இருக்கிறது.

இடம் : புக்கிட் கொம்பா எம்ஆர்டி நிலையம்

நேரம் : மாலை 3 மணி முதல் இரவு 8 மணி வரை

சந்திப்பு ஏற்பாட்டாளர்கள் : சிங்கை நாதன் செந்தில் மற்றும் ஜோசப் பால்ராஜ்

சந்திப்பின் கருப்பொருள் : எங்கே செல்லும் பதிவர் பாதை ?

விவாதம் : வலைப்பதிவில் இருந்து ஓய்வு பெறுவது எப்படி ? - வலைப்பதிவாளர் கோவி.கண்ணனின் சிறப்புரையுடன் தொடங்கி வைக்கப்படும்

சந்திப்பின் தீர்மானம் : புதிய பதிவர்களின் எழுத்துக்களை அடையாளம் கண்டு அவர்களை ஊக்கப்படுத்துவது

நிகழ்ச்சி ஆரம்பம் : மாலை 3 மணி
இளைப்பாறுதல் : அவ்வப்போது
தேனீர் இடைவேளை : மாலை 5 மணி

இந்த முறை முந்தைய சந்திப்புகளில் விடுபட்ட பதிவர்கள் பலரும் கலந்து கொள்ள வேண்டும் என்று ஆவலுடன் எதிர்பார்க்கிறோம்.

தொடர்பு கொள்ள அலைபேசி எண்கள்:

ஜோசப் பால்ராஜ் : +65 - 93372775
கோவி.கண்ணண் : +65 - 98767586
ஜெகதீசன் : +65 - 90026527

பூவின் மவுனம் !

2008-04-23T08:25:00.000-07:00

பூவின் வாசமோ, வண்ணமோ
எதோ ஒரு ஈர்ப்பில்
பார்த்துக் கொண்டு இருந்த
என்னை அழைத்தது அருகில்,

எல்லாப் பூக்களைப் போலத்தான்
இந்த பூவும் நன்றாக இருக்கிறதே
ஒட்டி உறவாடினேன்
அந்த ரோஜாவுடன் !

நெருங்கிப் பழகியதாலோ என்னவோ
உரிமை எடுத்துக் கொண்டு,
என்னிடம் பழகும் நீ
ஏன் காட்டுப்பூக்களிடம்
பழகுகுறாய் என்று கடிந்து
கொண்டது ரோஜா.

பூவெல்லாமே எனக்கு ஒன்றுதான் !
நான் எத்தனையோ முறை எடுத்துச் சொல்லியும்,
என்னைவிட அந்தபூக்கள்
என்ன உயர்வு உனக்கு ?
கடிந்து கொண்டது ரோஜா !

மீண்டும் சொன்னேன்,
பூக்களெல்லாமே பூக்களே
எந்த பூவும் என்னிடம் பேசினால்
நானும் பேசுவேன் !

நீ பூவென்று நினைப்பது பூவல்ல
பூநாகம், நீ தொடர்ந்து
பழகினால், உன் கூடா ஒழுக்கமாக
உன்னை வெறுப்பதைத் தவிர எனக்கு
வழி இல்லை என்று சொன்னதுமின்றி
முட்களால் என்னைத் தீண்டிவிட்டு மவுனமானது !

வருடிக் கொடுக்கும்
என் விரலில் தீண்டினாலும்
இதயத்தில் தீண்டியதாகவே உணர்ந்தேன்.
நீ மட்டும் என்ன ? நீயும் முட்களால் தீண்டி
காட்டு ரோஜாதான் என காட்டிவிட்டாயே !

அன்பு ரோஜாவே,
பூவில் பூநாகம் இருப்பதெல்லாம் எனக்கு
தெரியாது, என்னைப் பொருத்து
அது நாகலிங்கப் பூதான்,
அந்த பூமட்டுமல்ல,
எந்த பூவும் என்னுடன் பழகினால்
நான் பழகுவேன் !
உன்னுடன் மட்டும் பழகி,
நீ சொல்வதை மட்டும் கேட்கவேண்டும் ?
நீ நினைப்பதை என்னால் நிறைவேற்ற முடியாது !

உன்னை புரிந்து கொள்ள முடியவில்லை,
என்னைத் தீண்டியதில் உதிர்ந்துவிட்ட
உன்முட்களால் ஏற்பட்ட காயம்
உனக்கு வலிக்குமே...
அதற்க்காக நானும் கூட வருந்துகிறேன்.

என்றோ ஒருநாள்,
பூந்தோட்டத்தில் எல்லாப்பூக்களுடன்
நீயும் இருக்க வேண்டும்,
அன்று என்னுடன்
மீண்டும் பேசுவாய் என்றே எதிர்பார்த்து இருப்பேன்,
அன்றுவரை உன்மவுனம் எனக்கு
சம்மதமே !

இரவின் மடியில் ... (கவிதை) !

2008-03-31T05:12:00.001-07:00

இரவின் மடியில் ... (கவிதை) !

பகலிரவு இரண்டில் இரவையே
நேசிக்கின்றேன் நான் !

இருள் பற்றிய பயம் எனக்கில்லை,
முதன் முதலில் நான் பயந்தது அழுதது
இருட்டைப் பார்த்து அல்ல,
வெளிச்சத்தைப் பார்த்துதான் !

இருள் சூழ் கருவறையில் உறங்கிப்
பிறந்ததன் நினைவோ,
கார்முகிலின் இருளைப் பார்க்கும்
போது கருவறையில் குடியிருந்ததன்
குளுமையை உணர்கிறேன் !

கண்களைக் கவரும்
வெளிச்சத்தின் பகட்டை விட
கலப்பில்லா காரிருளின்
அமைதி மேன்மையானதென்பேன் !

என்னை மறந்து உறங்கும் நேரங்களையும்,
இன்பங்களையும்,
தருவதில் இரவுக்கு சமன் எது ?

எனக்கே எனக்காக பயன்படுத்திக் கொள்ளும்
நேரமென்றால் அது இனிய இரவுதான்.

நான் மட்டுமா ? உயிருள்ளவை
அனைத்தும் உறக்கமும், அமைதியும், ஓய்வும்
பெறுவது இரவின் மடியில் தானே ?

தாயின் மடிபோல் தான் இருளும், ஆடிய
ஆட்டத்தில் அலுப்புடன், உறங்கப் போகும்
என் விழிகள் என்றோ ஒரு நாள்,
இருள் சூழ்ந்து... கண்களை,
அப்படியே ஆசையாக தழுவி அணைத்து,
உறக்கத்தில் ஆழ்த்தி தன் மடியில் கிடத்த,
அமைதி கொள்ளவாய், என
நான் கரைந்து போவதும் அந்த இருளில் தான் !

கண்ணாடியின் கறை !

2008-03-21T09:09:00.000-07:00

கண்ணாடியின் கறை !

பரண் மேல்,
ஒரு கால் உடைந்த நாற்காலி,
தூசிபடிந்த பழைய புத்தகங்கள்,
காய்ந்த மாலையுடன்
பொட்டு வைக்கப்பட்ட அம்மாவின்
கருப்பு வெள்ளை புகைப்படம்
ரிடையர்ட் ஆன அப்பாவின்
வழியனுப்பு புகைப்படம்,
நான் பட்டம் வாங்கியதும்
பெற்றோர்களுடன் ஆசி வாங்கிய படம்
என என்னைச் சூழ்ந்துள்ள,
பழமைகள் என்றுமே இனிமை
கலந்த
பசுமை நினைவுகள் தான் !

- செந்தூரன்

இதோ இந்த
வார இதழில் பாருங்கள்,
என் பையன்
உயிரோட்டத்துடன் அழகாக
கவிதைகள் எழுத
ஆரம்பித்துவிட்டான்,
பெருமையாகக் கூறிக் கொண்டு
இருந்தார் முதியோர்
இல்லத்தில் இன்னொரு பெரியவரிடம்
ஒரு பெரியவர் !

தன்மதிப்பும் மற்றும் அடுத்தவரைப் பற்றிய மதிப்பும் !

2008-03-19T20:01:00.000-07:00

பெரியார் சொல்லும் சுயமரியாதைப் பற்றியது அல்ல. அது வேறு தன்மானம் தாக்கப்படுவதைப் அனுமதிக்கக் கூடாது என்பது பற்றியது அது. எனக்கு பெரியார் சொல்லும் சுயமரியாதையில் அந்த அளவுக்கு ஈர்ப்பு கிடையாது. பொதுவாக நமக்கு நெருக்கமானவர்களிடம் மரியாதையை சூழல் இருக்கவேண்டும் என்பதில் மாற்றுக் கருத்து இல்லை. அதற்கும் மாறாக தெரியாத ஒருவர் நம்மைப் பற்றி மிகவும் ஆபாசமாக பேசிவிட்டால் அவருடன் எதிர்காலத்தில் எந்த தொடர்பும் வைத்துக் கொள்ளப் போவதில்லை என்றால் சட்டை செய்யாமல் சென்று விடுவதே நல்லது. எதிர்வினை ஆற்றுவதால் பயனில்லை.

எனக்கிருக்கும் பழக்கம் நண்பர்களுடன் நெருக்கமானால் அழைப்பை ஒருமைக்கு மாற்றிக் கொள்வது, அவர்களிடம் விண்ணப்பம் வைத்துவிட்டுதான் அதைச் செய்வேன், முன்பு சென்னையில் ஒரு நிறுவனத்தில் என்னுடன் பணியாற்றியவர் நால்வர், அவர்கள் நால்வரும் என் வயதில் 1 அதிகம் அல்லது 1 குறைவாகவே இருந்தார்கள், அவர்களுடன் பழகிய 10 நாட்களுக்கும் அவர்களை ஒருமையில் 'வாடா..போடா' என்று அழைக்க ஆரம்பித்தேன். அவர்களும் என்னை அவ்வாறே அழைத்தார்கள். இதில் கவனிக்கதக்கது என்னவேன்றால் அந்த நால்வரும் என்னைத் தவிர அவர்களுக்குள் ஒருமை விளிப்பை செய்யவில்லை, பெயரைச் சொல்லி 'என்னங்க' 'சொல்லுங்க' என்றே இன்றும் அழைத்துக் கொள்கிறார்கள். இத்தனைக்கும் அவர்கள் அனைவரும் ஒத்தவயதினர். நானும் கேட்டுப்பார்த்தேன், எல்லோருமே நெருக்கமாகத்தான் உணருகிறோம், இருந்தாலும் ஒருமை விளிப்பு கூச்சமாகவே இருக்கிறது என்றார்கள்.

ஒருமை விளிப்பு மதிப்பு கொடுக்கிறதா இல்லையா என்பது அவர்களுக்கு நாம் இருக்கும் நெருக்கத்தைப் பொறுத்தே இருக்கிறது, நன்கு தெரிந்தவர்கள் நம்மை ஒருமையில் அழைக்கும் போது இருவருக்கிடையேயான உரிமை, பிணைப்பு என்று தானே அதைச் சொல்ல முடியும், தெரியாத ஒருவர் அல்லது வேண்டுமென்றே நம்மை ஒருமையில் அழைத்தால் அது அங்கே மரியாதைக் குறைவாகவே எடுத்துக் கொள்ளப்படுகிறது, அழைக்கும் முறை ஒன்றுதான், அழைக்கப்படும் நபர்களின் நோக்கம், நெருக்கம் பொருத்தே ஒருமை விளிப்புகள் பொருள் கொள்ளப்படுகின்றன. உள்நோக்கத்தோடு அவ்வாறு அழைப்பவர்களை பெரிதுபடுத்தத் தேவையில்லை. பதிலுக்கு பதில் நாமும் அவ்வாறு செய்தால் அவர்கள் சொல்லுவதை நாம் மறைமுகமாக ஏற்கிறோம் என்றே பொருள்.

சிறுவயதில் என் பெற்றோர்கள் குறிப்பாக அம்மா என்னை வா போ என்று தான் அழைப்பார்கள், பிறகு 'வாப்பா' 'போப்பா' என்று மாற்றிக் கொண்டார்கள், பிடிக்கவில்லை, வா போ என்றே அழையுங்கள் என்று சொன்னேன். எங்கள் இல்லத்தில் அம்மா அப்பா தவிர அனைவரையும் எங்களுக்குள் உடன்பிறந்தோரை பெயர் சொல்லி ஒருமையில் அழைப்பதுதான் வழக்கம், அண்ணன் என்றால் வா போ ஆனால் வாடா போடா வுக்கு பழகிக் கொள்ளவில்லை, இளைய உடன்பிறப்புகளிடம் கூடவே வாடா போடா என்ற டாவும் இருக்கும், சகோதரிகளை வா போ என்று அழைப்போம் ஆனால் அவள் இவள் வாடி போடி என்று சொன்னது கிடையாது, பெண் குழந்தைகளை எங்களின் உறவினர்களில் அப்பாக்கள் கூட அவள் இவள் டி போட்டு என்று அழைக்க தயக்கம் காட்டுவார்கள், பெண் குழந்தைகளை வாம்மா போம்மா என்பார்கள், மகன்களுக்கு வாடா போடா உண்டு. நான் என் மகளை அழைக்கும் போது வாடி போடி என்று சொல்வதுண்டு, வா போ என்று அஃறிணையில் பெண்குழந்தையை சொல்வதைவிட 'டி' போட்டு அழைப்பது சரியென்றே படுகிறது.

இல்ல உறவுகளைத் தாண்டி நண்பர் வட்டத்தில் மிகவும் நெருக்கமானவர்களை உறவின் பெயரிலேயே அழைக்க ஆரம்பித்துவிடுவேன். அப்பா வயதுடைய நண்பர்களின் அப்பாக்களை அப்பா என்று தான் அழைத்தே வந்திருக்கிறேன். தமிழ் சமூகத்தில் அம்மா வயதுடைய எந்த பெண்ணையும் அம்மா என்று தயங்காமல் அழைப்பது போன்று அப்பாக்களுக்கு அந்த மரியாதைக் கிடைப்பதில்லை. காரணம் எவருடைய குழந்தைக்கும் பால் சுரக்கும் அம்மாவால் பாலுட்ட முடியும், அந்த ஒரு உணர்வு பூர்வ அடிப்படை தகுதி அப்பாக்களுக்கு கிடையாது, அப்படியும் நெருங்கிய ஒருவரை அப்பாவென்று அழைக்க முடியாமல் போவதற்கு காரணம், தனது தாயுடன் தொடர்பு படுத்திக் கொண்டு பார்க்கும் கிழான மனநிலையே காரணம். நான் கல்லூரியில் படிக்கும் காலத்தில் நண்பர்கள் அனைவருமே அடுத்தவரின் அப்பாவை அப்பா என்றே தயங்காமல் அழைத்தனர். அம்மா அப்பாவின் வயதை ஒத்தவர்களை தாரளமாக அதே உறவின் பெயரில் அழைக்கலாம், நம் அம்மாவின் வயது ஒத்த பெண்களை அம்மா என்று அழைப்பதற்குத் தயக்கம் காட்டாத பலரும், நம் தந்தையின் வயதுடைய ஆண்களை அப்படி அழைப்பதற்கு ஏனோ தயங்குகிறார்கள், ஆண்களை அவ்வாறு 'அப்பா' என்று அழைக்கத் தயங்குவதற்கு, யார் வேண்டுமானாலும் அம்மாவாக இருக்காலாம், ஆனால் அப்பா என்று அழைத்தால் அது பிறப்புடன் தொடர்புடையர் மட்டுமே என்று நினைப்பது ஆண்களை உயர்வுபடுத்துவதாக பொருளா ? பிறரால் அம்மா என்று அழைக்கப்படும் போது எந்த பெண்ணும் அதை உயர்வாகவே நினைக்கிறாள், சமூக பொதுச் சிந்தனையால் ஆண்களுக்கு அத்தகைய உயர்வு கிடைக்காமல் போனது இல்லாதது குறைதான். அவ்வாறில்லாமல் பிறரால் அப்பா என்று அழைக்கப்படும் ஆண்கள் அதை தனது குணநலனுக்கு கிடைத்த உயர்வாக நினைத்து மகிழ்கிறார்கள் என்பது பலருக்கு தெரியவில்லை

வலைப்பதிவு நண்பர்களிடம் நட்பு என்பதைத் தாண்டிய நெருக்கமாக நினைத்து ஒரு சில பதிவர்களை உறவின் பெயராலே அழைக்கிறேன். எனது பின்னூட்டங்களைப் படிக்கும் பதிவர்கள், நான் யார் யாரை அவ்வாறு அழைக்கிறேன் என்று தெரிந்திருக்கும். அவர்கள் ஏற்றுக் கொண்டுள்ளனர். அதுபோல் வேறு சிலர் அவர்களாகவே உறவின் பெயர் சொல்லி அழைத்தார்கள், பிறகு விலக்கிக் கொண்டார்கள், நான் அவ்வாறு செய்யச் சொல்லிக் கேட்கவில்லை என்பதால் அவர்கள் முறை மாற்றும் போது 'தன்னால் வந்தது தன்னால் போனது' நட்டமில்லை என்றே நினைத்துக் கொண்டேன்.

நண்பரின் மனைவி நம்மைவிட 10 வயது குறைவாக இருந்தாலும் நண்பரை அழைப்பது போல் நண்பரின் மனைவியையும் ஒருமையில் அழைக்கும் உரிமையை நாமாகவே எடுத்துக் கொள்ளக் கூடாது என்றே நினைக்கிறேன். நான் இதுவரை எந்த நண்பரின் மனைவியையும் அவர் எவ்வளவு இளையராக இருந்தாலும் 'ங்கள்' விகுதி இன்றி அழைத்தது இல்லை.

மதிப்பு குறித்து எழுதத் தொடங்கி நட்பு உறவென்று நீண்டுவிட்டது.

தலைப்பின் மையக் கருத்து இதுதான்,

நீங்கள் நன்கு தெரிந்த ஒருவரை, உங்களுக்கு நெருக்கமான ஒருவரை பொதுவில் திடிரென்று எதோ காரணங்களுக்காக ஒருமையில் தூற்றுகிறீர்கள் என்று வைத்துக் கொள்வோம். இது 'எதிர்காலத்தில் இது தனக்கும் நடக்கலாம்' என்றே உங்களுக்கு நெருக்கமான பிறர் உங்கள் மதிப்பை உடனடியாக குறைத்துவிடுவார்கள். அது தவிர்க்கவும் முடியாது. மீறியும் நமக்கு நெருக்கமான ஒருவர் தூற்றிவிட்டால் கொஞ்சம் பொறுமையாக அவர்களுக்கு விளக்கலாம், அவர்கள் புரிந்து கொள்ளும் மனநிலையில் இல்லை என்றால் அவர்களை விட்டு விலகலாம். அப்படி இல்லாமல் நாமும் எதிர்வினை ஆற்றினால் நாம் அவர்கள் மீது இதுநாள் வரை கோபமாக இருந்ததாக அது வெளிக்காட்டிவிடும், பொது இடத்தில் மரியாதைக் குறைவாக நடப்பவர்களிடம் எதிர்வினை ஆற்றாது நடந்து கொள்வது கோழைத்தனம் அல்ல.
தெரியாத ஒருவர் அல்லது எதிரியாக 'நினைத்துக்' கொண்ட ஒருவர் நம்மைச் சீண்டுவதற்காகவே தாயைத் தரம் தாழ்த்தித் தூற்றுகிறார் என்றால்,அவர் இழிசொல்லுக்கு மதிப்பு கொடுக்காமல் அப்படியே விட்டுவிட்டு வேறு வேலைப்பார்க்கலாம். இதில் இரண்டு அம்மாக்களின் கண்ணியம் காக்கப்படுகிறது

பிறரிடம் நாம் மரியாதையாக நடந்து கொள்வது, நம்மைப் பற்றிய மதிப்பை மறைமுகமாக அவர்களுக்கு உணர்த்துவதுதான். 'இவர் நம்மை மதிப்பதால் இவர் நம் மரியாதைக்குரியவர்' என்றே நினைக்க வைக்கும் அதாவது பிறருக்கு நாம் செய்யும் மரியாதையில் சம அளவு தன் மரியாதையை தற்காத்துக் கொள்வதற்காக அமைந்துவிடுகிறது. மதிப்பு மரியாதை என்பது கொடுத்து (பின்)வாங்குவதல்ல, 'மரியாதை செய்வது' என்பது பிறர்குறித்த மரியாதை தொடர்புடையது மட்டுமல்ல, தன்மரியாதையும் சேர்த்தே அதில் அடங்கி இருக்கிறது.

தன்னை எல்லோரும் மதிக்க வேண்டும் என்று நினைத்தால் அதை காத்துக் கொள்வதில் பெரும்பங்கு நம்மிடையே தான் இருக்கிறது

அன்புடன்,
கோவி.கண்ணன்

ஓதுவார் ஆறுமுகசாமி தமிழை உள்ளே அழைத்துச் சென்றார்...நந்தனாரை அழைத்துச் செல்வது யார் ?

2008-03-19T08:56:00.001-07:00

சமணமும் பவுத்தமும் முற்றிலும் துடைத்து ஒழித்த பிறகு... தீண்டாமை ஓங்கி இருந்த கிபி 12 ஆம் நூற்றாண்டில், அடியார்களை மெய்சிலிர்க்க வைக்க பெறவும் உடனடி(அவசர) தேவையாகவும் சைவ சமயம் வளர்க்கவும் பக்தி பரவசக் கதைகள் தேவைப்பட்டது. அதற்கு பேருதவி புரிந்தவர் சேக்கிழார் என்னும் பெருமகனார். திருத்தொண்டர் புராணம் என்ற பெயரில் எழுதப்பட்ட பெரிய புராணம் என்னும் சைவ சமய இலக்கியத்தை இயற்றினார். அதன்படி 63 நாயன்மார்கள் கதை புனையப்பட்டது, தமிழகம் முழுவதும் சிவன் கோவில்களில் அந்த ஊரின் தொடர்பில் புனைவுக் கதைகளாக நாயன்மாரில் ஒருவர் வாழ்ந்ததாக 63 கதைகளில் நாயன்மார்கள் பற்றி பெரிய புராணத்தில் எழுதினார் சேக்கிழார்.

கண்ணப்பநாயனார், காரைக்கால் அம்மையார் என 63 அடியார்கள் வாழ்ந்ததாக எழுதி இருக்கிறார். அதில் ஒருவர் தான் தாழ்த்தப்பட்ட புலையர் வகுப்பைச் சேர்ந்த நந்தனார் என்னும் அடியார். நந்தனாரை கதைக்காக பயன்படுத்திக் கொண்டது தவிர அவர்பற்றிய பின்னனி எதையும் சொல்லாமல் குறிப்பாக நந்தனார் வாழ்ந்ததாகச் சொல்லப்பட்ட புலைப்பாடியைப் பற்றி எதுவும் தெரிவிக்கவில்லை என்பதால் சேக்கிழாருக்கு புலையர்வாழ்வு எத்தகையது என்று தெரியவில்லை என்றும், அதற்க்கான காரணம் புலையர் வாழும் ஊர்களை சேக்கிழார் போன்ற பிரமனர் அல்லாத உயர்வகுப்பினரும் எட்டிப்பார்த்ததில்லை என்றும், தில்லைப் போன்ற ஆலயம் அமைந்த ஊர்களை சேக்கிழார் நோக்கத்தின் காரணமாக அளவுக்கு அதிகமாக புகழ்ந்திருக்கிறார் என்றும் பெரியபுராணம் பற்றி ஆய்ந்தவர்கள் எழுதி இருக்கிறார்கள். பதிவின் மையம் தொட்ட கருத்து அல்ல இது.

நந்தனார் வரலாறு பற்றி அனைவரும் அறிந்தது தான், மேலும் நந்தனார் எரிக்கப்பட்டு இறைவனுடன் இரண்டர கலந்ததாகச் சொல்லப்பட்ட கதைகளை பலரும் அறிந்தது தான் அதுபற்றி எதுவும் சொல்வதற்கில்லை. பெரியபுராணத்தில் குறிப்பிட்டுள்ள படி சிவன் கோவிலக்ளி 63 நாயன்மார்களை கோவில் சுற்றில்(பிரகாரம்) வைப்பது ஆகாமவிதிகளில் ஒன்று. நந்தனார் கதை தில்லையில் நடந்ததாகச் சொல்லப்பட்டுள்ளதால் நந்தனாருக்கென்றே சிறப்பு சிலையும் வழிபாடும் பாரதி / உவேசாமிநாதய்யர் வாழ்ந்த காலத்தில் இருந்ததாக குறிப்பு இருக்கிறது.

நந்தனார் சிலையை தில்லைவால்(எழுத்து பிழையன்று) அந்தணர்கள் எப்பொழுது அகற்றினார்கள் என்று தெரியவில்லை. கடந்த 65 ஆண்டுகளாக நந்தனாரின் திருவுருவ சிலை தில்லையில் இல்லை. வலைப்பதிவில் இதுபற்றி எவருக்கும் தெரியாது என்று நினைக்கிறேன். அண்மையில் தின்னை கட்டுரையைப் படிக்கும் போது அண்ணன் (ஆர்.எஸ்).எஸ் அரவிந்தன் நிலகண்டன் மிகவும் மனம் வருந்தி நந்தனார் (தில்லைவால் அந்தணர்களால்) அகற்றப்பட்டதைக் குறிப்பிட்டு மீண்டும் அதே இடத்தில் வைக்கப்பட வேண்டும் என்ற கோரிக்கையுடன், நந்தனார் சிலை இருந்ததற்கான ஆதார அணிவகுப்பையும் கட்டுரையில் வைத்து இருந்தார், பின்பு அதுபற்றி விழிப்புணர்வு கொடுக்க வேண்டாம் என்று நினைத்தாரோ, என்னவோ தெரியவில்லை தின்னையில் அந்த கட்டுரையை காணவில்லை. ஆனால் அதே போன்ற கட்டுரை ஒன்றை மலர்மன்னன் எழுதி முன்பு இருக்கிறார்.

அதில் நந்தனார் சிலை அகற்றப்பட்ட ஆதாரம் தொட்டு குறிப்பிட்டுள்ளவையில் ஒன்று மிகவும் மனம் பாதித்தது

"மகாதேவன் மீண்டும் 1943ல் சிதம்பரம் ஆலயத்திற்குச் செல்கிறார். இப்பொழுது அங்கு

நந்தனாரைக் காணவில்லை! இதுபற்றி மகாதேவன் மனம் நொந்து எழுதுகிறார்:

நந்தனார் சிலையுருவில் நின்றிருந்த இடம் கால்களால் மிதிபடும் இடமாகிவிட்டிருந்தது."

***

சிலைகளிலும் தீண்டமை பார்த்து அதை அகற்றிய தில்லைவால் அந்தணர்களின் செயலை என்னவென்று சொல்வது, அவர்களும் தமிழ்பேசுகிறார்கள், தமிழர்கள் அனைவரையும் வேறுபாடு பார்க்காமல் விசி திருமாவளவனுக்கும் மாலை மரியாதை செய்தார்கள் என்று சொல்வதெல்லாம் சப்பைக்கட்டுகள் தானே. திருமாவளவனுக்கு மாலை மரியாதைச் செய்தது அவருக்கு பின்னால் நிற்கும் மக்கள் சக்தியை நினைத்தும், பெரும்பான்மை தலித் பெருமக்கள் வாழும் தில்லையில் அவ்வாறு செய்யவில்லை பிழைப்புக்கே வேட்டு என்ற பயம் தானே காரணம் ?

ஐம்பது ஆண்டுகளுக்கு பிறகு தில்லைக் கூத்தனுக்கு தமிழை மீட்டுத்தந்தார் ஒரு ஓதுவார் ஆறுமுகசாமி, அந்த போராட்டத்தில் தில்லைவால் அந்தணர்களின் தாக்குதலுக்கு ஆளாகி ஒரு கண்ணை இழந்து கண்ணப்பநாயனாராக ஆகியும், உறுதி குறையாமல் இறுதியில் அவரது உண்மையான இறைவேட்கை அவருக்கும் சிவனுக்கும் வெற்றியைத் தேடித்தந்தது, சிற்றம்பலமும் தமிழும் சங்கமம் கொள்ள வைத்தது அவரது தொடர் போராட்டம். நந்தன் சிலையாக எங்காவது மறைவாக திருமுறைகளைப் போல் மறைத்துவைக்கட்டு இருக்கிறானா ? அல்லது எதோ ஒரு தில்லைவால் அந்தணரின் வாயில் படிக்கட்டுக்கு கீழ் கால்மிதியில் நசுங்குன்றானா ? தில்லையம்பலனுக்கே வெளிச்சம்.

சைவ சமயத்தில் மட்டும் தான் தீண்டப்படாத வகுப்பினன் என்று நந்தன் ஒதுக்கப்பட்டது ?ஆழ்வார் சிலைகள் கூட பெருமாள் அருகில் நிற்பதற்கு மறுக்க்கப்பட நிகழ்வுகள் வைணத்திலும் நடந்தேறி இருக்கிறது.

நந்தனார் சிலை உள்ளே அதே இடத்தில் அமைக்கப்பட வேண்டும். தில்லையில் மீண்டும் சிலைத்தீண்டாமைக்கு எதிராக பெரும் போராட்டம் நடத்தப்படவேண்டும். வரட்டு ஆன்மிகம் பேசினால் மட்டும் போதுமா? நாத்திகனுக்கு கவலை வேண்டாம் என்று சொல்லும் ஆத்திகர்கள், நாத்திகன் துணை இல்லாமல் இதை சாதிப்பார்களா ?

--
அன்புடன்,

கோவி.கண்ணன்
Blogger Websites :
http://govikannan.blogspot.com
http://kaalangkal.blogspot.com

ரவியை விமர்சனம் செய்ய எனக்கு என்ன தகுதி இருக்கிறது ?

2008-03-16T20:22:00.000-07:00

எனது இடுகைகளைப் படித்தவர்கள் பலருக்கு பரவலாக ஏற்பட்டிருக்கும் எண்ணம் 'நான் ஒரு நாத்திகவாதி'. நான் பலதரப்பட்ட பதிவுகளையும் விரும்பிப் படிப்பவன் அதுபற்றி கருத்து கொண்டிருப்பவன் என்ற போதிலும், பதிவுலகில் நுழைந்த காலகாட்டங்களில் (நீண்ட நாள் ஆனது போல் கட்டமைப்பு தான்) மிக்கவையாக கவனம் ஈர்த்தவை ஆன்மிகம், சமயம் தொடர்புடைய பதிவுகளே. அதைப்பற்றிய எழுதிய நண்பர்கள் நெருக்கமானார்கள், நெருக்கமாக இருந்தார்கள்.

ஆன்மிகம் வளர்ந்திருக்கிறது என்ற கருத்து... மக்கள் அனைவரும் எதோ ஒரு மதம் அல்லது சமயம் சார்ந்தவராக இருப்பதால் தெரியும் வெறும் தோற்றம். அது அப்படி அல்ல என்றே நினைக்கிறேன். ஆன்மிகம் தன்னை நிலைநிறுத்திக் கொள்ள எல்லா காலகட்டங்களிலும் போராடியே வந்து கொண்டிருக்கிறது. ஆன்மிகம் வென்றிருக்கிறது என்பதெல்லாம் தனிமனித நிராசைகளை தீர்த்துவைத்த நம்பிக்கையின் அடிப்படையிலான தனித் தனி கதைகளேயன்றி ஒரு சமூகப் புரட்சி செய்தது என்பதற்கான ஆதாரங்கள் இதுவரை இருந்தது இல்லை. அப்படி எதாவது செய்திருந்தால் அது சமயமாக பரிணமித்து அடிப்படைக் காரணங்கள் நீர்த்துப் போய் மறைந்து உருமாறி ஒரு பெயரில் நிலைத்திருக்கும். காலவெள்ளத்தில் பின்னால் அழிந்தே போகும். அது காலத்தின் கட்டாயம் என்றால் மிகையல்ல.

உலகில் உள்ள எல்லா மதங்களிலும் ஏற்பட்டிருக்கும் உட்பிரிவுகள் இதனை தெளிவாகவே காட்டுகின்றன. எந்த ஒரு மதமும் பிரிவுகளாக இல்லை என்று எவராலும் உறுதியாக சொல்ல முடியுமா ?

அண்மையில் தெக்கிகாட்டான் அவர்களிடம் சாட்டில் உரையாடிய போது 'ஆன்மிகம்' பற்றிய உரையாடல் வந்தது

"ஒரு மனிதன் தன்குள்ளே உள்ள இரட்டைத் தன்மையை உடைத்தெரிவது ஆன்மிகத்தின் இறுதி நிலை அல்லவா ?" என்றார் நல்ல சிந்தனை.

"ஆன்மிகத்துக்கு வரையறை இல்லை, விழிஒளியற்றோர் (Blind) யானையைத் தடவிப் பார்த்து சொல்வது போல்தான். அவரவர் அனுபவம் பொறுத்தும், தன் ஆன்மிகத் தேடலில் போதும் என்று அவர் நிற்கும் இடத்தை பொறுத்தும் இருக்கிறது" என்று சொன்னேன்

"ஆன்மிகத்திற்கும், மதவாதத்திற்கும் வேறுபாடு இருக்கிறது" என்றார்

"முதலில் இரண்டையும் பிரிக்க முயற்சி நடப்பதே இல்லை, பின்பு எப்படி வேறுபடுத்திப் பார்ப்பது ?" என்றேன்

ஆன்மிகவாதிகள் பிறப்பிற்கும் இறப்பிற்கும் விதி, இறைவனின் லீலை, இறைச் சித்தம் இன்னும் எந்தனையோ காரணங்களைச் சொன்னாலும், ஆன்மிகத்தால் தன்னை நோக்கி 'நான் யார்....நான் ஏன் பிறந்தேன் ?' என்று ஒருவன் தன்னைத்தானே கேட்க வைக்க முடியவில்லை என்றால் ஆன்மிகவாதிகள் சொல்லும் பிறப்பு கொள்கையும், அதன்பயனென அத்தனை காரணங்களுமே பயனற்றவை. அதைக் கேட்கவைப்பதில் ஆன்மிகம் இன்னும் போராடியே வருகிறது.

மதங்களால் நன்மை ஒன்றும் இல்லை. ஒரு கோட்பாட்டில் அதில் மூட நம்பிக்கையே மிக்கவையாக இருந்தாலும் அந்த நம்பிக்கையில் அந்த மதத்தைக் கடைபிடிக்கும் மனிதனை சாகும் வரையில் வைத்திருக்கிறது அம் மதங்கள். மதங்களைப் தவிர்பவனே ஆன்மிகவாதி, அதைச் செய்வதில் நாத்திகனே முன்னிற்கிறான். என்பார்வையில் நாத்திகனே உன்மையான ஆன்மிகவாதி. :) மற்றவர்கள் சுய தேடலைத் மறந்து கடவுள் கோட்பாடென்னும் மதக் கொள்கைகளை தாங்கிப்பிடிப்பவர்களாகவே உள்ளனர்.

மாதவிப் பந்தல் பற்றிய எண்ணங்களைப் பகிர்ந்து கொள்வதற்கு எழுதத் தொடங்கி சற்று நீண்டுவிட்டது,

ரவியின் மாதவிப் பந்தல் பதிவு பற்றி சொல்ல வேண்டும்... தலைப்பு தவறிவிடக் கூடாதல்லவா ?

ஏற்கனவே ஒரு தொடர்கதை மற்றும் ஒரு பதிவு பற்றிய நான் எழுதிய இருவேறு விமர்சனங்களுக்கு பிறகு என்மீதான அவதூறு விமர்சனங்களைத் தொடர்ந்து ... அதன் தொடர்புடைய (முன்னாள்) நண்பர்களிடம் நல்லுறவு இல்லை. இதையெல்லாம் சென்டிமெண்டாக எடுத்துக்கொண்டு கண்ணபிரான் ரவிசங்கர் பதிவை விமர்சனம் செய்ய கொஞ்சம் தயங்கினேன். ஒருசிலவற்றில் கடந்த காலங்களின் நிகழ்வுகளை தற்காலத்துடன் ஒப்பீடு செய்வதில் உடன்பட்டவன் அல்ல, எல்லாமும் எல்லாவற்றிற்கும் எப்போதும் பொருந்தும் என்று சொல்ல முடியாது என்பதால் எனது எண்ணத்திற்கு தடைபோட்டு மாதவிப் பந்தலின் நிழலில் அமர்ந்து பார்க்கிறேன். குளுமையான நிழல், கூடவே பந்தலின் அடர்த்தி சற்று குறைவால் கீற்றாக தெரியும் சூரிய ஒளி... அது சுடவில்லை... தனியாகத் தெரிந்தது.

இவரது ஆன்மிக சிந்தனைகளில், எழுத்தில் குறைச் சொல்ல முடியுமா ? எனக்கு அனுபவமோ அறிவோ போதாது என்றே நினைக்கிறேன். என்னளவில் அவரது எழுத்துக்களை உள்வாங்கிக் கொண்டு தெரிந்து கொண்டதில், ... எழுத்து அல்லது தன்னை நிலைநிறுத்துக் கொள்ளவேண்டும் என்பதைத் தாண்டி மிகவும் சிறப்பாகவே ஒரு சேவையாகவே செய்து வருகிறார்.

பால் இனிதுதான், அதனுடன் சர்கரை ஏலம் சேர்க்கும் போது, இனிமையும் மணமும் சேர்ந்து கொள்ளும், பாலின் சுவையை மேலும் இனிமை சுவை மிக்கவையாக ஆக்கிவிடும். இரவிசங்கர் எழுத்துக்களில் நகைச்சுவைக்குப் பஞ்சம் இருந்ததில்லை. பிறரை கேலி செய்து அதை நகைச்சுவை என்றாக்கும் அபத்தங்களை இவர் செய்ததே இல்லை. எவருடைய எதிர்கருத்தையும் தன்மீதான எதிர்தாக்குதல் போலவோ, தன்னை மேதாவி என்று காட்டிக் கொள்ளும் படியோ அவர்களுக்கு பதில் கருத்துக் கூறியதில்லை. எனக்கு தெரிந்து நாகரீகமற்ற கேள்விகளைக் கூட பொறுமையாகக் கேட்டுக் கொண்டு, பதில் அல்லது மறுமொழி சொல்வதன் நோக்கம் கேட்டவர்களை நாணம் கொள்ளச் செய்யவேண்டும் என்ற எண்ணமில்லாமல் இவர் சொல்லும் மறுமொழியால், நாகரீகமற்று கேட்பவரும் அடுத்தமுறை இவரிடம் அதுபோல் கேட்பதைத் தவிர்பர் அல்லது இவர் சொல்வதை ஏற்றுக் கொள்வர்.

நானும் இவரிடம் கற்றுக் கொண்டு மென்மேலும் வளர்த்துக் கொள்ள நினைப்பது பொறுமையும், மற்றவர்களை மதிக்கும் தன்மையையும் தான். அதைதாண்டி அவர் எழுதும் ஆன்மிகத்தில் எனக்கான பயன்பாடு குறைவே.

இவர் இடுகைகளில் பின்னனிகளுடன் கூடிய அரிய தகவல்களும், அரிய புகைப்படங்களும் ஒருசேர அமைந்திருப்பது மிகவும் சிறப்பானது. மற்றபடி அவரது ஆன்மிக எழுத்துக்களை விமர்சிக்கும் தகுதி எனக்கில்லை என்று சொல்வதில் நான் வெட்கப்படவில்லை.

நான் இவரிடமும் இவரைப் போன்ற ஆன்மிகவாதிகளிடம் எப்போதும் வலியுறுத்துவது, உருவழிபாடு என்ற ஒன்றை மட்டும் சார்ந்திருக்கும் பக்தி இலக்கியங்களைத் தாண்டியும் கொஞ்சம் மேலே செல்லுங்கள்.

ஓரிறை (இறைவன் ஒருவர்), இறையற்ற தன்மை இரண்டில் ஒன்று தான் உண்மையாக இருக்க முடியும். மற்றபடி உருவழிபாடு அதைச் சார்ந்த மதக் கொள்கைகள் என்னதான் புனித முலாம் பூசப்பட்டாலும் அவற்றிற்கிடையிலான வேறுபாடுகள் வேற்றுமைகளை வெளிச்சம் போட்டு வெறுப்புகளை வளர்க்கின்றதேயன்றி சமுக மாற்றத்தை ஒருக்காலும் அவை ஏற்படுத்திவிடாது. இறை நம்பிக்கையுடையவர்கள் ஓரிறை என்ற ஒற்றைப் புள்ளியில் இணைந்தால் 'ஆன்மிகம்' என்று சொல்லப்படுவதன் பயனை அனைவரும் அடைவர். பல கடவுள்கள் வெறும் பக்திக் கோட்பாடுகளேயன்றி அவை ஆன்மிகம் அல்ல. அதே போல் பல மதங்கள் சொர்கம் நரகம் என்ற நம்பிக்கைச் பயமுறுத்தல் தவிர்த்து இவை தனிமனிதனுக்கு எந்த நன்மையும் செய்தது இல்லை. எந்த ஒரு மதமும் சிறந்த மதம் கிடையாது. அப்படி ஒன்று இருந்திருந்தால் எப்போதோ உலகம் முழுவதும் ஒரே மதமாக ஆகி இருக்கும்.

இந்துமதத்தில் உருவழிபாடு போற்றப்படுவதற்குக் காரணம், இல்லற வாழ்க்கைப் போலவே கடவுளுக்கும் குடும்பம் மனைவி மக்கள் அமைத்து வழிபடும் முறை இல்லறவாழ்வின் மேன்மையை புனித இடத்தில் நிறுத்திப் பார்க்கும் மன வடிவம். உருவ வழிபாடு முற்றிலும் தவறு என்று சொல்ல முடியாது. அடிப்படையைப் புரிந்து கொள்ளாமல் இறை நம்பிக்கை என்ற பெயரில் வெறும் சடங்குகளாகவும் அதன் தொடர்பில் 'தீண்டாமை / பார்பனீயம்' போன்ற மோசமான கட்டமைப்பை கட்டிக் காக்கும் கேடயங்களாக இருப்பதால் நான் உருவவழிபாட்டை ஆன்மிகத்தின் அடையாளமாக நினைப்பது இல்லை.

அன்பு நண்பர் கண்ணபிரான் ரவி சங்கர் அவர்களே,
வைணவம், சைவம், என்று பிரித்துப் பார்த்தல், அவை அவற்றின் சிறப்புத்தன்மைக்காக தனியாகவே பார்க்க வேண்டும், ஒன்றில் உள்ள சிறப்பு மற்றதில் இல்லாதது குறையல்ல ஒருவேளை அவை தேவையற்றதாகக் கூட இருக்கும். இன்றைய தமிழக இந்துக்களிடம் ஆழமாக பதிந்துவிட்டது திருமாலுக்கும் சிவனுக்கும் இடையே உள்ள உறவு மச்சான் (பார்வதியின் அண்ணன்) என்பதே. மோகினி - சிவன் போன்ற (கள்ள) உறவும் உண்டு. வைணவம், சைவம் என்று பிரித்துப் பேசுவது எந்தவிதத்திலும் பக்தியாளர்களுக்கு பயன்தராது. நீங்கள் அப்படி எழுதுகிறீர்கள் என்று சொல்லவில்லை. பெரும்பாண்மை பதிவுகள் வைணவம் சார்ந்ததாகவே இருக்கிறது என்று நான் சொல்லி புரிந்து கொள்ள வேண்டுமா ? கண்ணபிரான் ரவிசங்கர் ஒரு வைணவர் என்று என்போன்ற பலருக்கு ஏற்பட்ட எண்ணத்தை உடைத்து எரியுங்கள்.

மேலும் ஒரு வேண்டுகோள்,

வலைவரை வந்து நெடிது வளர்ந்திருக்கும் தமிழை செழிக்க வைக்க வேண்டும், தமிழ் வளர்ச்சிக்கு பாடுபட்டவர்கள் இறைமறுப்பாளர்களா ? இறை ஏற்பாளர்களா ? இது சிறந்த புலவர் யார் இளங்கோவா ? கம்பனா ? என்று கேட்பதற்கு ஒப்பானது. இருபக்கமும் அதை நன்றாகவே செய்துவந்திருக்கிறார்கள், வருகிறார்கள். இங்கு வலையில் எழுதுகிறோம், நமது எண்ணங்களை எழுதும் போது கூடவே தமிழார்வத்தையும் ஏற்படுத்தும் வண்ணம் எழுதிவரவேண்டும் என்று கேட்டுக் கொள்கிறேன். செம்மொழி தகுதி கிடைத்து இருப்பதால் தமிழருக்கு என்ன நன்மை ?என்றெல்லாம் கேட்பவர்களும் தமிழர்களாக இருக்கிறார்கள். நாம் தமிழை செம்மையாக எழுத எழுத படிப்பவர்களின் எண்ணங்களிலும் தூய தமிழ்ச் சொற்கள் பதிந்துவிடும், 1900 ஆண்டு இருந்த தமிழுக்கும் தற்பொழுது எழுத்துத்துத் தமிழுக்கும் வேறுபாடுகள் மிக்கவையாகவே இருக்கிறது. தற்பொழுது 90 விழுக்காடு தமிழ்ச் சொற்களையே பயன்படுத்தி வருகிறோம் அதை 100 விழுக்காடாக மாற்றும் முயற்சி நமது கையில் தான் இருக்கிறது. ஆரம்பத்தில் எளிமையான, புரியும் படியான தமிழ்ச் சொற்களை பதிவில் பயன்படுத்துவது எனக்கும் கடினம் மிக்கவையாகவே இருந்தது, தற்பொழுது வேற்று மொழிச் சொற்களை முற்றிலும் தவிர்த்துவிட்டு எழுதுவது எனக்கு இயல்பாகிவிட்டது.

உங்கள் இடுகைகள் அனைத்தும் பெரும்பகுதி தூயத்தமிழாகவே இருக்கிறது. அங்கொன்றும் இங்கொன்றுமாக அரிசியில் கருங்குருணை கிடப்பது போல் வெகு சில வேற்றுச் சொற்கள் இருக்கின்றன. எழுதும் போது ஒருமுறை படித்துவிட்டு வேற்று மொழிச் சொற்களின் மாற்றுச் சொற்களை அந்த இடங்களில் சேர்க்கலாம், சங்ககாலத் தமிழில் எழுதவேண்டும் என்று சொல்ல வரவில்லை, புழக்கத்தில் இருக்கும் சொற்களையே முற்றிலுமே பயன்படுத்த முடியும். தங்கள் எழுதும் பதிவுகள் தனித்தமிழாக வரவேண்டும் என்று விரும்புகிறேன். பலமொழிகள் தெரிந்த உங்களுக்கு தமிழில் உள்ள வேற்றுமொழிச் சொற்களின் அடையாளம் நன்றாகவே தெரிந்திருக்கும். அவைகளை களைந்துவிட்டு எழுதவேண்டும் என்று கேட்டுக் கொள்கிறேன்.

எனக்கு தகுதி இருப்பதாக நினைத்து மாதவிப்பந்தல் பற்றி என் எண்ணங்களைப் பகிரிந்து கொள்ளக் கேட்டு வாய்ப்பளித்த கண்ணபிரான் ரவிசங்கர் (கேஆர்எஸ்) என்றும் ரவி என்றும் அன்புடன் அழைக்கப்படும் ரவி அவர்களுக்கு நட்சத்திர வாழ்த்துக்கள் மற்றும் நன்றி.

விதிகள் (நண்பர்களுக்காகவும்) காலத்தால் (இடம்) மாறும்.
:):):)

--
அன்புடன்,
கோவி.கண்ணன்

கவிஞனின் காதல் கரு !

2008-01-31T01:43:00.000-08:00

என் கருவுக்கு நீதான் உரு...!
கவிதை எழுதி எழுதி
உருவன காதல்
அவள் கருவானதும்,

கவிதையும் கவிஞனும்
காணாமல் போனது !

பொறுப்பு !

2007-12-27T23:40:00.000-08:00

காதை செவிடாக்கும் பெரும் வெடிச்சத்தம்,
கபாலம் உடைந்து இரத்தம் வடியும் தலைகள்,
இனி ஒன்றுமில்லை என்று காட்டியபடி,
இரத்தம் வடிந்து, விரிந்து துவண்ட கைகள்,
உள் ஆடைகளை வெளிப்படுத்தியபடி,
இரத்தத்தில் நினைந்த நயிந்த மேலாடைகள்,
வெட்டி தூக்கி எறியப்பட்டதுபோல்
எட்டடி தாண்டி விழுந்த கால்கள்,
வெளியுலகை சரிந்தபடி,
எட்டிபார்க்கும் பெருங்குடல்கள்,
பாதி எரிந்து,
இன்னும் எரிந்து கொண்டிருக்கும் வாகனங்கள்,
சிதறிய காலணிகள் !
பிளந்து விரிந்த மார்பின் வழியாக
இயற்கை காற்றை சுவாசிக்க முனைந்து
தோற்ற இதயங்கள் !
கடைசியாய் உலகை கேள்வியுடன்,
கேலியாய் பார்த்தபடி அடங்கிய கண்கள் !
இந்த பரபரப்புகள் அடங்குமுன்,
பூமியில் இரத்தம் காயும்முன்,
அங்க அடையாளம் காணும்முன்,
துப்பு துலங்கவில்லை என்று கூறி
பாதுகாப்புத்துறை கைவிறித்து விடக்கூடாது,
என்பதில் அக்கறைகொண்டு,
இப்பொழுதெல்லாம், பொறுப்புடன்
நடந்து கொள்கிறார்கள்,
தீவிரவாதக் குழுக்கள் !
சலனப்படாமல், சத்தமாக உடனே
சொல்லி விடுகிறார்கள்,
தாக்குதலுக்கு நாங்கள் பொறுப்பேற்றுக் கொள்கிறோம் !

திண்ணையில் எழுதியது Friday October 21, 2005

பெனாசீர் படுகொலை செய்யப்பட்டதை பின்லாடனின் அல்கொய்தா பொறுப்பேற்றுக் கொண்டதாம், அதைப் படித்ததும், மீண்டும் நினைவுக்கு வந்தது..

பூக்களின் மவுனம்...

2007-12-20T18:40:00.000-08:00

இலவச உதவி எவரிடமும் கேட்காதே ...
இயற்கைச் சொல்லித்தரும் பாடம்,

கனியில் சுவை இல்லாது போனால் ?
அசையாது இருக்கும் மரம் செடிகள்
அகிலம் முழுவதும் பரவ, அவற்றின்
விதைப்பரவல் என்பது சாத்தியமா ?
கனியின் சுவையால் மரம் செடி கண்ட பலன்
எதுவுமில்லை, மறைமுகமாக
என் வித்தை விதைக்கும் உனக்கு என்
கைமாறு இதோ என் கனிகள் !
கைகண்ட பலன் விதைப்பரவலே.

வண்ணமும் மணமும் பெற்றுக் கொள்,
அருகில் வந்தால் இன்னும் கூட
பரிசு...!
தேனையும் உரிஞ்சலாம்,
தேன் ஈயே...!
இவற்றிற்கு உன் கால்மாறு
என் (மகரந்த) சேர்க்கைக்கு உதவுவது.

"உனக்கு உதவி தேவைப்படும் முன்
உதவுபவர்களுக்கு விருந்தை
தயாராக வை...!"

மென்மைப் பூக்களின் மேன்மை
அழகிலும் மணத்திலும் மயங்கி
வண்ண இதழ்களின் ஊடே
தேன் துளியைச் சுவைத்துக் கொண்டே
வண்டுகள் பாடும் ரீங்காரம்...
பூக்களின் மெளன மொழியை
புரிந்து கொள்பவர்களுக்கென
மொழிப்பெயர்த்துக் கொண்டே தான்
இருக்கின்றன...

எதற்கு காத்திருக்கிறேன் ?

2007-12-01T21:16:00.000-08:00

புள்ளிக்குள் அடங்கியாக புள்ளியாக மாறி
புள்ளையாய் மாற எப்போது காத்திருந்தேன் ?
கனநேரத்தில் காத்திருப்பின்
கனம் உடைந்து அப்பன்
உடலுக்குள் உயிராய் வந்த
தருணங்கள் என்று வந்தது?
விடையேதும் அறியாமல் சிந்துத்து
காத்திருந்திருக்கிறேன் !

கருவில் உருவாகி, ஒருவழி உலக வாசல்
ஒன்றில் இருந்து உதிக்கும் நேரம்
எதுவென்று தெரியாமல்
இருப்பை உணர்த்தி
உதைத்துக் கொண்டு காத்திருந்தேன் !

எந்த ஊர், எந்த நாட்டில்
என்று நான் புறப்பட்ட இடத்திற்கு
மீண்டு(ம்) செல்வேன் என்று
அறியாமல் காத்திருக்கிறேன்.

கனங்கள் எல்லாமே காத்திருப்பின்
கனங்களாகவே இருக்கிறது !
என்றிங்கு வாழ்ந்தேன் ?
எல்லா நேரமும் காத்திருக்கிறேன்.

எனக்கே என் காத்திருப்பின்
காலமும் நோக்கமும் தெரியாத போது,
எதற்காக காத்திருக்கிறேன்
என்று நினைக்கும் போது ?
எனக்காக காத்திருப்பவர்
என்று எவரும் இருக்க முடியுமா ?

கடக்கும் 'காலங்களைத்' தவிர

யாருக்காவும் யாரும், எதுவும்

காத்திருப்பதில்லை !

----
அன்புடன்,

கோவி.கண்ணன்

கண்டுகொண்டேன் கண்டுகொண்டேன் !

2007-11-18T06:10:00.000-08:00

கண்டுகொண்டேன் கண்டுகொண்டேன் !

நீ(ர்) ஊற்றாமல் வாடுகிறது
பூச்செடிகள்,

அணைக்க மறந்து போட்ட
விளக்குகள்,
போட மறந்த விளக்குகள்
எல்லாம் தன்னிலை
மறந்த நிலையில்.

முன்பெல்லாம்
அடிக்கடி பூ உதிர்க்கும்
சாமி படங்களும் பயத்துடன்
என்னை நினைத்து
அமைதி காக்கின்றன !

காயவைத்த காய்ந்துபோன
துணிகள், துவைக்கப்போட்டு
காய வைக்காமல் இருக்கும்
துணிகள் இன்னும் இடம்
மாறாமல் இருக்கிறது.

அமைதியாக பேசும்
தொலைக்காட்சி அணையா
விளக்காக ஆரவராம்
பண்ணிக் கொண்டிருக்கிறது

பழைய சோற்றை
பல ஆண்டுகளுக்கு
பிறகு தின்று பார்க்கிறேன் !

கழட்டிப் போட்ட
துணிகள் கவனம் பெறாமல்
குவிந்திருக்கிறது.

துடைப்பம் இருக்குமிடம்
மட்டும் தூசி இல்லாமல்
இருக்கிறது.

பாத்திரங்கள் விளக்கப்படாமலேயே
பல் இளிக்கிறது.
குளிர்சாதனப் பெட்டியில்
எல்லாம் 'உறைந்தே' இருக்கின்றன.

நீ இல்லாத உன்
இரண்டுவாரப் பயணத்தின்
முதல் மூன்றே நாளில் கண்டு
கொண்டேன்.

உன் தற்காலிக பிரிவால்,
வருந்தி இருக்கும் எனக்கு
தூக்கம் வரவேண்டுமே அதற்காக
மட்டும் அளவாக கொஞ்சம்
.
.
.
.
.
.
.
.
.
.
.
.
அடிக்கடி தொலை பேசு !

திகட்டலின் ஏக்கம் !

2007-11-14T22:13:00.001-08:00

நன்கு திகட்டிய உணவை
மற்றொரு நாள் சுவைக்க
எழும் ஏக்கத்தைபோல்,

புளித்துப் போனவை என்று
ஒதுக்கியவை கூட,
என்றோ ஒரு நாள் நினைவில்
இனிக்கத்தான் செய்கிறது !

இனி எதும் வேண்டாம் என்ற
வீராப்புகளை, உறுதிகளை
எடுக்கத் தூண்டுகின்ற உராய்வினால்
ஏற்பட்ட சிராய்ப்பின்,

குறுதி காய்ந்ததும்,
என்றோ ஒரு நாள் அதன் மேல்
அடிக்கும் மெல்லிய தென்றல்
காயங்களை வருடிவிட்டுச்
செல்கின்றன.

காயங்களின் அடையாளம் ?
வெறுப்பை மட்டுமா சுமக்கிறது ?
எண்ணிப்பார்த்தால் ஏமாற்றம் !

காயத்தளும்புகளின் மேல் ஒவ்வொரு
மெல்லிய வருடலும்
காயமற்ற காலங்களையும்
கிளறி காட்டிவிட

அதன் சிலிர்பலையில்
அதே திகட்டிய உணவை
மீண்டும் சுவைக்க
ஏங்குகிறது எண்ணங்கள் !

அழகு குறிப்புகள் [1]... !

2007-10-15T10:16:00.000-07:00

கண்ணாடிக் கூண்டுக்குள் கருநாகம்
படமெடுத்தால் பார்பதற்கு
பதைக்க வைக்கும் அழகோ அழகு !

சீறிவரும் காளையதன் திமிளை
சிலுப்பி ஓடிவரும் வீரம்
சேர்ந்து பார்தால் அழகு !

அடை மழைவிழுந்தும்
அசைந்து கொடுக்காமல் அசைபோடும்
எருமையின் பொறுமை அழகு !

சங்கிலியில் பிணைக்கப்பட்ட
குட்டி நாயின் நம்மைப் பார்த்த
குறைப்பொலியும் குறையில்லா அழகு !

சலங்கையின்றி சதிராட
சண்டித்தனம் செய்யாமல்
குதித்தாடும் குதிரை அழுகும் அழகு !

கூண்டுக்குள் அடைபட்ட
ஆத்திரத்தில் பச்சையாக அலகைபிளந்து
பேசும் பசும் பைங்கிளியின் குரலழகு !

சிறிய வாலை சிலிர்புடன் ஆட்டியபடி
தாய் ஆட்டின் மடியை
முட்டிக் குடிக்கும் குட்டியாடும் அழகு !

ஓடும் காலளவு நீரில்
ஆடாது அசையாது நீண்ட காலில்
ஒன்றை தூக்கி தவமிருக்கு கொக்குமழகு !

தெளிந்த நீரோடையில் குட்டி
மீன்களுடன் இறைதேடி வலம்வரும்
குரவை மீன்களின் அசைவுகள் அழகு !

அழகு குறிப்புகள் அவ்வப்போது தொடரும் ...

அன்புடன்,
கோவி.கண்ணன்

தன்நலமே பொதுநலம் ?

2007-09-09T21:22:00.000-07:00

தன்நலமே பொதுநலம் ?

கண்ணை மூடிக்கொண்ட வானத்தின்
நடுப்பொழுதில் விழித்துக் கொண்டது
சில நினைவுகள், எண்ணங்கள்.

மனிதர் தன்நலமிக்கவர்களா ?
நான் தன்நலன் மிக்கவனா ?
சில செயல்களைப் பார்த்தால்
அப்படித்தான் தெரிகிறதே ! என்று
உள்மனம் சொல்லியது.

இன்னும் யோசித்தேன்.
தவறுகளை மறைக்க நினைப்பது
தன்நலமா ?

இல்லையே, அவை
தமக்குத் தாமே, உள்ளத்துக்கு
செய்து கொள்ளும்
கேடுகள் என்றது ஆள்மனம் !

எப்படி ? எப்படி ? கேட்டேன் நான்.
உண்மைகளை மறைக்கலாம்,
தற்காக்கலாம், ஆனால்
தூயமனம் என்ற உள்ளுணர்வு
பழுதாகி இருப்பதை சிறிதேனும்
உணர்கிறோம் அல்லவா ?

உடல்சார்ந்த, இன்பம் சார்ந்த,
தம்மீது பழிச்சொல் விழாது தற்காப்பது
என்ற நலம் மட்டும்தான் தன்நலமா ?
மறுபடியும் எதிர்கேள்விகள் !

இல்லை அவை உண்மையாக இருக்க முடியாது
அவை தற்காலிக வடிகால்,
அதில் காயப்பாடுவது உள்மனமே
இரணம் இருந்தாலும்,
சொறியும் ஒரு சுகம் போல்
வெளிப்பகட்டில் ஆசை கொள்வது
இத்தகைய தன்நலம்.

உண்மையான தன்'நலம்' என்பது
உள்ளத் தூய்மையே ! இந்த
தன்நலத் தேடலில் இருக்கிறது...
அதைக் காப்பதன் பொருட்டில்
வாய்மை வழிநடப்பதில் இருக்கிறது
கூடவே பொதுநலமும் !

உள்ளத் தூய்மையான
தன்நலமே இறக்கும் தருவாயிலும்,
தாம் எவருக்கும் தீங்கு செய்யவில்லை,
நிம்மதியுடன் கண் மூடலாம்,
என்ற உணர்வை தரவல்லது.

இறுதியாக புரிந்த போது
தூங்கிப் போனேன் !

நொடிக்கவிதைகள் அருட்பெருங்கோவுக்கு போட்டியாக ! :)

2007-08-10T08:17:00.000-07:00

நொடிக்கவிதைகள் !

நொடிக்குள் பூகம்பம் நிகழும் ?
உன்னைப் பார்த்ததும் உணர்ந்தேன் !!

உன் தூண்டில் மீன் விழிகளில்
அகப்பட்டுக் கொண்டேன் நான் !

கன்னம் கூட இனிப்பறிந்தது
நீ தந்த 'இச்சால்'

நான் சுயநலக்காரன் ? உன்னைப் பார்த்த
அன்றே மறந்துவிட்டேன் என் சுயத்தை !

உன் இமைகள் அசைவின் ஒலியை
என் இதயம் கேட்பது எப்படி ?

முதல் அழு குரல்கள் !

2007-07-12T07:31:00.000-07:00

பிணம் தின்னிக் கழுகுகள்,
கொடிய விஷப்பாம்புகள்,
தந்திர நரிகள்,
இவைகளெல்லாம்
மனித உருவில் நடமாடுவதைப்
பார்க்கப் போகிறேனே !

கொலைவெறி கண்கள்,
கழுத்தை இறுக்கும் கரங்கள்,
வீசருவாள், வேள்கம்பு, விஷநாக்கு
நடமாடும் மனித மிருங்கங்கள்,

இவர்களின் சாதி (கெடு)நிழலும்,
மத (அவப்)பெயரும் இனி விழப்போவது,
சுவர்க்க கருவறை விட்டு

விட்டு வரும் என்மீது தானா ?
நரகத்தை அறிந்தும், கள்ளங்கபடம் அற்றக்
குழந்தைகளின் குரல்வலையில்
இருந்து முதல் அளறல்கள் தான் கேட்கிறது !
எந்த ஒரு மகப்பேறு அறையிலும் !

அப்பாவுக்கு அப்பாவாக ! இன்று தந்தையர் நன்நாள் !

2007-06-17T08:06:00.000-07:00

இன்றைக்கு தந்தையர் தினம். பெற்றோர் இருவரில் உயர்ந்தோர் யார் என்று சொல்லவே முடியாது. இந்த பதிவு...தந்தையின் மதிப்பை உணர்ந்தவர்களுக்கும்... தந்தையை இழந்து அவர்தம் நினைவை அசைபோட்டு நெகிழ்பவர்களுக்கும் சமர்பணம். இது இரண்டு ஆண்டுகளுக்கு முன்பு எழுதி...சிங்கை தமிழ்முரசில் வெளிவந்த ஒரு கவிதை(முயற்சி)

அப்பாவுக்கு அப்பாவாக !

இருபதை கடந்த இளைஞனாய் இருந்த நான்
இல்லறம்கான திருமணம் செய்து வாழ்தினாய் நீ !
இனிய இல்லறம் நடத்திய உனக்கு
இன்னொரு அறுபதாம் திருமணம் செய்து வாழ்துப் பெற்றேன் நான் !
நடந்த என்கால்கள் மிதிவண்டி பழக
மிதிவண்டி வாங்கி வந்தாய் நீ !
நடந்த உன்கால்கள் தடுக்கி விழாமல் இருக்க
ஊன்றுகோல் வாங்கி வந்தேன் நான் !

தேழனாய் மாறி பாலன் என்னுடன்
பம்பரம், கோலி விளையாடி மகிழ்ந்தாய் நீ !
தோழனாய் மாறி பழுத்த உன்னுடன்
பரமபதம், சோளி விளையாடி மகிழ்ந்தேன் நான் !

திருவிழாக்களுக்கும், கடைவீதிகளுக்கும்
அன்பாக தூக்கி சென்றாய் நீ !
திருக்கோவில்களுக்கும், கடற்கரைகளுக்கும்
அன்பாக அழைத்து சென்றேன் நான் !

அருகிலிருந்து அக்கறையாய் எனக்கு
அரிச்சுவடி சொல்லி கொடுத்தாய் நீ !
அருகிலிருந்து ஆர்வத்துடன் உனக்கு
அன்றாட செய்திகளை வாசித்தேன் நான் !

யானையாய் மாறி என்னை இடம் வலமாய்
தூக்கி சுமந்தது மகிழ்த்து, மகிழ்ந்தாய் நீ !
பூனையாய் மாறி உன்னை அங்கும் இங்கும்
தூக்கி அறைகுள் இடம் மாற்றி நெகிழ்ந்தேன் நான் !

தவழ்ந்தது போதும் என்று
தள்ளாடி தள்ளாடி எழுந்த நான்
தடுக்கி விழாமல் நடை பழக
தள்ளும் நடைவண்டி வாங்கினாய் நீ !

தளர்ந்ததால் உன் நடை
தள்ளாடி தள்ளாடி
தவழவும் நிலைக்கு வந்த போது
தள்ளும் சற்கர நாற்காலி வாங்கினேன் நான்!

எனக்கொரு குழந்தையாய் மாறினாய் நீ !
உனக்கொரு தந்தையாய் மாறிப் போனேன் நான் !

கருவறைவிட்டு வந்த என்னை,
ஆனந்த கண்ணீருடன், நெகிழ்ந்த இதயத்துடன்
கைகளில் ஏந்தி சென்றாய் நீ !

கல்லறைக்குள் விட்டு செல்ல உன்னை,
ஆ(ற்)றாத கண்ணீருடன், கனத்த இதயத்துடன்
தோள்களில் தூக்கி செல்கிறேன் நான் !

அன்புடன்
கோவி.கண்ணன்

இணைந்த கைகள் அந்திநேர தென்றல் காற்று....பாடலையும் கேட்டு மகிழுங்கள்

சாதி விந்து !

2007-06-15T00:15:00.000-07:00

நான் உயர்ந்தவன்,
நீ தாழ்ந்தவன் என்ற போராட்டம்
ஒரு புறம் நடந்து கொண்டிருக்க,
குழந்தை இல்லாதவருக்காக,

டெஸ்ட் டியூபில் சங்கமித்து
முத்தமிட வந்த
தாழ்ந்த சாதி விந்தை
உயர்சாதி கருமுட்டை
அன்பு மாறாமல்
ஏற்றுக் கொண்டது !

சாதிவேறுபாடுகள்
விந்திற்கோ, கருமுட்டைக்கோ
இல்லை !

அவை கூமுட்டைகளுக்கு மட்டுமே !

இந்த காலத்து பாரதிகள் !

2007-05-01T08:25:00.000-07:00

சாதிகள் இல்லையடி பாப்பா, மனு(வை)
தாழ்த்தி உயர்த்தி சொல்லல் பாவம் !
நீதி உயர்ந்தமதி கல்வி, இடஒதுக்கீடே
கூடாது என்பவர்கள் மேலோர் !

மரணமில்லா பெரியார் வாழ்வு !

2007-04-22T20:09:00.000-07:00

பெரியார் எப்போதும் வாழ்கிறார்,
இறப்பென்பது அவருக்கு இல்லவே
இல்லை !
ஆம் !!
அதை அவ்வப்போது மெய்பிக்கிறார்கள்,
சமூக வெறுப்பாளர்கள்,
பெரியார் சிலையை சேதப்படுத்திக் காட்டி !!!

நேற்றும் நாளையும் = இன்று ?

2007-04-08T18:13:00.000-07:00

இல்லாத ஒன்றை கற்பனை செய்ய முடியாத
மனம் செக்கு மாடாக சுற்றி வருகிறது.

நிகழ்காலத்தில் எதிர்காலத்தை நினைக்கிறேனா ?
கடந்த காலத்தை எதிர்காலத்துடன் இணைக்கிறேனா ?

உண்ணுவது, உறங்குவது என்பது போல்
அன்றாடம் செய்யும் வேலைகளை வைத்துப் பார்த்தால்
இன்றைய நாள் புதிதாக தெரியவில்லை.

நேற்றைய நினைவும், நாளைபற்றிய சிந்தனையும்
தவிர்த்து இன்றைக்கு என்ன செய்யப்போகிறேன் ?
என்று நினைக்கும் போது, இன்று செய்யப் போவதும்
என்றோ நினைத்ததாகவே இருக்கிறது.

இன்று என்பது,
(நேற்றைய) ஆடையை களைந்து,
(நாளைய) ஆடைய அணிவதற்குள்
இருக்கும் இடைப்பட்ட சிறிதளவு
நிர்வாண காலமாகவே இருக்கிறது.

புதிய தேசீய கீதம் !

2007-03-30T20:21:00.000-07:00

நாமெல்லாம் இந்தியர்கள்,
இந்தியர் என்றால் இந்துக்கள்,
'இந்தூ'ய தேசீ'யம் காப்போம்
இந்தியனாக இருப்போம்
இந்து கடைகளிலேயே பொருட்கள்
வாங்குவோம்,
பிச்சை எடுத்தாலும் மாதாகோவில்களிலோ,
தர்காக்களிலோ எடுப்பதை வெறுப்போம் !

பகவானுக்கு முன்னால்
இந்துக் கோவில்களின் வாசலில் மட்டும்
அமர்ந்து பிச்சை எடுப்போம்
நாமெல்லாம் வெறும் இந்தியர்கள் மட்டுமல்ல
இந்தியர்கள் என்றால் இந்துக்கள் !

பி.கு : அரைகுறையாக புரிந்து கொண்டு நண்பர்கள் உணர்ச்சி வசப்பட வேண்டாம். இப்பெல்லாம் தேசியம் பற்றி பேசுவதுதான் டிரெண்ட் அது என்ன மாதிரி தேசீயம் என்று சொல்ல முயன்றேன்.

காதல் கிறுக்ஸ் 1

2007-03-26T23:17:00.000-07:00

போதை பொருள் !

ஒரே ஒரு பார்வையில்
அப்படியே மயங்கினேன்,
போதைப் பொருள்
வைத்திருந்த குற்றத்திற்காக
உன்னை என்
இதய சிறையில்
அடைக்கிறேன் !

பின்குறிப்பு : அருட்பெருங்கோ மன்னிப்பாராக :)

உன்னால் தானே வாழ்கிறேன் !

2007-03-15T09:27:00.000-07:00

நீ அழும்போது அழுகிறேன்,
சிரிக்கும் போது சிரிக்கிறேன்.
உறவுகள் அனைத்தாகவும்
உன்னைத்தான் பார்க்கிறேன்
மூன்று வருடங்களாக
உன் முகம் பார்த்து மகிழ்கிறேன்
என்னை இயக்கும்
ரிமோட் கண்ட்ரோல் நீ !
உன் ரகசியங்கள் அனைத்தும்
எனக்கு சொல்கிறாய் !
உனக்கு மின்சாரம் இல்லை என்றால்
புழுக்கம் எனக்கும் தான் !
சனி, ஞாயிறு காணாமல்
உன்னை நினைத்து ஏங்குகிறேன் !
அடுத்த எபிசோடுக்கு ஆளாகப்
பறக்கிறேன் !
எப்போதும் முடியாதே எனது
அருமை மெகா சீரியலே !

பி.கு : சன் தொலைகாட்சி நேயர்களுக்கு காணிக்கை !

ஆதவனின் காலை வேளை !

2007-03-12T18:44:00.000-07:00

இலவச பள்ளி எழுச்சி இசையென
சோலை வனங்களில் பூபாளம் இசைத்தது
புல்லினம் !

தூக்கத்தின் அசதி,
கண்கள் சிவக்க விழித்துக் கொண்டது
விடியல் !

இன்று இதுபோதும் என்று
மின்சாரத்தை நிறுத்திக் கொண்டது
விண்மீன்கள் !

பொன் வண்ண கடல் குளியல்,
பனித்துளிக்குள் முகம் பார்த்து
அலங்கரித்து பொலிவு
பெற்றான் ஆதவன் !

காலை பசியின் உணவாக
கடற்கரை மணல் புட்டுக்களின்
ஈரங்களை உண்ணத் தொடங்கி,
பூக்களின் வியர்வையை
அருந்தியதும் உற்சாகமாக
அன்றைய வேலையை
ஆரம்பித்தான் ஆதவன் !

சு(ட்)டும் உண்மைகள் !

2007-03-11T22:01:00.000-07:00

பெண்ணியத்தை உருக்கி
கவிதைகளாக வார்த்துக் கொண்டிருந்தேன்,
சுட்டும் வார்த்தைகளின் இருப்பு
முற்றிலும் தீர்ந்த போது,
அடங்காத எண்ணத் தீயின் பசி
வார்த்தைகளுக்காக அலைந்தது !

இந்த பசியின் இடையே,
அமைதியைக் கெடுத்தது,
அடுப்பங்கரையின் மிக்ஸி சத்தம் !
நிறுத்தச் சொல்லி,
மனைவியின் கன்னத்தில்
இறங்கியது எனது வலது கை !

இட ஒதுக் கேடு ?

2007-03-09T09:10:00.000-08:00

ஊருக்குள் வெளியே
சேரி மட்டும் தான், என்றோ
கொடுத்து விட்டாய்
எமக்கு இட ஒதுக்கீடு !

நாங்கள் அறிவாளிகள் என
உன்வீட்டு கணக்குப் பாடம்
கூட்டல், கழித்தல், பெருக்கல்
முழுவதும் எமக்கு மட்டுமே !

என் இடதுகை கறந்த பாலை
உம் வலது கையால் வாங்கி கண்ணில்
ஒத்திக் கொண்டு தூய்மை என்கிறாய்
என்னைத் தொடாமலேயே !

அஸ்திவாரமாக இருந்தபோது
நான் சுமந்த கற்களை எந்த
கோவிலும் வேண்டாம்
என்று சொல்லவில்லை !

நான் உடைத்த பாறையில்
செய்த சிலை

தூரத்தில் இருந்தே

எம்மை கண்டு கொல்கிறது!

நான் வெட்டிய மரங்களில் செய்த
கதவுகள் கோவில் முன்
எம்மைக் கண்டதும்
சாத்திக் கொல்கின்றன !

கேட்காமல் அனைத்து ஒதுக்கேடும்
எனக்கு கொடுக்கிறாய்
கேட்கும் ஒன்றை ஏன் மறுக்கிறாய் ?

மங்கையர் நன்னாள் !

2007-03-07T17:37:00.000-08:00

தாய் மனைவி மகள் என
என் மூன்று காலங்களிலும் நீயே
நீக்கமற நிறைந்திருக்கிறாய் !

உன் கருவரையில் தான்
எம் குலதெய்வங்கள்
உயிரும் உடலும் பெறுகிறது !

இருவருக்காக உண்ணும் ஒருவர்
என்ற சிறப்புத் திறனும்
உன்னிடம் மட்டுமே இருக்கிறது !

அமுத சுரபியும், அட்சய பாத்திரமும்
வைத்துக்கொண்டு அள்ளி அள்ளிக் கொடுத்து
பசி பினி நோய் தீர்ப்பவள் நீ !

பேற்றிற்காக தன்குறியை அறுத்தும்
வயிற்றைக் கிழித்தும் நீ செய்யும்
தியாகம் போற்றதக்கது !

தன்னை மறந்து வாழ்நாள்
முழுதும் குடும்ப நலனுக்காக வாழும் நீ
பிறக்கும் போதே பேறு அடைந்தவள் !

உன் அருமையும், பெருமையும் அறிந்தே
நதியாய், நிலமாய், நிலவாய்
உன்வடிவம் உருவகமாக போற்றப்படுகிறது !

இறையென்ற சக்திக்கு நீயே சக்தி !
கறையொன்றும் இல்லைப் பெண்ணே !
எல்லாவற்றிலும் நீயே நிறை !

அனைத்து பெண்களுக்கும் மகளிர் நன்னாள் வாழ்த்துக்கள் !

அன்புடன்,

கோவி.கண்ணன்

வழிகளும் வலிகளும் !

2007-03-04T23:52:00.000-08:00

இந்த வழி ஆபத்தானதல்ல
இதோ பார் எனக்கு நன்றாகவே
இருக்கிறது என்றார்
செருப்பணிந்த ஒருவர் !

காலுக்குச் செருப்பின்றி நடக்கும் நான்
அதே வழியில் முட்கள் கிடந்து
தைப்பதை உணர்ந்தேன்.
தெரிந்தவற்றை எடுத்து அப்புறப் படுத்தினேன்,
தெரியாதவைகள் தைத்து உதிரம் கொட்டியது !

சிலவற்றை எடுத்து வீசும் போது
வழியை தூய்மை படுத்தியதாக
எண்ணத்தில் இருந்தாலும்,
இந்த வழியில்
இத்தனை முட்களும் கற்களுமா
நான் செருப்பணிய முடியுமா ?
செருப்பணிவது எனக்கு எட்டாக்கனி
என்று அவர் எள்ளி நகையாடினார்.

இந்த செருப்பே வேண்டாம் !
என நினைத்து
ஒன்று பாதையை மாற்ற வேண்டும் அல்லது
பாதையை தூய்மைப் படுத்த போராட வேண்டும்
என நினைத்துக் கொண்டிருக்கும் போது
மீண்டும் எதிர்பட்ட
செருப்பணிந்தவர் சொல்கிறார்
என்னளவில் இந்த வழி நல்வழியே !
இதில் மாற்றம் தேவை இல்லை !

எப்போதும்,
நன்மை - தீமை என்ற பகுப்பில்,
பார்வையில் காணாமல் போகிறது
உண்மைகள் !

சீசன் கவிதை : கருவை சுமந்து...!

2007-02-10T09:53:00.000-08:00

ஒருதலைக் காதலா இது ...?
என்னால் ஒப்புக் கொள்ள முடியவில்லை,
எதுவும் சேரவில்லை என்றால்,
எப்படி என் கவிதைகள்
உன் கருவை சுமக்கின்றன ?

என் கடித உறைகள் தொடர்ந்து கிழிவதால்,
நான் கருவடைவது வாடிக்கை ஆகிவிட்டதோ ?

நீ கிழித்துப் போடும் ஒவ்வொரு
கடிதமும் உன்னால் கருக்கலைப்பு
செய்யப் படுகிறது,

முழுதாக சுமக்க கொள்ளை ஆசை
என்றாவது ஒரு நாள் நீ உன்னை
மறக்கும் போது என் கரு மேலும் வளர்ந்து
நிச்சயம் பிரசவமாகும்.

அதுவரை,
தொடர்ந்து இதய மையால் என்பேனா
காகித புணர்வை தொடர்ந்து நடத்தும் !

பிகு : காதலர் தினத்துக்கு காதலர் காத்திருக்கலாம்... கவிதைகள் காத்திருக்குமா ?
பிதற்றல்களைத் தொடர்ந்து ... நான் இங்கே

நீ இல்லாத நான் !

2007-02-08T18:41:00.000-08:00

காத்துக் கொண்டிருந்த
கள்வனைப்போல
நீ சென்றதும்
துள்ளிக் குதித்தது என் தனிமை.

நீயில்லாத என்னை, எண்ணிப் பார்க்கிறேன்

பூட்டிய அறை முழுவதும்
பரவும் பூக்களின் வாசம் போல்
என்னைப் பற்றி நினைகிறேன்

பதார்த்தமிருக்கிறது,
பருகும் பானமும் இருக்கிறது,
மகிழ்வினால் பசிதான் இல்லை

தொலைக் காட்சித் தொடரில்
அழுதுவடியும் பெண்களைப் பார்த்து
சிரிக்கிறேன், உன்னிடம் நான்
அழுவதைவிட இதுபரவாயில்லை

குளியலறைச் சுவற்றில் ஸ்டிகர் பொட்டு
நகத்தால் சுரண்டி பெயர்த்தெரிகிறேன்
அங்கும் உன் நினைவு வரும் என்பதால்

மலரக் காத்திருக்கும் மொட்டைப் போல
எனக்குள் மகிழ்வாக இன்னொரு உலகம்
இருப்பதை நீ இருக்கும் போது உணரமுடியவில்லை

இன்று மட்டும்,
குளிர்சாதன பெட்டியும் கிறுகிறுப்பதேன் ?
கண்ணாடி கோப்பைகள் கண்ணடிப்பது ஏன் ?
வி.சி.டி ப்ளேயர் மட்டும் ஓடுவதேன் ?
நள்ளிரவும் பகலும் ஒன்றாக இருப்பதேன் ?

கன்னத்தில் கைவைத்து
இது எத்தனை நாளைக்கு என்று
ஏக்கப் பெருமூச்சுவிடுகிறேன்
அந்த கடைசி நேரக் கையசைப்புக் காட்சி
அடிக்கடி மகிழ்வைத் தடைசெய்கிறது
மகனே! இன்னும் ஒரு மாதத்திற்கு தான்
உன் ஆட்டம் என்று !

தனிமையில் இனிமை அருமை.

நள்ளிரவு தாண்டி நீ தொ(ல்)லைபேச
அத்தனை மகிழ்வும் அரை நொடியில்
மறைந்து போக, நீ பேசி முடிந்ததும்
மீண்டும் குளிர்சாதன பெட்டியை
கண்கள் அனிச்சையாகத் தேட
அந்த இரவு எனக்கு விழித்துக்கொண்டிருந்து

அப்படியே மயங்கி கிடக்கிறேன்,
கண்கள் திறக்க முயற்சிக்கவில்லை,
உன்னைப் பற்றிய நினைவுகளும்
கூட என்னை பயமுறுத்துகிறது

பின்குறிப்பு : சிறில் அலெக்ஸ் கவிதையைத் தொடர்ந்து ... ஒரு ஆறுதல் கவிதை இது இப்படித்தான் பெரும்பாலும் நடக்கிறது. :)

காவேரி பெண்ணே வா வா!

2007-02-04T23:21:00.000-08:00

புகுந்த வீடா ?
பிறந்த வீடா ?
தஞ்சை தரணியில் உன்
புணர்ச்சி வேண்டி
வானம் பார்த்த பூமி
முப்போகத்திற்கு வேண்டி
நிற்க,

நிறைமாத கர்பம் ஒவ்வொரு ஆண்டும்
வேண்டும் என
மேட்டுர் அணை வேண்டி நிற்க,

கையளவு நீராவது
கடல் மணலை நெனைக்காதா
என பூம்புகார் கடற்கரை காத்திருக்க,

வரம் தரும் சாமியாக,
நீதிதேவன் தீர்ப்பு
இன்னும் சில மணித்துளிகளில்...

வாழாவெட்டியாக பிறந்த வீட்டில்
சிறைபட்டுக் கிடக்கும் உன்னை
இன்றாவது உன்வீட்டார்
தடுத்துவைத்தற்காக சீர்கொடுத்து
சீராக உன்னை
புகுந்தவீட்டிற்கு அனுப்புவார்களா ?

காவேரி நீர் பங்கிடு குறித்து ஞாயம் வெற்றிபெற வேண்டுவோம், வாழ்த்துவோம் !

புது ப்ளாக்கர் - ஒரு எச்சரிக்கை !

2007-02-01T00:54:00.000-08:00

சாம பேத தான தண்டம் என்ற வகையில் புது பளாக்கர் கட்டாயமாக அனைவரையும் மாறச் சொல்கிறது. அது பரவாயில்லை.

பின்னூட்டம் (Post a Comments) ஒரு சில இடுகைகளுக்கு வேண்டாம் அல்லது போதும் நிறுத்தாலாம் என்று நினைத்து

Post Options
Reader Comments
Allow
Don't allow

இதில் கைவைத்து விட்டால் அதன் பிறகு அடுத்துப் போடும் இடுகைக்குக்கு நீங்கள் கமெண்ட் அனுமதித்தாலும், பின்னூட்டம் போட முயற்சிக்கும் போது ப்ளாக்கர் அலட்சியப்படுத்திவிட்டு மேலே உள்ள படம் தான் தெரியும். அதாவது

We're sorry, but we were unable to complete your request. என்று சொல்லும் !

என்ற செய்தி வரும்... அதன் பிறகு பின்னூட்ட அனுமதி இருந்தாலும் புது இடுகைகளுக்கும் யாரும் பின்னூட்டம் (Comments) போட முடியாது.

இது புது பளாக்கரின் குறைபாடு இன்னும் சரிசெய்யப்படவில்லை. இதற்கான தீர்வு பல்வேறு இணையப் பக்கங்களிலும் தேடிப்பார்த்தேன் இதுவரை குறைபாடு களையப்பட்டதாகச் சொல்லப்படவில்லை. மேலும் இதே போல் தொந்தரவு புது ப்ளாக்கரில் காணப்படுவதாக பல ஆங்கில ப்ளாக்கர்கள் தொடர்ந்து புகார் தெரிவிக்கின்றனர்.

நேற்று ஒரு இடுகைக்கை பின்னூட்டம் போதும் என்று முடிவெடுத்து நிறுத்தினேன். அதன் பிறகு புதிய இடுகைகளுக்கும் பின்னூட்டம் அனுமதித்தும் ... பின்னூட்டம் இட முடியவில்லை

:(

காலத்தின் களம் மாறிவிட்டது !

2007-01-28T17:09:00.000-08:00

கெட்டதுக்கும் காலம் உண்டு,
நல்லதுக்கும் காலம் உண்டு,
எல்லோருக்கும் காலம் உண்டு !

எழுச்சியும் வீழ்ச்சியும் காலத்திலுண்டு,
துக்கமும் மகிழ்ச்சியும் காலத்திலுண்டு,
ஹிட்லரும் ஹிரோசிமாவும் காலத்திலுண்டு
அலெக்சாண்டரும் நெப்போலியனும் காலத்திலுண்டு
ஏசுபிரான் முகமது நபி காலத்திலுண்டு
புத்தபிரான் சமணமுனி காலத்திலுண்டு
கண்ணபிரான் ஆதிசங்கரர் காலத்தில் உண்டு
அன்னை தெரசாவும், சாரதா தேவியும் காலத்திலுண்டு
உயர்ந்தவர்கள் தாழ்ந்ததுவும் காலத்திலுண்டு
தாழ்த்தபட்டவர்கள் உயர்ந்ததுவும் காலத்திலுண்டு
காலம் தவிர்த்து காலத்தின் நிகழ்வுகள் காலமாவதுண்டு !

காலம் ஊடே செல்வது வெறும் நிகழ்வுகள்
நல்லவை கெட்டவை என்பது காலத்துக்கு இல்லை
அது நம் கண்களுக்கும், மனத்துக்கும் மட்டுமே !

பி.கு: திடீர் பில்ட் அப் புது ப்ளக்கர் மாற்றியதற்காக :)

பிரிவும், பரிவும் ! (கவிதை)

2007-01-24T17:48:00.000-08:00

வார்த்தை வழுக்கலில் தடுமாறி
விழுந்தது நம் நெருக்கம்,
எவர் மீது தவறு என்று
ஆராய்ந்ததில் ஞாயங்களை
விட்டு விட்டு காரணங்களை
தேடி தன்னை சாந்தப்படுத்திக் கொண்டு
அமைதியாய் இறுகியது மனம் !

இறுகிய பாறையினுள்ளும்
வாழும் தேரையாய்
உன் நினைவுகள் !

நாட்கள் நகர,
ஈரம் காய்ந்து
நீர்த்துளிகள் எல்லாம்
ஆவியாகி மறைந்தது
என்று நினைத்திருந்த போது,
ஏதோ ஒரு பெரிய நிழல்
என் மீது மெதுவாக
வந்து விழுந்தது !
மேலே பார்த்தேன்
நீர்துளிகள் தூய்மையாக்கப்பட்டு
மேகங்களாக அவை
மாறியிருக்கின்றன
என்பதை உணர்ந்தேன் !

மழைத் துளிகளை பிரசவிக்க வேண்டி
ஈரக் காற்றுக்காக ஏங்கும்
மேகம் காற்றில் மெதுவாக
மிதந்து கொண்டிருந்த வேளையில்

வாடைக்காற்று என் இதயத்தில்
வீச உன் வாசல் தேடி
நடந்து கொண்டிருக்கும் போது,
அங்கும் மழையோ அதிசயித்தேன்,
கண்களின் ஓரத்தில் ஒரு
ஈரத் துளியுடன்
என்னை எதிர்கொண்டு
வந்துகொண்டிருக்கிறாய் நீ !

காற்றுள்ள போதே ...! (கவிதை)

2007-01-23T19:50:00.000-08:00

உலகம் கண்களை எப்போதும்
திறந்து வைத்துதான் இருக்கிறது,

ஏன் பிறந்தோம் என்று நினைக்கும் பிறப்புகளின்
கவனம் அதன் திறந்த கண்களால்
ஈர்க்கப்படுவதில்லை !

அதன் கண்கள்,
சில சிறப்பான பிறப்புகளின் பிறப்பு நாட்களை
சிறப்பு நாட்க்கள் ஆக்கி பார்கிறது !
சில சிறப்பான பிறப்புகளின் இறப்பு நாட்களை
நினைவு நாட்கள் ஆக்கிப் பார்க்கிறது !

பல பிறப்புகளின் இறப்புகள் இறுதிநாளில்
எல்லாவற்றையும் முடித்துக்கொள்கிறது !
சில இறப்புகள் மட்டுமே நினைவு நாட்களாகின்றன !

எந்த நொடியிலும் எதோ ஒன்று செய்கிறோம்,
அதில் 'ஏன் இதைச் செய்கிறோம்?'
என்ற கேள்வியுடன் தொடங்கினால்
நொடிகள் படிகள் ஆகும் !

மூச்சுக் காற்று உள்ள போதே...
முடிந்தவரை சிறப்புகளை உருவாக்கி
உயர முயற்சிப்போம், யார் கண்டது ?
நம் பிறப்பும் இறப்பும் பொருள் பொதிந்தாக
மாறக் கூடும் !

பின்குறிப்பு : அறிவுரை சொல்லும் கவிதைகள் என்றால் எனக்கு அலர்ஜி... இதில் அப்படி இருக்கிறதா என்று தெரியவில்லை ! :)

வேண்டுவது வரம் ...!(கவிதை)

2007-01-20T23:42:00.000-08:00

நாமக்கல் சிபியார் (வாங்கி வந்த சாபம்!), ஆத்திக எஸ்கே ஐயா (உன்னுடன் நானும்!) அவர்களை தொடர்ந்து கருக்கலைப்புக்கு எதிராக மேலும் ஒரு குரல் ....

வேண்டுவது வரம் ...!(கவிதை)

வெப்ப மூச்சுகளின் உரசலுக்கு
விளைந்ததுதான் என் குறையா ?
வெளியுலகம் காணும்முன்
வெந்து, நான் இறப்பது முறையா ?

கருவில் எருவாகும் என் நிலை,
அது உன் படைப்புத் தொழிலால்
என்போன்றோர் மேல் செய்யும்
ஒரு வன் கொலை !

கடவுளே, கருவரை(றை)யிலும் நான்
கட்டிக்கொள்ள உடைகொடு
பெண் சிசு இதுவென்று, குறி'பார்த்து
கருவறுக்கும் நிலையறு !

கடவுள் வரமென்று காத்திருப்பவர்
பலர் இருக்க, இது
வேண்டாத கர்பம் என்று
வேரறுப்பவரிடம் தோற்றுவைக்காதே !

கீ.வீரமணி ஐயாவுடன் நேரடி சந்திப்பு !

2007-01-11T19:24:00.000-08:00

11/ஜென/2007 அன்று (நேற்று) நானும் நண்பர் குழலியும் தி.க பொதுச்செயலாளர் மானமிகு கீ.வீரமணி ஐயாவை சந்தித்தோம். கடந்த சனிக்கிழமை நடந்த சமூகவியல் நிகழ்ச்சிக்கு பிறகு நண்பர் குழலி வீரமணி ஐயாவை சந்தித்தித்து பேச இருப்பதாக சொன்னார், என்னையும் அழைத்துச் செல்லுங்கள் என்றேன். அவருடைய நண்பர் திரு கலைச்செல்லவன் அவர்கள் சந்திப்புக்கு ஏற்பாடு செய்தார்.

மாலை 6.30 மணிவாக்கில் சந்திப்பதற்கு நேரம் ஒதுக்கி இருந்தார்கள்.அலுவலகத்தைவிட்டு கிளம்பும் போது 6 மணி ஆகியிருந்தது. நல்ல மழை. நண்பர் குழலி வாடகை காரில் சென்று கொண்டிருப்பதாக சொன்னார். போகும் போது என்னையும் பிக்-அப் செய்து கொள்ளுங்கள் என்றேன். வரும் வழியில் போக்குவரத்து நெரிசல் என அவர் வருவதற்குள் 6.30 மணி ஆகி இருந்தது வாடகை காரில் நானும் சேர்ந்து கொண்டேன். அதன் பிறகு மறுபடியும் போக்குவரத்து நெரிசல் ... ஒருவழியாக 7.00 மணிக்கு போய் சேர்ந்தோம்.

கி.வீரமணி ஐயா ஆடம்பர ஹோட்டலில் தங்கி இருக்கவில்லை. அப்பார்ட் மெண்ட் (அடுக்குமாடி) வீட்டில்தான் தங்கி இருந்தார். எளிமையான தோற்றம், கனிவான பார்வை, அன்பான உபசரிப்பு இவைதான் வீரமணி ஐயாவை சந்தித்தபோது உடனடியாக அவரிடம் உணர்ந்தேன். கை கூப்பி வணக்கம் செலுத்தி அருகில் இருந்த இருக்கையில் அமரச்சொன்னார்.

எந்த ஊர், எங்கு படித்தீர்கள், இங்கு எங்கே வேலை செய்கிறீர்கள், என்ன வேலை செய்கிறீர்கள் என்று இருவரிடமும் கேட்டார். சொன்னவற்றை பொறுமையாக கேட்டுக் கொண்டு. எங்கள் ஊரில் உள்ள தி.க முக்கியஸ்தர்களின் பெயரை சொன்னதும் சரியாக அவர்களைப் பற்றி மற்ற தகவல்களை எங்களுடன் பகிர்ந்து கொண்டார். நல்ல நினைவாற்றல்.

பின்பு இணையத்தில் தமிழ் புரட்சிபற்றி பேசினோம். நண்பர் குழலி பெரியாரின் புத்தகங்ளில் உள்ள செய்திகளை வெளியிட அனுமதியளிக்க வேண்டும் என்று அவரிடம் வேண்டுகோள் வைத்தார். பெரியாரின் கருத்துக்களைச் எடுத்துச் செல்ல என்ன உதவி வேண்டுமானலும் செய்கிறேன். பதிப்புரிமை சிக்கல் எதுவும் இல்லை. ஐயாவின் புத்தகங்களில் இருந்து எதைவேண்டுமானலும் இணையத்தில் போட்டுக் கொள்ளுங்கள் என்று அனுமதியளித்தார்.

இருவருக்கும் காபி கொடுத்தார்கள். பெரியாரின் அன்றைய கருத்துக்கள் தீர்கதரிசனமாக இன்றைக்கு எவ்வாறு நடைமுறையில் இருக்கிறது எனபதை விளக்கினார். பெரியார் படம் குறித்து தகவல்களை பகிர்ந்து கொண்டார். தன்னைப் பற்றி அதிகம் சொல்லவில்லை அவர் பேச்சு முழுவதும் பெரியாரே ஆக்கிரமித்து இருந்தார். அடுத்தக்கட்ட தலைவர்கள் யாரும் தன்னுடைய தலைவரை மீது இவ்வளவு ஈடுபாடு வைத்திருக்க மாட்டார்கள். கலைஞர் கூட அண்ணாவை பற்றி பேச வேண்டிய இடத்தில் தான் பேசுவார். ஆனால் வீரமணி ஐயாவின் எண்ணம் முழுதும் பெரியாரே நிறைந்திருக்கிறார் என்று பார்க்கும் போது அவர் பெரியார் மீது வைத்திருக்கும் பேரன்பும், நன்மதிப்பும் அவரின் தனிச்சிறப்பாக போற்றத்தக்கது.

பொதுவாக சிலவற்றை பேசும் போது நேரமின்மை என்று சிலர் சொல்கிறார்கள். நமக்கு இது கிடைத்தே ஆகவேண்டும் என்கிற போது எல்லோருக்கும் நேரம் கிடைக்கிறது. நாம் ஈடுபாடு காட்டதவைகளுக்குத்தான் நமக்கு நேரமில்லாமல் போவதாக சொல்கிறோம். சில செயல்களில் ஈடுபடும் போது அவற்றிற்குரிய முக்கியத்துவம் கொடுத்தால் அங்கு நேரமின்மை என்ற பேச்சுக்கே இடமில்லை. ஈடுபாடு இருக்கும் போது நேரம் தன்னால் கிடைக்கும் என்றார்.
முதல் சுயமரியாதை திருமணம் எங்கே எப்போது எவ்வாறு நடந்தது என்றெல்லாம் சொன்னார். அன்றைய காலகட்டத்தில் பலதாரம் திருமணம் சமூக பழக்கமாக இருந்தது. பெரியார் நடத்திய முதல் திருமணமே இருதார திருமணம். அன்றைக்கு அதை பெரியார் செய்து வைத்தாரே என்று இன்றைய காலகட்டத்தில் யாரும் இருதார திருமணத்தை நியாப்படுத்த முடியாது. சமூகம் மாறும் போது எந்த கருத்தானலும் மாறிக் கொண்டே வரும் என்றார்.

ஒரு மணி நேரத்திற்கும் மேலாக பேசினோம் உற்சாகமாக பேசினார் கொள்கைகள் என்பதை உடனடியாக யாரும் ஏற்றுக் கொள்ள மாட்டார்கள் படிப்படியாகத்தான் கொள்கைகள் ஏற்றுக் கொள்ளப்படுகின்றனர். 10 % முதல் 100 %வரை கொள்கை உடன்பாடு என்பதில் எவ்வளவு கருத்து சென்றுள்ளது பார்க்கும் போது இன்றைக்கு 10 % என்பது 20% ஆக மாறும் என்று நினைக்க வேண்டும் அளவைபார்க்கக் கூடாது. இதுபோல் நேர் எண்ணங்களை (பாசிடிவ் திங்கிங் ) இளைஞர்கள் வளர்த்துக் கொள்ள வேண்டும் என்று பேசினார்.

சமூகவியல் பற்றிய எங்களது வலைப்பதிவு ஆக்கங்களை அவரிடம் கொடுத்தோம்.. சிலவற்றை உடனே படித்தார் ... பின்பு புகைப்படம் எடுத்துக் கொண்டு விடைபெற்றோம். மிந்தூக்கி வரை வந்து வழியனுப்பினார். வெளியில் சென்றால் சாதாரண உடையில் (கருப்பு சட்டை இல்லாமல்) பொது போக்குவரவு வண்டிகளில் (பஸ் மற்றும் இலகு இரயிலில்) தான் செல்வாராம்.

தமிழகத்தையே புரட்டிப் போட்ட ஒரு கட்சி தலைவரின் எளிமையும், பண்பும், விருந்தோம்பலும் என்னை வியக்கவைத்தது

பின்குறிப்பு : இங்கும் நான் அரசியல் பற்றி எழுதவில்லை. ஒரு கட்சித் தலைவரை தமிழன் என்ற முறையில் சந்தித்துப் பேசி நெகிழ்ந்ததை பகிர்ந்து கொள்கிறேன். தயவு செய்து அரசியல் விமர்சனங்களை இங்கு கொண்டுவராதீர்கள்.

மனதின் பயணம் !(கவிதை)

2007-01-10T19:59:00.000-08:00

பிம்பங்களை தோற்றுவித்து
திணறி போகிறது மனம் !
எது உண்மை ?
எது பொய் ?
என்ற தேடலில் எப்போதுமே ஆராயாமல்,
ஆள்மனப் பகுப்பில்
வாய்மையை புதைத்து
உண்மையைவிட நன்மை
எது என்பதை மட்டும் பார்த்து
நினைப்பதிலேயே மனம்
திருப்தியுடன் நின்றுவிடுகிறது !

நன்மை என்று நினைத்ததெல்லாம்
எந்த நன்மையும் செய்துவிடவில்லை !
தீமை என்று நினைத்ததெல்லாம்
தீண்டி விடவும் வில்லை !
என்ற கடைசி நொடி சுயதரிசனத்தில்
வாய்மை எனும் கல்
ஆழ்மனக் கண்ணாடி மீது விழ
உடனே உடைந்து போகிறது பிம்பங்கள் !
மனம் தொலைந்து போகிறது !
எல்லாவற்றையும் அங்கேயே
போட்டுவிட்டு,
தொலைந்த மனதை தேடி
மற்றுமொரு பயணத்திற்கு
தயாராகிறது நித்ய ஜீவன் !

உலகநாயகனின் தசவதாரம் பகுதி 4: (காமடி)

2007-01-08T19:34:00.000-08:00

பகுதி 1*/*பகுதி 2*/*பகுதி 3*/*பகுதி 4

முதல் பகுதியில் இருந்து படித்தால் தான் புரியும் ... இது 4 ஆவது பகுதி !

படம் வெளிவருவதற்குள் கதை வரக்கூடாது என்று நீதி மன்றத்தில் பொது நலவழக்கில் தடை உத்தரவு வாங்கி இருந்ததால் கொஞ்சம் தாமதமாக இந்த பகுதி வந்திருக்கிறது :)

கமல் : ஆமாம் ரவி ... கோபி.அன்னான் மேக்கப் போடும் போது இப்ப கோபி.அன்னானுக்கு இருப்பதைவிட கொஞ்சம் நரைமுடி கம்மியாக வைத்து மேக்கப் போடனும், இது அந்த மாமிக்கு க்ளுவா அமைச்சிடுது.

ரவி : எனக்கு என்ன சொல்றதுன்னே தெரியலை ... உங்க ரேஞ்சை கற்பனைப் பண்ணவே முடியலை !

கமல் : உணர்ச்சி வசப்பாடாதிங்க ரவி..

ரவி : இன்னொரு பெக் போட்டுக்கட்டுமா ?

கமல் : போடுங்க... நீங்க தூங்காமல் இருக்கனும் அதான் முக்கியம்.. ம் அப்பறம் நம்ப மாமி அதே போல பாஞ்சாங்க ... ஆனால் இந்த தடவை அன்னான் வேசம் போட்ட தீவரவாதியின் காலை பாஞ்சி புடிச்சி கிறுகிறுன்னு சுத்தி சுவத்துல அடிக்கிறாங்க ... அவன் அப்படியே மயங்கி சரிஞ்சிடுறான்.. இங்கே ட்ரிபில் ஆக்ட்

ரவி : புரியுது கமல் சார் ... என்னையும் சிங்கீதம்.சினீவாஸ் ராவ் மாதிரி நெனெக்காதிங்க

கமல் : என்ன செய்றது பழக்க தோசம்

ரவி : அப்பறம் கதையை எப்படி வளர்க்கப் போறிங்க

கமல் : அதே போல் புஷ்தான் டெல்லி பார்க் ஷரடினில் தங்கியிருக்கிறான்னு நெனெச்சிக்கிட்டு ஹமாஸ் தீவிரவாதி ஒருத்தன் பாலஸ்தினாத்திலிருந்து அடுத்த ப்ளைட்டில் வந்து இறங்குகிறான்.

ரவி : அவனுக்கு யாரைப் போடலாம் ... ம் விருமாண்டியில் வில்லனா வர்றாரே பசுபதி அவுரப் போடலாமா ?

கமல் : நல்ல கதையைக் கெடுத்திங்க... இங்க அந்த பாலஸ்தின தீவிரவாதி வரப்போவது டோனிப் ப்ளையர் கெட்டப்பில்

ரவி : அப்ப அது உங்களுக்குத் தான் செட் ஆகும்

கமல் : இப்பதான் நான் சொல்லவந்ததை புரிஞ்சிக்கிட்டிங்க... இது 7 வது கெட்டப்

ரவி : இந்த முறை தீவிரவாதி எப்படி வருகிறான் ? சைரன் வச்ச காரா ?

கமல் : இல்லை தீவிரவாதி சாதாரண ஆளாகத்தான் வருகிறான் .. அப்பறம் ஹோட்டல் பாத்ருமில் தான் டோனிப் ப்ளையர் வேசம் போடுகிறான்

ரவி : அப்ப அங்கே இரண்டு வேசமா ?

கமல் : இல்லை .. ஒன்று தான் ... நேராக பாத்ரூமில் இருந்து வெளியே வருவதுபோல் ஷாட் வச்சிடுங்க... அவன் நேரா புஷ் தங்கியிருக்கிறதா நினைச்ச ரூமுக்குள் நுழைகிறான்

ரவி : இந்த முறை எப்படி வேசம் சரியாகப் போட்டாரா ?

கமல் : சரியாகப் போட்டார் அதிலும் ஒரு சஸ்பென்ஸ்

ரவி : ஆவலை அடக்க முடியவில்லை சொல்லுங்க ... மாமிதான் இந்த முறையும் கண்டுபிடித்தாரா ?

கமல் : இல்லை ... இந்த முறை நாடக நடிகரே கண்டுபிடித்துவிடுகிறார்

ரவி : ம் சொல்லுங்கள்

கமல் : அதாவது அந்த நாடக நடிகர் ... டோனி ப்ளையர் அருகில் சென்றதும் உடனே கண்டுபிடித்துவிடுகிறார்.. எப்படி என்றால் உயரம் .. டோனி ப்ளையர் நல்ல உயரம் ... போலி டோனி ப்ளையர் அவ்வளவு உயரம் இல்லை...! அருகில் சென்றதும் லாவகமாகப் பிடித்து ... பின்னால் தீவிரவாதியின் கைகளை மடக்குகிறார்... அப்போது மாமி சேலையில் ஒரு பகுதியை கிழித்து தீவிரவாதியின் கைகளை கட்ட உதவுகிறார்... இங்கே 4 வேசமும் ஒரே நேரத்தில் காட்டனும் .. அதாவது ஒரு நாடக நடிகர்... ஒரு ஏர்கோஸ்டஸ் மாமி.. அடிப்பட்டு கிடக்கிற போலி கோபி அன்னான் கடைசியாக ... போலி டோனி ப்ளையர்.

ரவி : நெனிச்சிப் பாக்கமுடியாத கற்பனை சார் உங்களுக்கு ... !

கமல் : இன்னும் 3 வேசம் பாக்கியிருக்கு...கிளைமாக்ஸ் பாக்கியிருக்கு

ரவி : இனி தூக்கம் வர்ராது கதை முடிவை நெருங்கிடுச்சி .. ம் சொல்லுங்க

கமல் : இதெல்லாத்தையும் டெல்லி போலிசாருக்கு போன் பண்ணி இரண்டு பேரும் சொல்லிவிடுகிறார்கள் டெல்லி பாதுகாப்பு அமைச்சர் நேரில் வருகிறார்... பாதுகாப்பு அமைச்சராக நான் .. 8 வது வேசம் !

ரவி : கெட்டது போங்கள் !

கமல் : ரவி என்ன சொல்றிங்க ...???

ரவி : மந்திரி வேசம் நெகடிவ் கேரக்டர் ஆச்சே !

கமல் : வேசம் எதுவாக இருந்தால் என்ன ... கேரக்டர் பேசப்படனும் ... அரசியல் வாதி வேசம் இதுவரை போட்டதில்லை ரவி

ரவி : ஹீரோ இசம் பேசுறவங்க இதை மறந்திடுறாங்க கமல் சார்... நீங்க ஒரு ஆள்தான் வெளிப்படையாக இருக்கிறீர்கள்

கமல் : இதுக்கு ஒரு பாட்டு வச்சிடுவோம் ... சரி கதைக்கு வருகிறேன்... தீவிரவாதிகளை மடக்கிய விசயம் எல்லா பத்திரிக்கைகளிலும் வருது.. இந்த செய்தியையும் போட்டோவையும் நாடக நடிகரோட அப்பா படித்திவிடுகிறார்... அவர் அடுத்த ட்ரைனை பிடித்து டெல்லி வருகிறார்.. அவசரத்தில் டிக்கெட் எடுக்காததால் டிக்கெட் செக்கரிடம் மாட்டுகிறார்.... டிக்கெட் செக்கரை எங்கோ பார்த்தது போல் இருக்கிறது... அப்பறம் விசாரித்ததில் அவர் தான் மூத்த மகன் என்று தெரிகிறது... அப்பாவும், டிக்கெட் செக்கரும் அந்த கடைசி இரண்டு வேசங்கள்.

ரவி : முடிவு எப்படி ?

கமல் : முடிவு சுபம் தான் எல்லோரும் சந்திக்கிறார்கள்... சின்ன வயசில் கொடைக்கானல் கூட்டிச் செல்லும் போது ஆற்றில் பஸ் கவிழ குழந்தைகள் பிரிந்து போனதாக சொல்கிறார்... அதில் மூவர் தீவிரவாதிகளாகவும், ஒரு பெண் ஏர்கோஸ்டஸ் மாமி, பாதுகாப்பு அமைச்சர், நாடக நடிகர், ஒரு CBI ஆபிஸர், ஒரு டிக்கட் செக்கர் (டிடிஆர்), ஒரு அப்பா என 8 வேடங்கள் சந்திக்கின்றன. தீவிரவாதிகள் எல்லோரும் தாங்கள் எல்லோரும் ஒரே குடும்பத்தைச் சேர்ந்தவர்கள் என்று தெரிய வந்ததும் திருந்துகிறார்கள்.

ரவி : அதோடு முடிந்ததா ?

கமல் : இல்லை ... இந்த தீவிரவாத முறியடிப்பையும், ஜார்ஜ் புஷ்ஷின் இமேஜைக் காப்பாற்றியதற்காகவும் ... அமெரிக்க அதிபர் அவர்கள் எல்லோரையும் நேரில் சந்தித்துவிருந்து கொடுக்க விரும்புகிறார்.. எல்லோரும் ஒரே ப்ளைட்டில் அமெரிக்க பறக்கிறார்கள்

ரவி : சூப்பர் கண்டிப்பாக இந்த படம் சிவாஜிக்கு நல்ல போட்டியாக முடியும்...

கமல் : எனக்கு போட்டி பிடிக்கும்...பொறமை மட்டும் பிடிக்காது

ரவி : அதை விடுங்க .. இன்னும் கதாநாயகிகளைப் பற்றி பேசவே இல்லையே

கமல் : நம்ம படத்தில் கதாநாய கிக்கா பஞ்சம் ...நாலு பேரைப் போட்டுவிடுவோம்

பெரியார் கண்ட வாழ்வியல் (சிங்கப்பூர் நிகழ்ச்சி)

2007-01-07T08:21:00.000-08:00

இனிய மாலைப் பொழுதில் பதிவர் நண்பர் குழலி அழைக்க பெரியார் கண்ட வாழ்வியல் குறித்து திராவிட கழக தலைவர் மானமிகு டாக்டர் கி.வீரமணி ஐயா அவர்களின் உரையை கேட்கும் நல்வாய்பு கிட்டியது.

பெரியாரையும், பெரியார் கொள்கைகளையும் கடவுள் மறுப்பு என்ற கால்கிலோ வெங்காயத்திலும், பார்பனீய எதிர்ப்பு என்ற வெள்ளைப் பூண்டுகளில் தினித்து அடைக்கப்பட்டதை மட்டுமே நுகர்ந்து வந்திருந்ததால் பெரியார் பற்றி வேறேதும் அறியாதவனாகவே இருந்தேன். வலைப்பதிவுகளைப் படிக்க தொடங்கியதும் பெரியார் பற்றிய மீள்வாசிப்பு அறிமுகம் ஆகியது. பெரியார் பற்றிய விமர்சனங்களை ஓரம் கட்டிவிட்டு பார்த்தபோது பெரிய அளவு பெரியாரின் கருத்துகளால் ஏற்பட்ட சமூக மாற்றத்தின் விளைவுகள் வியக்கத்தக்கதாகவே எனக்கு தெரிகிறது.

எப்பொருள் யார் யார் வாய் கேட்பினும் ... என்ற திருக்குறள் கருத்துக் கேட்ப சிலவற்றை ஆராய்ந்தால் நமது கருத்துக்களில் தெளிவு கிடைக்கும் என்ற அடிப்படையில் பெரியாரின் சிந்தனைகளை ஒருவர் ஆழ்ந்துபடித்தால் கண்டிப்பாக சமூக நீதியில் அவருடைய பெரும் பங்கு தெரியவரும்.
நிகழ்ச்சி 'காலத்தை வென்றவன்...நீ' என்ற பாடலுக்கு ஸ்ரீ வைஷ்ணவி மற்றும் ஸ்ரீ விசாலாட்சி என்ற இரண்டு மாணவிகளின் நடனத்துடன் இனிதே தொடங்கியது. நிகழ்ச்சியில் மேலும் சில மாணவிகளின் பாரதிதாசன் பாடல், திருக்குறள் வாசிப்பு என்ற சிறு நிகழ்ச்சிகளும் இடம் பெற்றன. திரு.எம் இலியாஸ் அவர்கள் சிங்கப்பூரில் பெரியார் சமூக சேவை மன்றத்தின் செயல்பாடுகள் குறித்தசெய்தியுடன் வரவேற்புரை ஆற்றினார். அதைத் தொடர்ந்து டாக்டர் சுப.திண்ணப்பன் மற்றும் கவிஞர் மா.அன்பழகன் பெரியார் கருத்துக்களில் வாழ்வியல் பற்றி அருமையாக உரையாற்றினார்கள்.

அனைவரும் எதிர்பார்புடன் இருந்த சிறப்புரையை வீரமணி ஐயா அவர்கள் சுமார் ஒரு மணிநேரம் ஆற்றினார்கள். ஐயாவின் வயது 74ஐ தாண்டியது என்று அறிந்தேன். தங்குதடையின்றி தண்ணீர் குடிக்காமல் ஐயா ஆற்றிய உரையை கேட்டவர்கள் மெய்மறந்தனர்.

லட்சியத்துக்கு போராடுபவர்கள் பலவித அவமானங்களைக் கடக்கவேண்டும் என்ற தந்தை பெரியாரின் செய்தியை பெரியாரின் பொதுவாழ்வில் அவருக்கு நேர்ந்த அவமான நிகழ்வுகள் (அழுகிய முட்டை வீச்சு) ஆகியவற்றை அவர் எவ்வாறு தாங்கிக் கொண்டு தொடர்ந்து முனைபாக செயலாற்றி மக்களை விழிப்புற வைத்தார் என்ற செய்தியை சொல்லி... வாழ்க்கையில் வெற்றி பெற நினைப்பவர்கள் அவமானங்களைக் கண்டு துவண்டுவிடக் கூடாது என்று மிகச் சிறப்பாகப் பேசினார்.
இலவசங்களை ஏற்றுக் கொண்டு சோம்பேறிகள் ஆகிவிடக் கூடாது... சகோதரத்துவம் மலர அனைவரம் சக மனிதனை நினைக்கவேண்டும். கும்பிடுதல் பற்றி அவருக்கே உரிய பாணியில் சுவையாக சொன்னார். அதாவது 'அந்த காலத்தில் ஒருவர் ஒருவரைப் பார்த்து கும்பிட்டால் அருகில் வராமல் அங்கேயே நில்' என்பதாகவும் இருந்திருக்கிறது. கும்பிடுவதன் பெருள் இன்றைக்கு அவ்வாறு இல்லாமல் தமிழர்களின் பண்பாடு என்ற நல்நிலையை அடைந்திருக்கிறது என்பதற்காக மகிழலாம்... இருந்தாலும் ஒருவரை ஒருவர் சந்திக்கும் போது கைகுலுக்கியாவது நல்லுறவை ஏற்படுத்திக் கொள்ளவேண்டும் என்றார்.

பெண்களின் முன்னேற்றம் ஒரு சமூகத்தின் முன்னேற்றமாக எவ்வாறு மாறி இருக்கிறது என்பதையும் பெண்கள் சமமாக நடத்தப்பட வேண்டும் என்று மிகத்தெளிவாக எடுத்துச் சொன்னார். புத்தியுடையவரே புத்தர் என்ற பெரியாரின் புத்தர்பற்றிய கருத்தை நிகழ்வுகளுடன் சுவையாக சொன்னார்.

நிகழ்ச்சிபற்றி மேலும் விரிவாக நண்பர் குழலி எழுதுவார்.

*******

எனக்கு புரிந்தவரை பெரியாரின் பகுத்தறிவு கொள்கைகள் முழுக்க முழுக்க வாழ்வியலுக்கானது என்பதை புரிந்து கொள்ளும் ஒரு நிகழ்ச்சியாக அது அமைந்தது.

வையத்துள் வாழ்வாங்கு வாழ்பவன் வானுரையும்
தெய்வத்துள் வைக்கப் படும்

என்ற திருக்குறளும் பல உண்மைகளைச் சொல்கிறது. அதாவாது கிடைத்த வாழ்கையை நமக்கும் அடுத்தவருக்கும் பயனுள்ளதாக ஆக்கிக் கொண்டாலே போதும் அவனே தெய்வமாக போற்றப்படுவான். பலனுக்காக மாட்டுத் தொழுவத்தில் மாடுடன் மாடாக அடிமைகளாக கட்டப்பட்டு... வாழ்க்கை தொலைத்த தலித்துகளுக்கு இறைவனைக் காட்டுவதால் அவர்களுக்கு எந்த பலனும் இல்லை. அவர்களுக்கு உணர்வூட்டி வாழ்வதற்கு கற்றுக் கொடுக்க வாழ்வியலே போதும். வாழ்கையில் அவர்களுக்கு சமூக நீதி கிடைத்து கல்வி கேள்விகளில் சமமாகும் போது ...அவர்கள் குடியிருக்க வீடு பெற்ற பிறகு ... அவர்களுக்கு எப்படி இறைவனை அடைந்து வீடு பேறு அடையலாம் என்பதைப் பற்றி போதிப்பது எளிது - இது என் கருத்து

பி.கு : இது பெரியார் மீதும் அவர்தம் கொள்கைகள் மீதும் மதிப்பு வைத்திருப்பவர்களுடன் பகிர்வதற்காகஏழுதப்பட்ட பதிவு. பெரியாரையோ, நிகழ்சியைப் பற்றியோ உங்கள் எதிர்வினைகள் இங்கு ஏற்றுக்கொள்ள முடியாது. கருத்து சுதந்திரம் என்பதற்கு இது அரசியல் பதிவு அல்ல. நடந்த ஒரு நிகழ்ச்சி அதைப்பற்றிய எனது பார்வை. புரிந்து கொள்ளுங்கள் !

கத்திக் கத்தி குத்துவசனம் ... (மின் அஞ்சலில் வந்தது)

2007-01-04T19:27:00.000-08:00

அனுப்பியவர் எனது நண்பர் JT Prabhu

சிட்டிசன்
அஜித் : அத்திப்பட்டின்னு ஒரு ஊர் இருந்துச்சே தெரியுமா ?
நீதிபதி : எருமைப்பட்டின்னு ஒரு ஊர் இருக்கு அது தெரியுமா உனக்கு ? தெரியாதுல்ல... அப்போ அதுக்கும் இதுக்கும் சரியாப் போச்சு !!!
அஜித் : ??? !!!

காக்க காக்க
ஜீவன் : அவளை தூக்குரண்டா... உனக்கு வலிக்கும்டா... அப்ப தெரியும்டா..
சூர்யா : எனக்கு வலிக்கிறது இருக்கடம்டா...உனக்கும் வலிக்கும்டா... ஏன்னா ... அவ 120 கிலோ

சந்திரமுகி
பிரபு : என்ன கொடுமை சரவணன் ?
சரவணன் : எது??? ஜோதிகாவை உனக்கு ஜோடியாகப் போட்டதா ?

ரமணா
விஜயகாந்த் : தமில்ல எனக்கு பிடிக்காத வார்த்தை 'மண்ணிப்பு'
மாணவர்கள் : சார் .. உங்க தமி(லே)ழே எல்லோரும் பிடிக்கலேங்கிறாங்க

திருமலை
விஜய் : யார்டா ... இங்கே அரசு ? நீ அரசா, நீ அரசா அல்லது நீ தான் அரசா ?
நான்காவது நபர் : இங்கெல்லாம் இல்லிங்க... குமுதம் ஆபிஸ் மவுண்ட் ரோட்டில் இருக்கு அங்கே போய் கேளுங்க

நாயகன்
கமல் : அவனை நிறுத்த சொல்லு நான் நிறுத்துறேன்
ட்ராபிக் போலிஸ் : அவன் போகும்போது பச்சை இப்போ சிவப்பு நிறுத்தலேன்னா நீதான் அடிபட்டு சாவே பரவாயில்லையா ?

முத்து ?
ரஜினி : நான் எப்ப வருவேன் ... எப்படி வருவேன்னு யாருக்கும் தெரியாது... வர வேண்டிய நேரத்தில கரெக்டா வந்துடுவேன்
கவுண்டர் : ஐஸ்வர்யாராயும் வருவாங்களாண்ணா ? நீயும் ஐஸ்வர்யா ராயை கூப்பிட்டு கூப்பிட்டு... பார்க்கிறே எப்படியும் வருவது மாதிரி தெரியல

சுள்ளான்
தனுஸ் : நான் சுள்ளான்டா ... சூடானா சுளுக்கெடுத்துடுவேன்
அடியாள் : அப்போ ஆறிப் போனா வழுக்கிவிழுந்துடுவியா ?

மாயாவி
சூர்யா : யார்ரா எனக்கு போட்டி ... எனக்கு யாரும் போட்டி இல்லே... நானும் யாருக்கும் போட்டி இல்லே
சத்யன் : அண்ணே இடுப்பில வேட்டி இல்ல ... அதப்பாருங்க மொதல்ல ...

படையப்பா
ரஜினி : அழகேசண்ணா ... பொண்ணுங்கள்ல மூணு வகை சாத்விகம், ப்ரஜோதகம், பயானகம்
செந்தில் : மொறைச்சிட்டு போனால் சாத்வீகம், செருப்பை கழட்டி காட்டினால் ப்ரஜோதகம், செருப்பால் கன்னத்தில் மாறி மாறி அறைஞ்சா பயானகம்னு சொல்றிங்களா ?

ரன்
அதுல்குல்கர்னி : எங்க ஆத்தா போட்ட சோத்துல ரத்தமில்லையா ?
விஜயன் : இது சாம்பார் சோறு ... ஆத்தா உப்பு போடவே மறந்துட்டு சப்புன்னு இருக்கு

வல்லவன்
சிம்பு : நீ அம்பானி பொண்ணைக் கட்டிக்கிட்டு பெரிய ஆளாகனும்னு ஆசைப்படுறே... நான் அம்பானியாவே ஆகனும்னு ஆசைப்படுகிறேன்
நண்பன் : டேய் ஓட்டவாயா... போர்ஜரி கேசுன்னு புடிச்சு உள்ள வச்சிடப்போறானுங்க ... பாத்துடா

தவசி
விஜயகாந்த் : புயல் அடிச்சி பொழைச்சவங்க கூட இருக்காங்களாம் ... ஆனா இந்த பூபதி அடிச்சி பொழைச்சவன் இல்லேடா
இளவரசு : பத்துப் பேரு செத்ததுக்கு யாரு காரணம்னு போலிஸ் அல்லாடிக்கிட்டு இருக்கு ...ஒப்புதல் வாக்குமூலம் கொடுக்கிறிங்களோ ... செல்போன் வீடியோ எடுத்து எவனாவது போட்டுக் கொடுத்துட்டா ... செக்சன் 302 தாண்டி

இந்த சிரிப்பு துணுக்குக்களை எழுதியவர் நம் பதிவர் வெட்டிப்பயல், நெட், மின் அஞ்சல் என பெரிய அளவில் உலா வருது

BAD Taste ?

2007-01-02T20:35:00.000-08:00

ஆங்கில தலைப்பு இடுகையில் வைத்தால் தமிழ் மணம் முகப்பில் தெரிய தடை என்று தமிழ்மணம் அறிவிக்குமா ? வேண்டாம் ! :) தலைப்புக்கு *வரி*ச் சலுகை தேவையில்லை !

குத்துப்பாட்டு இல்லாத படங்கள் மிக நல்ல படமாக இல்லாவிட்டால் திரையரங்கை விட்டு குத்தப்பட்டு துறத்தப்படுகின்றன. மக்கள் மன நிலை மோசமாகிவிட்டதா ?

குத்துப்பாட்டில் இரண்டுவகை இருக்கிறது. நலிந்தவர்கம் விரும்பிக் கேட்கும் *மன்மதராசா, வண்டார்குழலி* டைப் பாடல்கள். பணக்காரவர்கம் டிஸ்கோத்தே கிளப்புகளில் கேட்கும் *பொன்மேனி உருகுதே, ஆசை 100 வகை வாழ்வில் 100 சுவை வா?* டைப் பாடல்கள்.

எளியவர்களின் விருப்பம் பணக்காரவர்கத்துக்கு கீழானதாக தெரியும். எளியவர்களுக்கு பணக்காரவர்கத்தின் ஹோட்டல் நடனங்கள் கலாச்சார சீரழிவாக தெரியும்.

ஏழை எளியவர்கள் செய்யும் அலகு குத்துதல், சாமி ஆடுதல் ஆகியவற்றை சிலர் 'ஆண்டவன் வருத்திக் கொள்ளச் சொல்கிறானா ?' என்று பலர் கேள்வி எழுப்புவர். ஆனால் பணக்காரர்கள், நடுத்தர வர்கத்தினர் செய்யும் தீர்த்த யாத்திரையும், கட்டுக் கட்டாகா உண்டியலில் பணக்கட்டை போடுவதைப் பார்க்கும் ஏழை எளியவர்களும் பெருமூச்சுவிடுகின்றனர்.

டப்பாங்குத்து டான்சும், ரெக்கார்ட் டான்சும் ஏழைகளை மகிழ்விக்கிறதென்றால். ஹோட்டல்களில் நடத்தும் அரைகுறை நிர்வாண நடனமும் அதையே தானே பணக்கார வர்கத்துக்காக செய்கிறது ? ஏழைகளுக்கு மூன்று சீட்டு,பணக்காரர்களுக்கு குதிரை ரேசும். சூதாட்டமும் பொழுது போக்கு.

பீடி குடிப்பவனைப் பார்த்தால் சிகெரெட் பிடிப்பவனுக்கு இளப்பம். பாக்கெட் சாரயம் குடிப்பவனைப் பார்த்து ஓட்கா குடிப்பவனின் உளரல். கோவணம் கட்டி இருப்பவனைப் பார்த்து தொடை தெரிய அரைக்கல் டரவுசர் (shorts) போட்டிருப்பவனின் நையாண்டி. புகையிலை மெல்லுபவனைப் பார்த்து பான்பராக் மெல்பவரின் எச்சில் என ஒரு Taste மற்றொரு Tasteஐ நகைக்கிறது.

இறைவன் புகழ்பாட நேரமும் பொருளும் இருப்பவர்களுக்கு பக்தி இலக்கியம் மட்டுமே உயர்வாக தெரியும். இவற்றைப் பற்றி தெரியவாய்ப்பே இல்லாதவர்களான ஏதுமற்றவர்களின் பொழுது போக்காக சினிமாவும் கேலிக்க்கைகளும் உயர்வாக தெரியும் ! பெரும்பாலும் சினிமா ஊடகம் ஏழைகளை (சிறு துளி பெருவெள்ளம்) குறிவைத்தே பணக்காரர்களால் எடுக்கப்படுகிறது.

இது போல நிறைய சொல்லலாம் ...

இதில் ஏழைகளின் / நலிந்தவர்களின் பழக்கம் மட்டும் Bad Taste ? என்று சொல்வது சார்பு நிலைசார்ந்த ஒரு குற்றச் சாட்டு. பிட்பாக்கெட் அடிப்பவன் மட்டும் தானா திருடன் ? அன்னிய செலவானி மோசடி செய்பவனும், அரசாங்கத்தை ஏமாற்றும் ஹர்சத் மேத்தாக்களும் திருடன்கள் தான்.

கெட்ட வழக்கமாக பார்க்கப்படுவது எல்லாமே ஒரு பக்கமாக நின்று கொண்டு பார்பதால் தெரியும் ஒரு மாயத்தோற்றம். Taste பற்றிய நம் நிலைப்பாடு என்றைக்குமே நாம் சார்ந்துள்ள சமூகத்தைச் சேர்ந்ததாகவே பெரும்பாலும் இருக்கிறது.

அன்புடன்,

கோவி.கண்ணன்

தேன் கூடு போட்டி முடிவுகள் - எஸ்கே

2006-12-31T11:52:00.000-08:00

தேன்கூடு - தமிழோவியம் நடத்திய பதிவர்களுக்கான மாதாந்திர (இறுதி) போட்டியில்,

எனது கவிதை "குறும்பெல்லாம் குறும்பா?" [தேன்கூடு] வெற்றி பெற்று மூன்றாம் இடம் பிடித்துள்ளது. எனது குறும்பு கவிதையை படித்தும், பாராட்டியும், வாக்களித்த நண்பர்களுக்கு மனமார்ந்த நன்றியை தெரிவித்துக் கொள்கிறேன்.

மேலும் முதல் இரண்டு இடம் பிடித்த அரைபிளேடு, நாமக்கல் சிபி அவர்களுக்கும் பாராட்டுக்கள். போட்டியை நன்றாக நடத்தி பதிவர்களை ஊக்குவித்த தேன்கூடு - தமிழோவியம் நிர்வாகத்தினருக்கு நன்றி !

முருகன் அருள் முன்நிற்கும்

மீண்டும் நன்றி

- எஸ்கே (ஆத்திகம்)

பதிவர் நண்பர் எஸ்கே ஐயா அவர்களின் பதிவில் தொடர்ச்சியாக திருவெம்பாவை எழுதிவருவதால் இந்த பதிவு இங்கே இடம் பெறுகிறது !

இறுதி முடிவுகள்:

1 கல்யாணராமனுக்கு லவ்வு மேரேஜி - குறும்பான முழு நீள கதை - அரைபிளேட 52.2%
2 குறும்பு - நாமக்கல் சிபி 48.52%
12 குறும்பெல்லாம் குறும்பா? - sk 48.28%

வெற்றி பெற்ற மூவருக்கும் பாராட்டுக்கள் தெரிவித்துக் கொள்கிறேன், எனது போட்டிக்கதையை படித்து, பாராட்டி, வாக்களித்தவர்களுக்கு நன்றி !

- கோவி.கண்ணன்

ஈனஸ்வரம் ?

2006-12-28T21:32:00.000-08:00

தூரத்தில் கேட்டது ஓலம் ...
கூடவே கெட்ட கெட்ட வார்த்தைகள்
ஆபாச திட்டுக்கள்... கேட்ட
நானும், அருகில் இருந்தவர்களும்
காதுகளைப் பொத்திக் கொண்டோம் !

பக்கத்தில் இருந்த பண்பாளரிடம்,
மெதுவாக கேட்டேன் ஏனிந்த ஓலம் கேட்கிறது ?
ஏதாவது தெரியுமா ? சொல்லுங்கள் ! என்றேன் !
இது ஒரு ஈனஸ்வரம் ! எப்போதும் கேட்பதுதான் !
இவன் ஒழிந்துவிட்டால் அனைவருக்குமே நிம்மதி என்றார் !

காரணம் தெரிந்து கொள்ளும் ஆவலில்
ஓலக்குரலின் ஓசைவரும் இடம் நோக்கிச் சென்றேன்.
அருகில் சென்றதும் அதிர்ச்சி அடைந்தேன் !

அம்மனமாக்கப்பட்டு,
ஆற்றாமையால் அழுது கொண்டே
திட்டிக் கொண்டிருந்தான் மிதிபட்ட
ஒடுக்கப்பட்டவன் ஒருவன் !
அருவருப்பான தோற்றத்தில்
இருந்த அவனை பலர் மிதித்துக் கொண்டிருந்தனர் !

தைரியமாக பேசுகிறானே என்று அவர்கள்
அவனை மேலும் மேலும்
மிதித்துக் கொண்டிருந்தனர் !

அழும் குரலிலென்றாலும் ஆற்றாமையில்
இருந்த அவனிடம் நிதானம் இல்லை.
இருக்கவும் முடியாது !
கோபத்தில் அவன் வீசிய வார்த்தை வீச்சில்
அருவருப்பும் ஆபசமும் இருந்தாலும்
அருகில் நடந்ததைப் பார்த்த நான்
ஆடிப் போய்விட்டேன் !

அடிப்பவர்களை தடுக்கும் ஆற்றல் இல்லாததால்,
ஆற்றாமையில் திட்டுபவனை ஆற்றி
அடக்குவதற்கும் வழிதெரியாமல்
அமைதியாக விழித்துக் கொண்டிருந்தேன் !

தைரியமாக பேசுகிறானே என்று அவர்கள்,
'இழிபிறவியே ! ஒழிந்து போ !!', என்று
அலங்கார வார்த்தையால் அர்சித்துக் கொண்டே,
அவனை மேலும் மேலும் மிதித்துக் கொண்டிருந்தனர் !

அவனை அடித்துக் கொண்டே என்னையும்
ஏளனமாக பார்த்தவர்களைப் பார்த்து
நானும் முகம் சுளித்து திரும்பினேன் !

திரும்பிவரும் போது மனது சொல்லியது,
இவன் குரல் இன்னும் வேகமாக ஒலிக்க வேண்டும் !
இவன் தலைநிமிர்ந்து நிற்கும்வரை,
இவனை அடிப்பதை அவர்கள் நிறுத்தும்வரை,
இவனின் குரல் தான் இவனுக்கும் தைரியம் கொடுக்கிறது,
இவனைப் போன்றவர்களை மீட்க வைக்க முழங்குகிறது !
இன்னும் ஒலிக்கவேண்டும் !

இவன் சங்கிலிருந்து குரல் மேலும் பலமாக
எட்டு திக்கும் கேட்கும் வரை செல்ல வேண்டும் !
முன்பு ஈனஸ்வரமாக நான் உணர்ந்த குரல்,
இப்பொழுது சங்கு முழங்குவதாக உணர்த்துகிறது!

பின்குறிப்பு: திண்ணியத்தில் மலம் புகட்டப் பட்ட தலித்களுக்கு நேர்ந்த கொடுமைகளை முன்பு படித்து இருக்கிறேன், சமீபத்தில் ஐயா தருமி அவர்களின் LET US HIT THE NAILS RIGHT ON THEIR HEADS இந்த பதிவைப் படித்தேன். வலைப்பதிவுகளில் ஜாதி முறைகள் சரியே என்று சொல்லும் பதிவுகளைப் படித்தும் இருக்கிறேன். இவற்றினால் ஏற்பட்ட எண்ணங்களின் விளைவால் எழுந்தது இந்த புனைக் (புதுக்) கவிதை.

புத்தாண்டு வாழ்த்துக்கள் : வரும் புத்தாண்டில் நம் அனைவருக்குள்ளும் ஒற்றுமை ஓங்கி, தமிழ்வளர்சிக்கும், தமிழர் சமுதாய முன்னேற்றத்திற்கும் ஏற்றவிதமாக நம் எழுத்துக்களும், கருத்துக்களும் அமைந்து நம் அனைவருக்கும் பயனளிக்கட்டும் ! என்று பதிவர் அனைவரையும், மேலும் தமிழ்மணம், தேன் கூடு நிர்வாகிகளையும் வாழ்த்துகிறேன்.

தென்னை மரத்தில் தேள் கொட்டினால் ...

2006-12-27T06:16:00.000-08:00

ன்னு ஒரு பழமொழி சொல்லி பனை மரத்தில் நெறி கட்டும் என்று சொல்லுவார்கள். அதாவது எங்கேயே நடக்கிற நிகழ்வு மூலம் வேறு இடத்தில் பாதிப்பு இருக்கும். நேற்று (26/டிச/2006 கவனிக்க அதே டிச 26) தைவானில் நடந்த நிலநடுக்கம் சிங்கப்பூர், மலேசிய நாடுகளில் பாதிப்பை உண்டாக்கியிருக்கிறது. சிங்கப்பூரில் நிலநடுக்கம் உணரப் படவில்லை. ஆனால் கடல் வழியாக சென்ற அதிவேக இணைய தொடர்பு நுண்ணிலை கம்பிகள் ( பைபர் ஆப்டிக்ஸ்) நில நடுக்கத்தால் அறுந்துவிட்டதாக தகவல் கிடைத்திருக்கிறது. இதனால் சிங்கப்பூர், மலேசியா நாடுகளின் இணைய தொடர்பில் பெரும் பாதிப்பு ஏற்பட்டு அமெரிக்கா மற்றும் ஐரோப்பிய இணைய தளங்களுக்கு செல்ல முடியவில்லை.

சிங்டெல் நிறுவன தகவல் படி இணைப்பை சரிசெய்ய ஒரு வார காலம் கூட ஆகலாம் என்று சொல்லுகிறார்கள்.

வீட்டுக் கணனிகளுக்கு ஒர அளவுக்கு இணைப்பு கிடைக்கிறது. அதுவும் மிக குறைவான வேகத்தில் தான். ஜிமெயில் முற்றிலும் தொடர்பற்றதாக இருக்கிறது. அலுவலகங்களுக்கான இணைப்பில் தமிழ்மணத்தை கூட பார்க்க முடியவில்லை.

மற்றபடி ஆஸ்திரேலியா, ஹாங்காங் மற்றும் உள்ளூர் இணைய தளங்களுக்கு செல்வதில் குறைபாடு இல்லை.

ஆஸ்திரேலியா, ஹாங்காங் போன்ற நாடுகளில் தொலைவு ப்ராக்சி சர்வர் இருந்தால் pkblogs போல ஒன்று இருந்தால் ஒரு வார காலத்திற்கு ஓட்டலாம். pkblogs அலுவகத்தில் வேலை செய்யவில்லை.

இணையம் இல்லையென்றால் எல்லாமும் முடங்கும் என்ற நிலைதான் அலுவலகம் மற்றும் நிறுவனங்களுக்கு இப்போது எற்பட்டு உள்ளது.

கடன் பெற்றார் நெஞ்சம் (மகாலெட்சுமி)

2006-12-26T08:14:00.000-08:00

மகாலெட்சுமியின் தந்தையிடம் பேசிய போது, "என் மகளைப் படிக்கவைக்க கிடைக்கப் போகும் பணம் இனாமாக வேண்டாம் சார். கடனாக கிடைத்தால் போதும். இயன்ற அளவில் கொஞ்சம் கொஞ்சமாக கொடுத்து விடுகிறேன்" என்று சொன்னார். வறுமையிலும் தன்மானத்தோடு வாழ நினைக்கும் அந்த தமிழனைப் பற்றி பெருமைபட்டுக்கொண்டேன்.

ஆகவே, வலைப்பதியும் நண்பர்களே! கிடைத்த பணத்தை அவருக்கு வட்டி இல்லா கடனாக வழங்குவது என்று முடிவு செய்திருக்கிறேன். அவர் சிறுகச்சிறுக திரும்பக்கொடுத்த பின், உண்மையில் அவதிப்படும் வேறு யாருக்கேனும் அந்தே பணம் மீண்டும் உதவ பயன்படுத்திக்கொள்ளலாம் என்றும் எண்ணுகிறேன்.

மேலும் படிக்க ...

சிங்கப்பூரில் பொங்குதமிழ் பண்ணிசை பெருவிழா

2006-12-25T07:58:00.000-08:00

திரைகலைஞர்களின் கலைநிகழ்ச்சிகள், பட்டிமன்றங்கள், சொற்பொழிவுகள் அவ்வப்போது சிங்கப்பூரில் நடக்கும், இவற்றில் பலவற்றை பார்க்கச் சென்றுருக்கிறேன். முதல் முறையாக தமிழ் பண்ணிசை விழா சிங்கப்பூரில் நடப்பதாக நண்பர் குழலி பதிவிட்டு இருந்தார். அது பற்றிய செய்தி சிங்கை தமிழ் நாளிதழ் தமிழ்முரசுவிலும் வந்திருந்தது. தமிழ் இசை என்பதால் ஆர்வம் ஏற்பட சென்று வந்தேன்.

கிறிஸ்மஸ் தினத்தன்று ஏற்கனவே அறிவிக்கப்பட்டபடி சிங்கப்பூரில் பொங்குதமிழ் பண்ணிசை பெருவிழா தமிழக பா.ம.க தலைவரும், பொங்குதமிழ் பண்ணிசை மன்ற நிறுவனருமான மருத்துவர் ராமதாசு அவர்கள் தலைமையில் இனிதே நடந்தேறியது.

நிகழ்ச்சியை தொகுத்துவழங்கிய சிங்கப்பூர் வானொலியின் அறிவிப்பாளர் திருமதி. மீனாட்சி சபாபதி சங்கீத மூம்மூர்த்திகளான தியாகராஜர், சியாமா சாஸ்திரி, முத்துசாமி தீட்சிதர்கள் எவ்வாறு தமிழ் இசையிலிருந்து தெலுங்கு மற்றும் வடமொழி கீர்த்தனைகளை அமைத்து இந்திய இசைக்கு அடிகோலினார்கள் என்று ஆரம்பித்து அருமையான உரையுடன் தமிழ் இசை துடங்கியது.

திரை இசைப் பாடல்கள் மருந்துக் கூட இல்லாமல் முழுக்க முழுக்க தமிழ் பண்ணிசையுடன் தேவாரம் முதல் பாபநாசம் சிவன் முதலியோர் பாடல்களும், குனங்குடி மஸ்தான் சாகிபு அவர்களின் இஸ்லாமிய பாடல்களும் , வேதநாயகம் பிள்ளை , வீரமாமுனிவர் தேம்பாவனி என பல்சமய பாடல்களும் சிறப்பாக பாடப்பட்டன.

முத்தாய்ப்பாக துள்ளல் இசையுடன் கூடிய கிராமியப் பாடல்களுடன் இசை பாடல்கள் முடிவுற்றதும். நிகழ்ச்சி ஏற்பாட்டாளர்களும், திரு ஜி.கே மணி வரவேற்புரை, எம்.எல்.ஏ, திரு ஏ.கே.மூர்த்தி எம்.பி வழிமொழிய, இறுதியாக மருத்துவர் ராமதாசு தமிழிசைப் பற்றிய தலைமை உரை நிகழ்த்த விழா சிறப்புடன் முடிவுற்றது.

விழாவில் நான் குறையாக கண்டது,

முழுக்க முழுக்க டிசம்பர் கச்சேரிகளைப் போல் வாய்ப்பாட்டுகள் பாடியது கொஞ்சம் அயற்சியை கொடுத்தது. பாடிய பாடல்கள் நடனத்துக்கு ஏற்றப் பாடல்களாக இசையுடன் இருந்திருந்ததால் நாட்டிய நடனம் அதனுடன் இருந்திருந்தால் இன்னும் சிறப்பாக இருந்திருக்கும்.

கடைசியாக துள்ளல் இசை கிராமியப் பாடல்களை 30 நிமிடங்கள் பாடியதற்கு பதிலாக இடையிடையே பாடியிருந்தால் இசைவிழாவில் இடையிடையே பலர் எழுந்து சென்றதை குறைத்திருக்கலாம்.

நிறையாக பார்த்தது,

குத்தாட்டமோ, திரை கலைஞர்கள் ஒருவர் கூட இடம் பெறாத இந்த நிகழ்ச்சி 4 மணி நேரத்திற்கும் மேல் ஏற்பாட்டளர்கள் நடத்திக்காட்டியது ஒரு சாதனைதான்.

மேலும் இந்த இசைவிழா பற்றிய பல தகவல்களை நண்பர் குழலி என்னுடன் பகிர்ந்து கொண்டார் அவற்றை அவர் தனது பதிவில் எழுதுவார் என்று நினைக்கிறேன்.

படங்கள் உதவி : பதிவு நண்பர் குழலி

அழகுக்கு மறுபெயர் மெளனம் !

2006-12-21T20:58:00.000-08:00

அழகுக்கு மறுபெயர் மெளனம் !

ஆர்பரித்தலை விட மெளனம்
அழகாகப்படுகிறது எனக்கு !
தீண்டும் தென்றல்,
மழலையின் சிரிப்பு,
பொன்னிற விடியல்,
மஞ்சள்நிற மாலை,
அமைதியான நீரோடை,
மெலிதாக தழையசைத்து
தலையசைக்கும் பசுமை,
மரத்தடியில் உதிர்ந்து
இரைந்த பூக்கள், பூ
இதழ்மேல் பட்டாம்பூச்சி,
பகலில் பைங்கிளி,
இரவில் மின்மினி,
வண்ணம் கலைந்து
மறைந்து கொண்டிருக்கும் வானவில்,
அமைதியாக நகர்ந்து செல்லும் மேகங்கள்,
வயல்வெளிகளில் ஒற்றையடிப் பாதை,
இன்னும் எத்தனையோ
அழகு அத்தனைக்கும்
மறுபெயர் மெளனம் !

பின்னூட்டத்தில் படம் போடுவோம் வாங்க !

2006-12-17T17:42:00.000-08:00

சென்ற இடுகையில் பின்னூட்டத்தில் படம் போட முடியும் என்று சொல்லிவிட்டு இருந்தேன் எவ்வாறு என்று இப்போது பார்ப்போம்.

ப்ளாகர் உதவியில் டாக்குமண்ட் செய்யாமல் ப்ளாக்கர் விட்டு வைத்திருப்பது பின்னூட்டத்தை திருத்துதல் (comment edit) என்ற வழிமுறை.

அதற்கான வழிமுறை வா.மணிகண்டனின் பேசலாம் வலைப்பூவில் இருக்கிறது.

அதாவது பின்னூட்டம் மாற்றுதல் / திருத்துதல் (comment edit) என்ற வழிமுறை மூலம் பின்னூட்டத்தில் படங்களை இணைக்க முடியும்.

அது எவ்வாறு என்று பார்ப்போம்.

1. அவரவர்களுடைய வலைப்பூவில் இதைச் செய்வது மிகச் சுலபம். மற்றவர்களுடைய இடுகைகளில் போடும் பின்னூட்டத்திற்கு பின்னூட்டமிடுபவரே படங்களை இணைக்க முடியுமா ? என்று முயன்று பார்க்கவில்லை.

2. முதலில் படம் இணைக்கவேண்டிய பின்னூட்டத்தை வெளியிடவேண்டும். அல்லது ஏற்கனவே வெளியிடப்பட்ட பின்னூட்டத்திற்கு படம் இணைக்க விரும்பினால் அதிலில் இணைக்க முடியும். (படம் பார்க்க)

3. அவ்வாறு படம் இணைக்க விரும்பும் பின்னூட்டத்தில் (Dust Bin) நீக்குவதற்கான ஐகான் (குறியீட்டுப் படம்) இருக்கும். அது தெரியவில்லை என்றால் ப்ளாக்கரில் sign-in பண்ணவேண்டும். அவ்வாறு sign-in விட்டு refresh செய்தால். நீங்கள் ப்ளாகார் கணக்கின் உரிமையாளராக இருக்கும் பட்சத்தில் அனைத்து பின்னூட்டங்களிலும் (Dust Bin) நீக்குவதற்கான ஐகான் (குறியீட்டுப் படம்) இருக்கும். குறிப்பிட்ட பின்னூட்டத்தில் உள்ள ஐக்கானை எலிக்குட்டி இடது காதைத்திருக அழுத்தி (mouse left click) கிளிக்க வேண்டும்.

4. கிளிக்கிய உடன் பின்னூட்டம் மாற்றுதல் / திருத்துதல் (comment edit) பக்கத்திற்கு செல்லும் (படம் பார்க்க) . மேலே உரல் (url) முகவரியில் (Address) இருக்கும் delete-comment.g ? க்கு பதிலாக post-edit.g? தட்டச்சு Enter பட்டனை தட்டுங்கள்.

5. இப்பொழுது ப்ளாகரில் சரி செய்ய வேண்டிய பின்னூட்டம் காணப்படும். இங்கு பின்னூட்டத்தையும் சரி செய்யலாம், படங்களையும் இணைக்கலாம். அங்கு சென்றதும் படம் சேர்க்க உதவும் ஐகானை கிளிக் செய்து படத்தை இணையுங்கள். (படம் பார்க்க)

6. சேமிக்கப்பட்ட படங்களையோ அல்லது படங்களின் உரல் (URL) கொடுத்து, upload image பட்டனை அழுத்தவும், சரியாக upload ஆனதும். படம் இப்பொழுது முகப்பில் இப்பொழுது தெரியும் (படம் பார்க்க)

7. கடைசியாக Publish Post பட்டனை அழுத்த, பின்னூட்டத்திற்கு படம் சென்று விடும்.

8. படத்தைப் பார்பதற்கு இடுகைப் பக்கத்திற்கு சென்று பக்கத்தை refresh செய்தால் படம் இப்பொழுது பின்னூட்டத்தில்.

அவ்வளவு தான்.

பி.கு : படங்களை வெளியிடும் போது காப்புரிமை விதிகளையும், வெளியிடும் படங்களின் கண்ணியம் குறித்தும் நினைவு வைத்துக் கொள்ளவேண்டும், சிறிய படங்களாக மாற்றி போடுங்கள் பக்கம் refresh ஆகும் நேரம் குறையும்.

இனி பொன்ஸ் பக்கங்களில் யானை ஊர்வலங்களையும், நாமக்கல்லாரின் கலாய்த்தல் திணையில் கடி ஜோக்குகளை படத்துடன் பார்த்தால் என்னை அடிக்க ஓடி வராதீர்கள்.

பின்னூட்டத்தில் படம் போட்டுவது எப்படி ?

2006-12-17T06:39:00.000-08:00

வலைப்பூவில் படம் போடுவதே தகராறான, சவாலான விசயம். ஆனால் சில வழிமுறைகளை கையாண்டால் எல்லாம் எளிது. நம் நண்பர்கள் படம் மட்டுமில்லாது பாட்டுக்கள், ப்ளாஸ் இமேச்ஜ், அசைவு குறும்படங்கள் எல்லாமும் ஏற்றிவிடுகின்றனர். இவையெல்லாவற்றையும் பின்னூட்டத்திலும் கொண்டு வரமுடியும்.

படம் போடுவது என்பது 4 பக்கங்களில் சொல்லவேண்டியதை ஒரு சின்ன படத்தின் மூலம் சொல்லிவிட முடியும். காதைவிட கண்கள் செய்திகளை வேகமாக மூளைக்கு அனுப்பும்.

எனக்கு எழுதுவதிட்டு படம் காட்டுவது பிடித்தமான விளையாட்டு.

இடுகையில் படம் போட முடியும் ! பின்னூட்டத்தில் படம் போட முடியுமா ?
செந்தழலார் பதிவில் ஒரு அனானி கேட்டு இருந்தார். நான் அதுவரையில் பின்னூட்டத்தில் படம் யோசித்து இருந்ததில்லை.

பிறகு முயற்சித்துப் பார்கலாம் என்று முயன்றேன். என்ன ஆச்சரியம் பின்னூட்டத்தில் படம் போட முடிந்தது !

பின்னூட்டத்தில் படம் என்ன ?

பப்படமே போடலாம் !

எப்படி ?

அடுத்த பதிவில் ...

பெரியாரும் சிறியோர்களும்!

2006-12-13T09:44:00.000-08:00

ஆத்திகம் அறிவிழந்து மக்களின் வாழ்வியலை கேள்விக் குறி ஆக்கிய போதெல்லாம் சமணர், புத்தர் இன்னும் எண்ணற்றோர் வரிசையில் நாத்திக பெரியார்கள் தோன்றிதான் மக்களின் வாழ்வியலை செம்மை படுத்துகின்றனர். அது சிலகாலம் வரை பிரதிபளிக்கும் அதில் உள்ள நாத்திக கருத்துக்களை உள்ளடக்கிக் கொண்டு ஆஸ்திகம் வளரும் வளந்து வந்திருக்கிறது. புத்தர் சிலைகள் உடைந்த / உடைத்த இடத்தில் தான் பிள்ளையார் சிலைகள் வைக்கப்பட்டன.

மக்களை அடிமைபடுத்தியே வாழ்ந்துவரும் கூட்டம் ஆத்திகத்தின் அடித்தளத்தில் இருப்பதால் ஆன்மிக கருத்துக்களை இதிகாசங்களாக புனைந்து பூஜை புனஷ்காரமென அடிப்படை கருத்துக்களை புதைத்துவிட்டு மூடநம்பிக்கைகள் என்ற மரணகுழியில் மக்களை மறுபடியும் தள்ளிவிடுவர். இதுதான் காலம் காலமாக நடந்துவருகிறது. மூடநம்பிக்கை என்ற ஒன்றை மட்டும் சாடாமல், பெண் அடிமை என்ற பிற்போக்கு தனங்களையும் சாடி சமூக சீர்திருத்தங்களை செய்து தமிழக மக்களையே விழிப்புற செய்தவர் பெரியார். இது போன்று மக்கள் நல சீர்திருத்தங்களை செய்ததால் மகாத்மா காந்தி தேச பிதா என்று இந்திய குடிமக்களாலும், பெரியார் தந்தை பெரியார் என்று தமிழ்மக்களாலும் அழைக்கப்படுகிறார்.

பெரியாரின் கருத்துக்களை எல்லாம் நாத்திகம் என்று கூறி ஆத்திக கமண்டலத்தில் அடக்க முயன்று தோற்றுப் போனவர்கள் இன்று அவருக்கு அவமரியாதை செய்து தூண்டிவிட்டுப்பார்க்கிறார்கள். எனக்கெல்லாம் பெற்றோர் வழியாக பெரியார் நாத்திகர் என்று மட்டும் தான் போதிக்கப்பட்டு வந்தது. பெரியாரின் சீர்திருத்தமோ வெங்காயங்களோ எதுவோமே தெரிந்திருக்கவில்லை. பெரியாரை எதிர்ப்பவரகள் எதற்காக அவரை கண்மூடித்தனமாக எதிர்க்கிறார்கள் என்ற கேள்வியிலேயே பெரியாரைப் பற்றிய பெருமைகளை அறிந்து கொண்டேன். இவர்கள் எதிர்க்காவிட்டால் எனக்கும் பெரியாரைப் பற்றி தெரிந்திருக்காது.

பெரியாருக்கு முன்பு சாதி இந்துக்கள் மட்டுமே கோவிலுக்குள் நுழையமுடியும் அதுவும் தூர நின்றுதான் வணங்க முடியும் என்ற நிலை இருந்துவந்தது நமக்கு தெரியவருகிறது, ஆழ்வார்கள் தீண்டத்தகாத குலத்தில் பிறந்தார் என்று கூறி பெருமாள் பக்கத்தில் வைக்க தகுதியற்றது என்று சாதி வெறியில் சிலையை கூட ஆத்திக ஆதிக்க சக்திகள் தள்ளிவைத்ததெல்லாம் தாத்தாசாரியாரே நக்கீரனில் புட்டு புட்டு வைத்தார். பெரியார் சிலை ஸ்ரீரங்கத்தில் இந்துக்களை அவமானப்படுத்துகிறது என்று தாழ்த்தப்பட்ட / பிற்படுத்தப்பட்ட சாதாரண இந்துக்கள் சொல்லுவார்களா ? முடியாது ஏனென்றால் தாழ்த்தப்பட்ட இந்துக்களும் பிற்படுத்தப்பட்ட இந்துக்களும் கோவிலுக்குள் செல்ல முடிகிறதென்றால் அது பெரியார் இல்லாமல் பெருமாள் வந்தா அழைத்துச் சென்றார் ? பெரியார் சிலையை கோவிலுக்கு முன்பு வைப்பதுதான் சரியான இடம். பெரியாரால் தான் தங்களால் கோவிலுக்கு உள்ளே செல்ல முடிகிறதென்று பெரியார் சிலையை பார்க்கும் போதெல்லாம் அவர்கள் நன்றி கூர்ந்து நினைத்துக் கொண்டே கோவிலுக்குள் செல்லுவார்கள். பெரியார் மட்டும் இல்லையென்றால் கோவிலுக்குள் சென்றிருக்கவே முடியாது. தாழ்த்தப்பட்ட இந்துக்கள் அனைவருமே தீண்டாமை கொடுமையிலிருந்து மீள மாற்று மதத்தை நாடி போய் இந்து மதமே அழிந்திருக்கும். பெரியார் மறைமுகமாக இந்து மதத்திற்கு நன்மையே செய்திருக்கிறார். அதற்காக இந்துக்கள் அனைவருமே அவருக்கு நன்றி சொல்ல கடமைபட்டுள்ளோம்.

இதெல்லாம் இந்துத்துவா வாதிகளுக்கு தெரியாதா ? தெரியும் ! பெரியார் சிலை கோவிலுக்கு முன்பு இருந்தால் தீண்டாமை கொடுமைகளும், மனு(ஸ்மிருதி)அநீதி வரலாறுகள் மறைந்துவிடாதே என்ற ஆதங்கம் தான். எதுவும் செய்ய முடியாத ஆதங்கத்தில் தான் பெரியாரை மாமா வென்று மரியாதை குறைவாக சொல்லிப்பார்க்கிறார்கள். இவர்களால் மறைந்து கொண்டு மட்டும்தான் இவற்றைத்தான் செய்ய முடியும். இவர்களின் தன்னிலைமறந்த சொற்களால் தூண்டப்பட்டு கோபப்படுபவர்களால் மூலம் அடிவாங்குபவர்கள் எவரென்றால் அஞ்சுக்கும் பத்துக்கும் கடற்கரையில் உட்கார்ந்து தெவசத்துக்கு மந்திரம் சொல்லும் பூனூல் போட்ட ஏழை பிராமனர்தான்.

சிலைக்கு சக்தி உண்டென்று ஒப்புக் கொள்கிறீர்களா ? கேட்கிறார்கள் ! சிலைக்கு சக்தி இருக்கிறதோ இல்லை என்று கூட சொல்லாம் ஆனால் அதைவைத்து மரியாதை செய்பவர்களுக்கு சக்தி அதிகமாகவே உண்டு அதுதான் வண்முறையாக வெடிக்கிறது. எங்கள் முப்பாட்டனார் செய்த தீண்டாமைக்கு எங்களை ஏன் திட்டுகிறாய் ? நல்ல கேள்வி. இன்றை தேதியில் இணையத்தில் எழுதி கொண்டு இருக்கும் எவருக்கு பூனூல் அறுக்கப்பட்டது ? பெரியார் என்றால் ஏன் இன்னும் இந்த சிறியோர்கள் வண்மம் பாராட்டி அவப்பெயரும் அவமரியாதையும் செய்யவேண்டும் ?

காதல் வந்துடுச்சி ... (தே.கூ.போட்டி)

2006-12-08T09:03:00.000-08:00

லாரி வந்து நிற்கும் சத்தம், சன்னல் வழியாக பார்த்தேன் மாடியில் படித்துக் கொண்டிருந்த என் கவனம் சட்டென சிதற...

எதிர்த்தவிட்டுக்கு புதிதாக லாரி சாமாண்களுடன் வந்திருந்தது ஒரு குடும்பம், ஒரு தொப்பையுடன் சொட்டை தலை அப்பன் , அவர் மனைவி, அடுத்த முகூர்த்தத்திலேயே கல்யாணம் பண்ணிக் கொள்ளலாம் என்பது போல் அப்படி ஒரு மகள்.

'ஆக, நான் தேடிக் கொண்டிருந்த சிட்டுக் குருவி இதுதானோ ? ம் மடக்கிட வேண்டியதுதான்' மனதுக்குள் மல்லிகை பூ வாசததுடன் பூத்தது.

அன்று இரவு 'அவள் எனக்குத்தான், அதற்கு என்ன வேலையோ அதை ஆரம்பிச்சிட வேண்டியதுதான்' என்று பலவாறு நினைத்துக் கொண்டு புரண்டு படுத்திருந்தேன்.

மறுநாள் காலையில்,

"அம்மா, எதிர்த்தவீட்டில் யாரோ புதுசா குடிவந்திருக்காங்க போல..."

"ஒரு பொண்ணு வந்திருக்கா, பாத்திருப்பியே... அவள் இன்னிக்கு காலையில் கிளம்பி போய்டா ... பழைய ஊரில் ஒரு வாரம் ஹாஸ்டலில் தங்கிருந்திட்டு சனிக் கிழமைதான் வருவாளாம்"

'அம்மா நான் என்ன கேட்கப் போகிறேன் என்று எப்படி நினைத்தார்கள் ...?' நினைத்து

"ஹி ஹி அப்படியா ...? " அசடு வழிந்தேன்.

அன்று மாலை,

'மச்சி சூப்பர் பிகரு விட்டுக்குப் பக்கத்தில் குடி வந்திருக்கு' அடுத்தநாள் நண்பர்களிடம் சொன்னேன்

'டேய்... பொண்ணுங்களைப் பார்த்தாலே பொண்ணுமாதிரி வெட்கப் படுகிற நீ பிகருன்னு சொல்றது ஆச்சிரியமாக இருக்கிறது' காலாய்த்தார்கள், ரசித்தேன்

'அட... ஆயிரம் பொண்ணப் பார்த்தாலும், மனசுக்கு பிடிச்சிருந்தாதானே நினைக்க முடியும் ?, இது தான் நான் தேடிய ஆளாக இருக்கும்'

'ம்... ஒனக்கும் லவ் வந்திருக்கு.. நடத்துடா, ஆனா கர்சிப் இல்லாமல் போய்விடாதே ?'

'ஏன் ? ஏன் ? போனா என்னவாம் ?"

"சளி மூக்குன்னு சொல்லிடப் போவுது"

**************

அவுனுங்க சொல்றதிலும் விசயம் இருக்கு,

சின்ன வயசிலேர்ந்தே எனக்கு மூக்கில் சளி அவ்வப்போது கொட்டும், ஸ்கூல் படிக்கிற காலத்திலேர்ந்து பசங்க அதை வச்சு

'சளி மூக்கன் வரான்டா, டேய் சளி மூக்கு'
என்று கண்டபடி கிண்டல் செய்து வெறுப்பேற்றுவார்கள், அப்படிச் சொல்லும் போது கோபம் மண்டைக்கு ஏறி அடித்து துவைத்துவிடுவேன். ஆனாலும் அவுனுங்க இந்த நாள் வரைக்கும் திருந்தினதா தெரியலை.'செல்வா' என்கிற என்பெயரை அவர்கள் மறந்தும் நினைப்பதில்லை. அதும் பொண்ணுங்களுக்கு முன்னால் கிண்டல் பண்ணினால் தொலைந்தார்கள். பத்தடி தள்ளி நின்னு சொல்லிட்டு ஓடிடுவானுங்க.

இவனுங்கலெள்ளாம் எனக்கு ஒன்றாம் வகுப்பு படிக்கும் போதிலிருந்தே நண்பர்கள், நாங்கள் ஐந்தாம் வகுப்பு படித்தபோது

ப்ரியான்னு சப்இன்ஸ்பெக்டரோட பொண்னு, அதை எல்லா பசங்களும் 'தக்காளி, தக்காளி' ன்னு கூப்பிடுவாங்க, நானும் கூப்பிடுவேன்

எனென்றால் மதியம் சாப்பிட்ட பிறகு ப்ரியா தினமும் ஒரு தக்காளியை பச்சையாக தின்னும்.

ஒரு நாள் அது வீட்டுப்பாடம் எழுதாம வர டீச்சர் திட்டினாங்கன்னு ... அந்த பொண்ணு அழ,

இண்டர்வல் நான் 'டேய் அழுகின தக்காளிடா வருதுடா' என்று சொல்ல, அந்த பொண்ணுக்கு பயங்கர கோவம்

"டேய் மூக்குசளி, இருடா எங்க அப்பாகிட்ட சொல்றேன்" என்றது

எனக்கு பதிலுக்கு கோபம் வர, அவள் கன்னத்தில் பலம் கொண்ட மட்டும் அறைந்தேன், அதன் பிறகு என்னை டீச்சர் சாயங்காலம் வரைக்கும் பெஞ்சு மேல் நிறுத்தி வைத்திருந்தார். மறுநாள் நான் பயந்து கொண்டு பள்ளிக்கு மட்டம் போட்டுவிட்டேன்.

மறுநாள் அவளோட இன்ஸ்பெக்டர் அப்பா ஸ்கூலுக்கே வந்தாராம், டீச்சரிடம் பசங்கள ஒழுங்க நடந்துக்கச் சொல்லுங்க, கன்னத்தில் விரல்கள் பதிந்து அவளுக்கு ராத்திரியெல்லாம் ஜுரம், நாளைக்குத் தான் ஸ்கூலுக்கு வருவா' என்று சொல்லிவிட்டு சென்றார் என்று பசங்க சொன்னானுங்க.

டீச்சர் எனது பெற்றோருக்கு சொல்லி அனுப்ப, அடுத்த நாள் பலமான சாத்துப்படி எனக்கு வீட்டில் நடந்தது.

அதன் பிறகு பிரியாவும் நானும் பேசிக் கொள்வது இல்லை.

ஐந்தாம் வகுப்பு முடிந்தும் அவள் அப்பாவுக்கு மாற்றலாகி வேறு எதோ ஊருக்கு சென்றுவிட்டாள். இந்த நிகழ்ச்சி காலேஜ் வரை என்னுடன் படிக்கும் சில நண்பர்களுக்கு தெரியும். அவுனுங்கதான் அடிக்கடி அதைச் சொல்லி சொல்லி என்னை 'சளி மூக்கன்' என்று நிரந்தர பெயர் ஆக்கிவிட்டனர்.

**********

'டோய் என்னடா யோசிக்கிற...?'

'அடப்போடா, நான் அவளுக்கு எப்படி லவ் லெட்டர் கொடுக்கிறதுன்னு யோசிச்சிக் கிட்டே இருக்கிறேன்'

"டேய் மூக்கா, லவ் லெட்டரெல்லாம் பழைய டெரெண்ட், அதை விட்டு விட்டு வேறு எதாவது முயற்சிப் பண்ணு"

ஒரு வாரம் ஆகியது.

வைரமுத்துவின் காதல் பற்றிய கவிதைகள் நினைவுக்கு வந்தது. கண்ணாடி முன் நின்று எனக்குள்ளே சிரித்தேன்.

அன்று சனிக்கிழமை.

எதிர்த்தவீட்டை மாடியில் இருந்து எட்டி எட்டிப் பார்த்துக் கொண்டிருந்தேன். நான் சீரியஸ் ஆக படிப்பதாக அவ்வப்போது காஃபி, ஸ்னாக் உபசரிப்பு நடந்து கொண்டிருந்தது. அவளோட அம்மா மட்டும் மதியம் எங்க அம்மாகிட்ட வந்து எதோ பேசிவிட்டு சென்றதாக தெரிந்தது. அம்மாவிடம் 'அவ வீட்டில் தான் இருக்கிறாளா, கேட்கலாமா ... ம் ஹூம் வேண்டாம்... அப்பறம் வழியிரேன்னு நினச்சிடுவாங்க'

மாலை ஆறு மணிக்கு, கீழிருந்து குரல் எனக்கு மாடிக்கு கேட்டது

'செல்வா ! எதிர்த்த வீட்டில் போன் இன்னும் வரலையாம், அந்த அம்மா வந்து சொல்லிட்டுப் போச்சு ....அவுங்க வீட்டுப் பொண்ணு ஒரு போன் பண்ண நம்ம வீட்டுக்கு வரும், நான் பக்கத்து தெரு பிள்ளையார் கோவில் வரைக்கும் போய்டு வந்துவிடுகிறேன், ரொம்ப அசடு வழியாமல் ... நல்ல பிள்ளையாக ... அந்த பொண்ணு வந்தா நடந்துக்க ' என்று சொல்லிவிட்டு அம்மா கிளம்பி விட்டார்

'ஆக சரியான சந்தர்பம், இன்னிக்கு எப்படியாவது அவகிட்ட பேசி ப்ராகெட் போட வேண்டியதுதான், நம்ம வீட்டில் தான் காதல் கல்யாணத்துக்கு எதிர்ப்பு இல்லையே' என நினைத்துக் கொண்டே ... 'என்ன பேசலாம்' என்று பலவாறு சிந்தனையில் இருந்தேன்.

காலிங் பெல் அடித்தது, அதற்காகவே காத்திருந்த எனக்கு கோவில் மணி ஓசையாக கேட்டது. இறங்கி வந்து

கதவை திறந்தேன், சுடிதாரில் அவள்... வெட்கச் சிரிப்பு சிரித்தாள்

'படியும் போல' மனதுக்குள் நினைத்தேன், அடுத்த நொடியில்

"டேய் சளி மூக்கா... என்னைத் தெரியல... நான் தான் உன் கூட ஐந்தாம் வகுப்பு படித்த ப்ரியா' என்று ஒருவிரலைக் காட்டி கையை என்னை நோக்கிக் காட்டி கலகலவென சிரித்தாள்.

ஆச்சிரியத்தில் கண்களை விரித்த எனக்கு சுதாரிப்பதற்குள் நொடிகள் கடந்தது..

என்னைப் பார்த்து சிரித்தது வெட்கச் சிரிப்பல்ல... கேலிச் சிரிப்புதான் என்பதே.... சாமாளித்து அசடு வழிவதற்குள்

பதிலுக்கு காத்திராமல் டெலிபோனை எடுத்து டயல் செய்தவளின் முகத்தில் இன்னும் இருந்தது அந்த கேலிச் சிரிப்பு.

_______/\________

நேரில் வந்து சந்தித்த பதிவர் ! (நிறைவு பகுதி)

2006-12-06T01:15:00.000-08:00

பகுதி 1 பகுதி 2 பகுதி 3 பகுதி 4

விடாது கருப்பு ... ஆம் ! அவரின் குரல்...என்னிடம் ஏற்கனவே இருமுறை தொடர்பு கொண்டு என்பதிவை பற்றியும், சிங்கை தமிழ்முரசில் வெளிவந்த எனது கவிதையைப் பற்றிக் கருத்துக்கள் கூரிய குரல்தான் ... அதே குரல்.

'ம்.. எஸ்கே ஐயா பக்கத்தில் இருக்கார் ... ம் சொல்லுங்க சதீஷ் ! எப்ப வர்ரீங்க, நாங்க
லிட்டில் இந்தியாவில் வெயிட் பண்ணுகிறோம்'

'கண்ணன் ! அலுவலகத்தில் வேலை அதிகம் வருவது கஷ்டம்'

'பரவாயில்லை, அலுவலகம் முடிந்ததும் சாயங்காலம் 6 மணிக்கு மேல பாப்போமா ?'

'இல்லை கண்ணன், சாயங்காலம் கம்பெணி மீட்டிங் இருக்கு, வரமுடியாது, அவர்கிட்ட சொல்லுங்க'

ஏமாற்றமாக இருந்தது எனக்கு

'ஓகே, சரி அவருக்கிட்டேயே நீங்களே பேசிச் சொல்லிடுங்க' எஸ்கேவிடம் கைத் தொலைபேசியைக் கொடுத்தேன்

அவர் பேசினார். விடாது கருப்பு, எஸ்கேவிடமும் அதையே சொன்னதாக புரிந்தது,

அவரும் 'பரவாயில்லை அடுத்த முறை சந்திக்கிறேன் என்கிறீர்கள், சரி பார்கலாம்' என்று
சொல்லிவிட்டு நன்றி சொல்லிவிட்டு என்னிடம் கொடுத்தார்.

என்னிடம் கருப்பு 'எஸ்கேவையும், அவரது பதிவையும் எனக்கு(தனக்கு) ரொம்ப பிடித்துப் போனதாக அவரிடம் சொல்லுங்கள் என்றார்' அதை அப்படியே அவருடன் பேசிக் கொண்டே ரிபீட் செய்தேன்.

பின்பு 'போன் பண்ணி பேசியதற்கு நன்றி' நான் சொல்ல அவரும் "நன்றி கண்ணன்... அவருக்கும் என் நன்றியை சொல்லிடுங்க" என்பதுடன் அவருடன் தொலைபேசி தொடர்பு முடிந்தது.

பிறகு உடனே வாடகைக் கார் எடுத்து வீடு வந்து சேர்ந்தோம். மாலை 3.30 வீட்டிற்கு வந்ததும், 'உங்களுக்கு மஞ்சள் கலர் பிடிக்குமா ?' என்று கேட்டவர். புதிதாக ஒரு மஞ்சள் அரைக்கை சட்டையை என்னிடம் கொடுத்தார். ஏற்கனவே சோர்வாக இருந்தவர் மிகுந்த சோர்வுடன் காணப்பட்டார். காய்சல் வந்திருந்தது. படுக்கச் சொல்லிவிட்டு போர்வையை நன்கு போர்த்தி விட்டேன். பிறகு தெர்மா மீட்டரை வைத்து அவருக்கு சோதனை செய்து பார்த்ததில் 37.3 டிகிரி டெம்பரேச்சர் காட்டியது. தைலம் கேட்டார். பானடால் கேட்டார். கொடுத்தேன். போட்டுக் கொண்டார். அமிர்தாஞ்சனை கேட்டார். எடுத்துவந்து கொடுத்தேன். தேய்த்துக் கொண்டார். தேய்த்துவிடவா என்றேன். அவர் தயங்குவதற்குள் நானே அமிர்தாஞ்சனை கையில் எடுத்து இரண்டு கைகளாலும் நன்கு சூடுபரக்க தேய்த்து நெற்றியிலும் தோள்களிலும் தேய்த்துவிட்டேன். கால்களை பிடித்துவிட்டேன். தயங்கினாலும் நன்றி பெருக்குடன் பெருமிதமாக என்னைப் பார்த்தார். மருத்துவருக்கே மருத்துவாமா என்று கேட்பதைப் போல் இருந்தது. தூங்கச் சொல்லிவிட்டு நானும் ஓய்வெடுக்கச் சென்றேன். பின்பு எழுந்து

5 மணிக்கு மகளை அழைத்துவர சென்றேன். 10 நிமிடம் தான் பக்கத்தில் இருந்து அழைத்து வரவேண்டும். வந்ததும் மீண்டும் பார்த்தேன் நன்றாக அசந்து தூங்கிக் கொண்டிருந்தார். தொட்டுப் பார்த்தேன் காய்ச்சல் குறைந்திருந்தது. மாலை 6.30 வாக்கில் என் மனைவி வேலையில் இருந்து திரும்பி வந்தார் வரும் போது வெஜிடேரியன் பீசா பீசாஹட்டிலிருந்து வாங்கி வந்திருந்தார். அவரின் உடல் நிலைப்பற்றி தெரிவித்து இருந்ததால். வந்தவுடன் தேனிர் போட்டு வைத்துவிட்டு அவரை எழுப்பினோம். தேனிரையும் குடிக்கச் சொல்லிவிட்டு, ஒரு துண்டு பீசாவையும் பிடிவாதமாக சாப்பிடச் சொன்னோம். பின்பு என் மனைவி என்னிடம் 'அவரை முருகன் கோவிலுக்கு அழைத்துச் செல்லவில்லையா ?' என்று கேட்க அவர் பார்க்கவேண்டும் என்று முன்பு சொன்னது அப்போதுதான் எனக்கு ஞாபகம் வந்தது. 'மறந்துட்டேன், இப்போ எல்லோருமே போகலாம், முருகன் கோவிலைப் பார்த்துவிட்டால் போதும், தெம்பாகி கோவில் கோபுரத்தில் கூட ஏறிவிடுவார்' என்று அவரை கிண்டல் செய்ய. சிரித்துக் கொண்டே உடம்பு அசதியை பொருட்படுத்தாது போகலாம் என்றார்.

அப்போது மணி மாலை 7 ஆகி இருந்தது. பக்கத்தில் உள்ள ராமர் கோவிலுக்குச் சென்று விட்டு பின்பு முருகன் கோவிலுக்குச் செல்லாம் என்றேன். அங்கு புதிதாக அமைக்கப்பட்ட ஒரே கல்லிலான விஷ்வரூப ஆஞ்சினேயர் இருக்கும் என்பதால் ஆஞ்சநேயரைக் காட்டுவதற்காக அழைத்துச் சென்றேன். அரைமணி நேர வாடகைக் கார் பயணம். அந்த கோவிலில் ஆஞ்சநேயருடன், மற்ற சாமிகளும் இருந்தது, ராகவேந்திரா, சத்திய சாய் என எல்லாவற்றையும் தரிசித்தார். உற்சாகம் திரும்பி இருந்தது. பின்பு அங்கிருந்து டோபிகாட்டில் இருக்கும் முருகன் கோவிலுக்கு வந்தோம் அங்கு முருகன் தரிசனம். புகைப்படம் எல்லாம் முடிந்தது. இரவு 9 மணி நெருங்கியிருந்தது. அங்கிருந்து லிட்டில் இந்தியாவில் இருக்கும் முஸ்தபா செண்டருக்கு வந்தோம். வாங்கவேண்டியவைகளை ஒவ்வொரு இடமாக நான் காட்ட பொருமையாக பார்த்து பார்த்து வாங்கினார். அவருக்கு நினைவு பரிசாக கொடுக்க ஒரு பஞ்சு தங்கத்திலால் ஆன கண்ணாடி கியூபுக்குள் வைக்கப்பட்ட சிறிய பிள்ளையார் (கார் உள்ளே வைப்பது) வாங்கினோம். முடித்துக் கொண்டு அருகில் இருந்த ஆனந்தபவனுக்குச் சென்று காஃபி மட்டும் குடித்தோம். வெளியில் சாப்பிட்டால் உடல் நலம் மறுபடியும் பாதிக்கும் என்பதால் வீட்டிற்கு சென்று ரசம் செய்து சாப்பிடலாம் என்று வீட்டிற்கு திரும்பி வந்தோம். இரவு 11.30 ஆகி இருந்தது. மனைவி வேகமாக சமையலை முடிக்க நானும் உதவிக்கு மிளகு-தக்காளி ரசம் செய்தேன் , இவரும் ஊருக்குச் செல்வதற்கு முடிச்சுகளை தயார் செய்தார். இரவு 12 மணிக்கு மேல் சாப்பிட்டுவிட்டு, மறுநாள் அதிகாலையில் எழுந்து ஏர்போர்ட் செல்ல வேண்டுமென்பதால் அவரை பானடால் எடுத்துகச் சொல்லி படுக்க வைத்துவிட்டு எல்லோரும் தூங்கி விட்டோம்.

மறுநாள் அதிகாலை 5.30 மணிக்கே எழுந்து, அவரை எழுப்பி தயாராக சொல்லிவிட்டு, அவர் தயாரானதும். ப்ளைட்டில் காலை உணவு தருவார்கள் என்று அவர் சொன்னதால் காஃபி மட்டும் கொடுத்து, எல்லோரும் குடித்துவிட்டு கிளம்பினோம். நாங்கள் மூவரும் கதவுக்கு வெளியில் வந்துவிட்டோம். 'என்ன ஒன்னும் சொல்லாமல் சட்டுன்னு கிளம்பிட்டிங்க ?' என்றவர் ஒரு நிமிடம் வாருங்கள் என்றார். கையில் அமெரிக்க டாலர்கள் இருந்தது. பூஜை அரைக்குச் சென்றவர் டாலர்களை பூஜைதாம்பாளத்தில் வைத்து அருகில் அழைத்தார். தம்பதிகளாக மீண்டும் அவர் காலில் விழுந்து ஆசி பெறவே பணத்தை தாம்பாளத்துடன் கொடுத்தார். நன்றி சொல்லி வாங்கி பூஜை அரையில் வைத்துவிட்டு ஏர்போர்டுக்கு நான்கு பேரும் வாடகைக் காரில் ஏறினோம்.

அவருடன் சேர்ந்திருக்கும் கடைசி மணித்துளிகள் நெகிழ்வாகவே இருந்தது. மனைவியும், குழந்தையும் சிறிது நேரம் பேசிவிட்டு, பின்பு புகைப்படம் எடுத்துவீட்டு 'இந்தியாவுக்கு சொல்லும் போது மறக்காம வந்துட்டு போங்கப்பா' என்று சொல்லிவிட்டு கிளம்பினார்கள். நானும் அவரும் உணர்வு வெள்ளத்தில் இருந்தோம். கடைசி நிமிடம். 'எல்லாம் பேசிட்டோம், ரொம்பவே நிறைவாக இருந்தது, உங்கள் குடும்பத்தினருடமும், உங்களுடன் இருந்தது மறக்கமுடியாத நிகழ்வு' என்றார். 'பழகிய ஆறுமாதத்திற்குள் என்னைத் பார்க்க நீங்கள் ஓடோடி வந்தது என்னால் நினைத்துக் கூட பார்க்கமுடியாத நிகழ்வு, இந்த வயதில் வாழ்கையில் மிகுந்த அனுபமிக்கவராக இருப்பவர் நீங்கள், எது சரி தவறு என்று நிச்சயம் உணர்ந்தே செய்கிறீர்கள் என்று நினைக்கிறேன், அப்படி நான் நினைக்கும் போது உங்களுக்கென்றே அன்பு செலுத்தி அரவணைக்க நூற்றுக்கணக்கான உறவினர்கள், நண்பர்கள், உண்டு, பாசமுடன் பழக பெற்ற பிள்ளைகள் உண்டு, இவையெல்லாம் இருந்தும் எனது அன்பையும் உயர்வாக நினைத்து அமெரிக்காவில் இருந்து நேராக சென்னைக்கு மட்டுமே சென்று திரும்ப வேண்டியவர் நீங்கள் ... என்னையும் என் குடும்பத்தையும் பார்க்க மட்டுமே தனிப் பயணமாக சென்னையிலிருந்து சிங்கபூர் வந்து சந்தித்ததை என்னால் மிகச் சதாரணமாக எடுத்துக் கொள்ள முடியாது, தங்கள் அன்பிற்கு என்றென்றும் கடமைப் பட்டுள்ளேன்' என்றேன். அதன் பிறகு பேச்சு எழுவில்லை. கையை இருக பற்றிக் கொண்டார், கட்டி அணைத்துக் கொண்டார். விடைபெற்று உள்ளே செல்லும் இடத்திற்கு சென்றோம். பயனச்சீட்டை காவலர் சரி பார்த்து முடித்து அவர் கையில் திரும்ப கொடுத்தார், அருகில் தான் நின்று கொண்டிருந்தேன். எஸ்கே திரும்பி மறுபடியும் நெகிழ்வுடன் பார்த்தார் அந்த நொடியில் திரும்பவும் நான் அவரைக் கட்டிக் கொள்ள, கன்னத்தில் முத்தமிட்டார், உடனிடியாக நானும் முத்தமிட விடை கொடுத்துக் கொண்டோம்... உணர்வுகள் மனதை அழுத்த காவலரைக் கடந்து சென்றார். பார்த்துக் கொண்டிருந்தேன். 'நீங்கள் செல்லுங்கள், நீங்கள் சென்றால் தான் நான் உள்ளே செல்வேன்' என்றார். பை பை சொல்லிவிட்டு கண்ணுக்கு மறையும் வரை திரும்பிப் பார்த்துக் கொண்டே சென்றேன். அன்று அணிந்திருந்த சிவப்பு டீ சர்ட்டுடன் இருந்த அவரது உருவம் அன்று முழுவதும் கண்ணுக்குள் இருந்தது.

உறவினர்கள் விடைபெறும் போது, திரும்பவம் என்றாவது எதோ நிகழ்ச்சி, வைபவங்களில் நிச்சயம் அவர்களைப் பார்க்க முடியும். நண்பர்கள் பிரியும் போது அடுத்த சந்திப்பு எப்போது
என்று தெரியாது என்பதால் பிரிவின் போது எதையோ இழந்தது போன்று மனம் கனத்தது. இருந்தாலும். அன்பை முழுதுமாக இருவரும் வெளிப்படுத்திக் கொண்ட நினைவுகள், திரும்பவும் இவை நிகழும் என்று நினைத்து ஆறுதலடைய வைத்தது.

சக பதிவராக இருவருக்கும் பழக்கம் ஏற்பட்டு, தொலைபேசியில் பேச தொடங்கியபோது நட்பு என்று மாறியது. பின்பு குடும்பங்களைப் பற்றி பேசிப் பகிர்ந்ததில் உறவாக மாறியது. நேரில் வந்து பார்க்க வேண்டும் என்றார், வந்தார், இதுவரை முன் எப்போதும் பார்காத ஒருவரிடம் நமக்கு பொதுவாக இருக்கும் சங்கோஜ உணர்வு ஒரு துளிகூட இருவருக்கும் இல்லை. பலவருடங்களாக பழகியவர்கள் போல் மிகுந்த நெருக்கம் உள்ளவர்களாகத்தான் இருவருமே உணர்ந்தோம். நேரில் பார்த்து நெகிழ்ந்த போது உறவும் உன்னதம் ஆகியது.அவர் என்னுடன் இருந்த போதும், அதற்கு முன்பும், இன்றும், நானும் என் மனைவியும் அவருடன் பேசும் போது தனிப்பட்ட முறையில் அவரை அன்புடன் நாங்கள் உணர்ந்தே அழைப்பது 'அப்பா' என்ற உறவின் பெயரால்.

பின்குறிப்பு : இந்த தொடரை தொடர்ந்து படித்து பாராட்டிய சக நண்பர்களுக்கும், இதை தொடராக மகிழ்வுடன் எழுதி பதித்திக் கொள்ள காரணமாக இருந்த மருத்துவர் எஸ்கே ஐயா வுக்கும் நன்றி.

அக்குறும்பு ! (தே.கூ டிசம்பர் மாத போட்டி):

2006-12-05T01:55:00.000-08:00

அன்று மகனின் உடைகளை துவைக்கப் போடும் போது பாக்கெட்டில் சிகரெட் தூள்கள். அதிர்ந்தாள்

'என் பையனுக்கா சிகெரெட் பழக்கம் ?' நம்ப முடியாதவாளாக யோசித்துக் கொண்டிருந்தாள்

நம்ம குடும்பத்தில் யாரும் புகைப்பிடிப்பவர்களே இல்லையே, இவனுக்கு எப்படி அதுவும் காலேஜ் பைனல் இயர் படிக்கிற பையன் படிப்பில் கவனத்தை சிதறவிட்டுவிடுவானோ ? என்று நினைத்தவளாக,

சரி இப்போதைக்கு விட்டுவிடுவோம், இது தொடர்ந்தால் கணவரிடம் சொல்ல வேண்டியதுதான் என்று நினைத்தபடி பெரிது படுத்தாமல் விட்டுவிட்டாள்.

மற்றொருநாள்,
இரவு 1 மணி வரைக்கும் வராதவன் பின் பூனைபோல் வீட்டிற்கு வந்தவன் சாப்பாடு எதும் வேண்டாமென்று சட்டென்று மாடிக்கு சென்று படுத்துவிட்டான்,

மறுநாள் காலையில்

"அம்மா, காஃபி கொடேன் ... ஒரே தலைவலி" என்று அருகில் வந்து சொன்னவனிடமிருந்து எஞ்சியிருந்த மதுவாடை நேற்றய தாமத வருகையை சொல்லாமல் சொன்னது

சற்று அதிர்ந்தாலும் எதையும் காட்டிக் கொள்ளாமல் காஃபி எடுத்து வந்து தருவதாக சொல்லி சென்றுவிட்டாள்.

அதிர்ச்சியை வெளிக்காட்டாதவாறு அவரிடம் சொல்லி கண்டிக்கச் சொல்லனும், என்று நினைத்தவள்... அன்று மாலை அவன் வீடு திரும்பும் முன் கணவரிடம் சொல்ல ஆரம்பித்தாள்

"என்னங்க, உங்க பையனுக்கு புது புது வேண்டாத பழக்கமெல்லாம் வந்திருக்கு"

சற்றென்று நிமிர்ந்தபடி கேட்டார் கணவர்

"என்னம்மா சொல்ற, நம்ம பையனுக்கா ?"

"ஆமாங்க, அன்னிக்கு பாக்கெட்டில் சிகெரெட் தூள்கள் இருந்தது, அனேகமாக புகைப்பிடிக்க ஆரம்பித்துவிட்டான் என்று நினைக்கிறேன்"

"ஹூம்" என்று பெருமூச்சி விட்டார்

"அப்பறம் நண்பரோட அக்கா கல்யாணத்துக்குப் போனவன், நேற்று இரவு தண்ணி அடிச்சிட்டு வந்துருப்பான் போல், காலையில் வாயிலிருந்து மது வாடை"

"ஹூம் ... அதுவேறயா ?" ஆழமாக பெருமூச்சி விட்டார்

"நீங்க தான் என்ன ஏதுன்னு கேட்கனும், எனக்கு இதெல்லாம் நேர முகத்தைப் பார்த்து கேட்க என்னவோ போல இருக்கு, இந்த வருசம் அவன் காலேஜ் நல்ல படியாக முடிக்கனும் அதான் கவலையாக இருக்கு "

"சரி கவலைப்படாதே, அவன் வரட்டும் விசாரிக்கிறேன்"

அவன் வந்தான், சிறிது நேரம் கழித்து அவனை அருகில் அழைத்தார்.

"தம்பி, எதோ புது கெட்டப் பழக்கம் எல்லாம் வந்திருக்காமே"

தலையை தொங்கப்போட்டுக் கொண்டான்

""
"இந்த வயசில பசங்க செய்கிறதுதான், ஆனால் அளவோடு நிறுத்திக்கனும்"

""

"அதுக்காக அப்பாவே பர்மிசன் கொடுத்துட்டார் என்று ஆட்டம் போட்டால் உன் எதிர்காலம் தான் பாதிக்கும், நீ அறிவுள்ளவன் நல்லா படிக்கிறவன் புரியும் என்று நினைக்கிறேன்"

தயக்கமாக

"புரியுதுப்பா" என்று அவரை கட்டிக் கொண்டான்

அதன் பிறகு அவன் மேலே சென்றதும் அதற்கெனவே காத்திருந்து போல்

"என்னங்க பையனை கண்டிக்கிறேன் என்று சொல்லிட்டு..." நிறுத்துவதற்குள்

"பாரும்மா, நாம ரொம்ப கண்டிப்பாக இருந்தால், நாம இல்லாத போது அதை மீற வேண்டும் என்ற எண்ணமே இந்த வயசு பசங்களுக்கு ஏற்படும்"

"என்னமோ சொல்லுங்க"

"முதலில் சந்தர்பம் கிடைக்கும் போது தப்பு பண்ணுவார்கள், ரொம்ப ப்ரசர் கொடுத்தால் அப்பறம் சந்தர்பம் கிடைத்தால் மிஸ் பண்ணாமல் அதையே செய்வார்கள்"

""

"ரொம்ப கண்டிச்சா பழக்கம் அதிகம் ஆகிடும், இல்லையென்றால் மன உளைச்சல் அதிகமாகிடும்"

"ஹூம்"

"கவலைப்படாதே, நானும் இப்படித்தான் இருந்தேன் ... பொறுப்பை உணர்ந்தால் எந்த கெட்டப் பழக்கமும் தொடராது... சொல்லி இருக்கிறேன்"

""

"வாலிப வயசில் எல்லாவற்றையும் தெரிந்து கொள்ள ஒரு ஆவல் இருக்கும், அதைத்தான் அவன் செய்திருக்கிறான்"

"உங்கள மாதிரின்னு நீங்களே சொல்லிட்டிங்க... ஹூம் இனி நான் என்னத்தச் சொல்ல ..."

"பெற்றவர்கள் நாம் தான் எடுத்துச் சொல்லி அளவோடு இருக்கச் சொல்லனும், அதுக்காக கூட உட்கார்ந்து ஊற்றிக் கொடுப்பதும், நெருப்பு பற்றவைத்து விடுவதும் தவறு"

மறுபடியும் ஒரு நீண்ட பெருமூச்சுடன் இருவரும் மவுனமாகி அவரவர் வேலையை பார்க்க ஆரம்பித்தார்கள்.

பின்குறிப்பு : என்ன அக்குறும்பா இருக்கு கதையில்(?) 'குறும்பையே' காணுமே ?
ஹலோ ! காலேஜ் படிக்கிறப்ப, தண்ணி அடிக்கிறது, தம் அடிக்கிறது, சைட் அடிக்கிறது, முதல் காட்சி பார்க்கிறது - இது எல்லாம் குறும்பு இல்லாமல் வேறு என்னவாம் ?
:):)

நேரில் வந்து சந்தித்த பதிவர் (பகுதி 4) !

2006-12-04T18:04:00.000-08:00

நேரில் வந்து சந்தித்த பதிவர் பகுதி 1 பகுதி 2 பகுதி 3

ஏற்கனவே புகைப்படம் கட்டுமாணத்துறை வலைப்பதிவில் பார்த்து இருந்ததால் சாலைக்கு அந்த பக்க்கம் இருந்தே இவர்தான் 'வடுவூர் குமார்' என்று கண்டுகொண்டேன். சாலையைக் கடந்து அருகில் சென்றோம். நானும் எஸ்கேவும் வடுவூர் குமாரை அதிக நேரம் முழிக்கவிடாமல் எங்களை அறிமுகப்படுத்திக் கொண்டோம். வடூவூரார் 6 அடியோ அல்லது அதற்கு மேலோ நல்ல உயரம். கூடவே இருந்த வடுவூராரின் நண்பர் விடைபெறவே, நாங்கள் மூவரும் பக்கத்தில் இருந்த ஆனந்த பவன் உணவகத்துக்குள் நுழைந்தோம். வடுவூரார் சற்றுமுன்பு தான் சாப்பிட்டதாக சொல்ல நானும் எஸ்கேவும் காஃபி மட்டும் சாப்பிட்டோம்.

வடுவூரார் தனைப்பற்றியும் தன் குடும்பம் பற்றி குறிப்பிட்டார் ... கூடவே வேறு வெளிநாட்டில் வேலைக்கு முயற்சிப்பதாக சொன்னார். மூவரின் வலைப்பதிவுகளை பற்றி சிறிது நேரம் பேச்சு நடந்தது. மூவரும் புகைப்படம் எடுத்துக் கொண்டவுடன் அந்த அரை மணிக்கும் குறைவான சந்திப்பு முடிவுக்கு வர ... விடை பெற்றோம். அதன்பிறகு பாபா படம் அன்று மாலையோ அல்லது மறுநாளோ தருவதாக சொன்ன Tushiv கடைக்குச் சென்றோம் மணி இரவு 8.30 தாண்டி இருந்ததால் கடை மூடி இருந்தது... அங்கிருந்து சற்று தொலைவில் இருந்த முஸ்தபா செண்டருக்கு சென்றோம். அந்த கடையின் அளவும், மலை போல் இருந்த விற்பனைப் பொருள்களையும் பார்த்த எஸ்கே பிரமாண்டமாக இருப்பதாக சொன்னார். அன்று பொருள்கள் எதுவும் வாங்கவில்லை. மறுநாள் அங்கு வர இருப்பதால் மறுநாள் வாங்கிக் கொள்ளலாம் என்று வாங்க வேண்டிய பொருள்களின் இருப்பிடத்தை மட்டும் பார்த்து வைத்துக் கொண்டு வெளியில் வந்தோம். அருகில் இருந்த ஆனந்த பவனுக்குள் நுழைந்து எதாவது டிபன் சாப்பிடலாம் என்று நுழைந்தோம், பின்பு வீட்டில் உணவு இருக்கும் என்பதால் பாகற்காய் சிப்ஸ் பாக்கெட் ஒன்றும் காஃபி ஆர்டர் செய்துவிட்டு, பாகற்காய் சிப்ஸ் பாக்கெட்டை வாங்கிக் கொண்டோம். வெளியில் வந்ததும் தான் தெரிந்தது காஃபியை ஆர்டர் பண்ணி, வாங்கிக் குடிக்காமல் ஞாபக மறதியாக வெளியில் வந்ததோம் என்பதே.

பிறகு வாடகைக் கார் பயணம் இரவு 10 மணிக்கு வீட்டிற்கு வந்ததும் தயிர்சாதம், ரசம், சாம்பார் சாப்பாடு முடிந்தது. பின்பு சிறிது தரையில் எல்லோரும் அமர்ந்து நேரம் என்மகள், மனைவி, எஸ்கே முவரும் பரமபதம் போன்று ஒரு விளையாட்டை விளையாட... எனது 6 வயது மகள் இருவரையும் நன்றாக ஏமாற்றி.. அவளுக்கு சாதகமாக விதிகளை மாற்றி மாற்றி ஆட... நான் ரசித்தபடி அவரது மடியில் தலை வைத்தபடி படுத்துக் கொண்டு பார்த்துக் கொண்டிருந்தேன் தூக்கம் நெருக்கவே... பிறகு எல்லோரும் தூங்கச் சென்றோம். எஸ்கே இரவு 3 மணிவரை நா.முத்துக் குமாரின் புத்தகத்தை படித்துக் கொண்டிருந்ததாக மறுநாள் சொன்னார்.

மறுநாள் 8 மணி வாக்கில் அவர் எழும் முன்பே மனைவி வேலைக்கும், மகள் பள்ளிக் கூடத்துக்கும் சென்று விட்டனர். காலை 9.00 மணி வாக்கில் எழுந்தேன். அவரை எழுப்புவதற்கு சென்ற போது அவர் ஏற்கனவே எழுந்து குளியல் அறைக்கு சென்றிருந்தார். குளித்துவிட்டு வந்தார், நானும் குளித்துவிட்டு, அவருக்கு காலை சாப்பாடாக காரச்சட்டினியுடன் ஆனியன் ஊத்தப்பம் செய்தேன். சாமி கும்பிட்டுவிட்டு வந்தார். ஊத்தப்ப அளவைப் பார்த்ததும் ஒன்றே போதும் என்றார். காலை சாப்பாட்டை முடித்ததும் கனனி முன்பு உட்கார்ந்தோம். அப்பொழுது தான் நினைவு வந்தது. அதாவது சிவபாலன் பதிவு வழியாக நான் எஸ்கேவின் சிங்கை வருகையை வெளியிட்டு இருந்தேன். அதில் விடாது கருப்பு தனக்கும் எஸ்கேவை சந்திக்க விருப்பம் இருப்பதாக சொல்லி இருந்தார். ஒருவேளை அவர் முதல்நாள் எங்கள் தொலைபேசி தண்ணீரில் விழுந்ததால் தொலை தொடர்பு துண்டிக்கப்பட்ட அந்த இடைப்பட்ட அந்த நேரத்தில் எங்களை சந்திக்க முயன்று அவரால் (கருப்பு) தொடர்பு கொள்ளாமல் போய் இருக்குமோ என்று நினைத்தோம். மின் அஞ்சலை திறந்ததும் கருப்பு எனது மின் அஞ்சல் முகவரிக்கு 'எஸ்கே வந்தாரா' என்று கேட்டு மின் அஞ்சல் அனுப்பி இருந்தார். ஆனால் அவரை தொடர்பு கொண்டு கேட்பதற்கு அவரது தொலைபேசி தொடர்பு எண்கள் எங்களிடம் இல்லை. எனவே அவரது மின் அஞ்சல் அனுப்பி திரும்பவவும் இன்று தொடர்பு கொள்ளுங்கள், நாங்கள் லிட்டில் இந்தியாவில் இருப்போம் சாயங்காலம் சந்திக்க முடிந்தால் நேரில் வாருங்கள் என்று மின் அஞ்சல் அனுப்பிவிட்டு, அன்றைக்கு சிங்கப்பூரில் சில இடங்களை பார்கலாம் என்று இருவரும் வீட்டை விட்டு கிளம்பினோம். அப்போது எனது அலுவலகத்திலிருந்து சிஸ்டம் நெட்வொர்க் பிரச்சனைப் பண்ணுவதாக தொலைபேசினார்கள். எனவே அவரையும் அழைத்துக் கொண்டு எனது அலுவலகம் சென்றேன். வேலை 5 நிமிடத்தில் முடிந்தது. எனது அலுவலக அறையை காட்டிவிட்டு அங்கிருந்து சிங்கப்பூர் பொது பேருந்தில் ஏறி தோபாயோ என்ற எம்ஆர்டி நிலையத்தை வந்தடைந்தோம்.

மணி மதியம் 12.30 ஆகி இருந்தது அங்கிருந்து எம்ஆர்டி ரயில் வழியாக கடைசி நிலையமான மரீனா பே க்கு வந்து சேர்ந்தோம். அங்கிருந்து பார்த்தால் சிங்கபூரின் உயர கட்டிடங்களின் அணிவகுப்பு அழகாக தெரியும், புகைப்படம் எடுக்க ஏற்ற இடம். மூன்று புகைப்படங்களை சுட்டுவிட்டு அங்கிருந்து ராபிள்ஸ் ப்ளேஸ் என்ற வியாபார மையங்கள் உள்ள இடத்திற்கு வந்தோம். அங்கும் புகைப்படங்கள் எடுத்தோம். மணி நண்பகல் 1.45 ஆகி இருந்தது. அங்கு சில இடங்களைப் பார்த்துக் கொண்டிருக்கும் போதே பசியெடுக்கவே அங்கிருந்த சரவணபவன் ஞாபகம் வர அங்கு சொல்லலாம் சரவணபவன் நோக்கி நடக்க ஆரம்பித்தோம். அப்போது மிகவும் தளர்ந்து காணப்பட்டார், உற்சாகம் குன்றி இருந்தது. நலம் குறித்து கேட்டேன். அதெல்லாம் ஒன்றுமில்லை என்று சொல்லிக்கொண்டு வந்தார். சரவணபவனை அடைந்தோம். அவர் தயிர்சாதம் மட்டும் போதும் என்றார் பிறகு ரசவடையும் சேர்த்து வாங்கினோம். எனக்கு விரைவு உணவு (குயுக் லஞ்ச்) வாங்கிக் கொண்டேன். ரசவடையும், குயுக் லஞ்சில் இருந்த கேசரியையும் பகிர்ந்து உண்டோம். பின்பு வெளியில் வந்தோம். எதிரில் இருந்தது ஜெட் ஏர்வேஸ் அலுவலகம், அங்கு சொன்று மறுநாள் சென்னை திரும்புவதற்கான பயணச்சீட்டை மறு உறுதிப்படுத்திவிட்டு வெளியில் வந்தோம். எஸ்கே ஐயா மிகுந்த சோர்வாக காணப்பட்டார். மணி மாலை 2.30க்கு மேல் ஆகி இருந்தது இதற்கு மேல் எங்கும் அழைய முடியாது எனவே லிட்டில் இந்தியா சென்று பாபா படத்தை வாங்கிக் கொண்டு வீட்டிற்கு சென்று ஓய்வு எடுக்கலாம் என்று முடிவு செய்து வாடகைக் கார் பிடித்து லிட்டில் இந்தியா வந்து பாபா படத்தை வாங்கிக் கொண்டு வெளியில் வந்தோம்.

எனது கைத் தொலைபேசி ஒலித்தது. எடுத்து பார்த்தேன் "unknown" நம்பர் caller id யில் தெரிந்தது. பேசும் பட்டனை அழுத்தி 'ஹலோ' என்றேன் மறுமுனையில் 'ஹலோ கோவி.கண்ணன் ...? நான் சதீஷ் பேசுகிறேன், எஸ்கே பக்கத்தில் உங்களுடன் இருக்காரா ?' - தொலைபேசியில் விடாது கருப்பு ....

உரையாடல் அடுத்த பகுதியில் தொடரும் ....

நேரில் வந்து சந்தித்த பதிவர் (பகுதி 3)

2006-12-01T19:01:00.000-08:00

முந்தைய பகுதிகள்...
நேரில் வந்து சந்தித்த பதிவர் (பகுதி 1)
நேரில் வந்து சந்தித்த பதிவர் (பகுதி 2)

செந்தோசா தீவில் உள்ளே நுழையும் போது பிற்பகல் 2.45 ஆகியது. சுற்றுலா வழிகாட்டி மாலை 3.15க்கு அழைத்துச் செல்வதாக வரேவேற்பு அறையில் தெரிவித்தார்கள். 45 நிமிடம் பொதுவாக பேசிக் கொண்டிருந்தோம். அங்கு அருகில் இந்தியர் ஒருவர் மலைப்பாம்பு வைத்துக் கொண்டு அதனுடன் புகைப்படம் எடுக்க 5 வெள்ளிகள் பலகை எழுதி வைத்திருந்தார். அங்கு புகைப்டம் எடுக்க அதிகம் யாரும் வரவில்லை. அந்த பாம்புகாரரிடம் சென்று எஸ்கே பாம்பை வெளியில் காட்ட 50 காசுகள் என்று சொன்னால் உங்களுக்கு அதிக சில்லரை தேறும் என்று யோசனை தெரிவித்தார். குறிப்பிட்ட நேரம் வரவே சுற்றுலா பேருந்து வரவே ஏறி உட்கார்ந்தோம கூடவே ஒரு 30 பேர் பயணித்தனர். அதில் வந்த வழிகாட்டி நல்ல நகைச்சுவையாக பேசினார். பேருந்து மூலம் நாங்கள் முதலில் செல்ல வேண்டிய இடம். ஆழ் நீர் உலகம் (அண்டர் வாட்டர் வேர்ல்ட்). வழிகாட்டி மீன்களை கையால் தொட்டு பார்க்க ஒரு முகப்பில் ஒரு தொட்டி இருக்கிறது அதில் பலவித மீன்கள் இருக்கும் தொட்டுபார்பவர்கள் தொட்டுப்பார்கலாம் என்றார்.

அண்டர் வாட்டர் வேர்ல்ட் உள்ளே நுழைந்ததும் ஆவல் அதிகரித்து நான் நீர் தொட்டியில் கையை நுழைக்க, கலுத்தில் தொங்கிக் கொண்டிருந்த எனது செல் போனுக்கும் அந்த ஆசைவர நீரில் உள்ளே இறங்கி சட்டென்று சத்தமில்லாமல் உயிர்விட்டது. தொலைபேசி வழி தொடர்புகளின் எண்கள் எல்லாம் திடீரென்று காணமல் போய்விட்டது. வடுவூர் குமாருடன் எப்படி மாலை எப்படி தொடர்பு கொள்ள முடியும் என்று யோசிக்க ஆரம்பித்து செல்போனை எவ்வளவோ தரிகனத்தோம் போட்டும் அது ஒரு ரிங் டோனைக் கூட காட்டவில்லை. ஹூம் என்று பெருமூச்சி விட்டபடி மீன் அருங்காட்சியகத்தில் பலவித மீன்களின் அழகை ரசித்தோம், புகைப்படம் எடுத்தோம். அனைவரும் பார்க்கவேண்டிய காட்சிகள் அவை. கடலுக்குள் இருக்கும் அத்தனை மீன் வகைகளும் கண்ணாடியில் நம் தலைக்கு மேல் நீந்திச் சென்றது.

மீன் அருங்காட்சியகத்தை பார்த்து விட்டு பக்கத்தில் கடற்கரைக்கு சென்று அருகில் வாலிபால் விளையாடும் பீச் பாய்ஸ் / கேர்ள்சை பார்த்துவிட்டு வரவும் அடுத்த இடத்துக்கு செல்ல பேருந்து தயாராக இருக்கவும் சரியாக இருந்தது. அடுத்து நாங்கள் சென்ற இடம் டால்பின் லகூன் எனப்படும் டால்பின்கள் செய்யும் சாகச காட்சிகளுக்கான இடம். உள்ளே சென்று 15 நிமிட காத்திருத்தலுக்கு பிறகு அழகான பிங் டால்பின்கள் துள்ளிக் குத்தித்து காட்சி கொடுத்து பல்வேறு சாகசங்களை செய்து காட்டி அசத்தியது. அதுவும் ஒரு 30 நிமிட நிகழ்ச்சிதான். அது முடிந்ததும் அதே பேருந்தில் சினிமேனியா என்ற வெர்சுவல் ரியாலிட்டி காட்சி அரங்குக்குக்கு கூட்டி செல்லப்பட்டோம். திரையில் காட்சிகளுக்குள் நாம் பயணம் செய்வது போன்ற நல்ல அனுபவம் கிடைத்தது. மாலை 6.30 ஆகிவிட்டது.

இன்னும் பார்க்க இடங்கள் இருந்தாலும் மாலை சந்திப்பதாக தெரிவித்த வடுவூர் குமாரை எப்படியாவது சந்திக்க வேண்டும் என்பதால் தீவை விட்டு வெளியில் செல்ல முடிவெடுத்து பேருந்தில் ஏறி தீவின் இழுவை கார் முகப்புக்கு மறுபடியும் வந்துவிட்டோம். மங்கிய மாலை அதில் விளக்குகள் ஒளிர ஆகாயத்தில் அழகான ஊஞ்சல் ஆடுவது போல் இழுவை கார் (கேபிள் கார்) பயணம முடிந்து தீவைவிட்டு வெளியில் வந்தோம். அங்கிருந்து மறுபடியும் லிட்டில் இந்தியா வந்து சேர மாலை 7.15 ஆகி இருந்தது. அங்கே இருந்த சிங் கடை ( சிங் கடை அதைப்பற்றி பிறகு எப்போதாவது சொல்கிறேன்) புது கை தொலைபேசி வாங்கி சிம் கார்டை இணைத்தேன். கை தொலைபேசியை உயிர் ஊட்டியதும் எதிர்பார்த்த படி இடையில் அனுப்பிய வடுவூர் குமாரின் குறுந்தகவல் முதலில் வந்தது. உடனடியாக அவரை தொடர்பு கொண்டு தெரிவிக்க அருகில் தான் இருப்பதாகவும் சந்திக்க காத்திருப்பதாகவும் சொன்னார்.

அவரை சந்திக்கச் செல்லும் வழியில் மாரியம்மன் கோவில் வர உள்ளே நுழைந்து சம்பிரதாய சாமி கும்பிட்டுவிட்டு உடனே குமார் வரச் சொன்ன இடத்துக்குச் சென்றோம். அவர் அங்கு இல்லை. கை தொலைபேசியில் திரும்பவும் தொடர்பு கொண்டேன் சாலைக்கு எதிர்பக்கம் இருப்பதாக சொன்னார்.

பதிவின் நீளம் காரணமாக அடுத்த பதிவில் வடுவூர் குமார் சந்திப்பு, அடுத்த நாள் விடாது கருப்பை எப்படி தொடர்பு கொண்டு அவருடன் பேசினோம் ? ஏன் தொடர்பு கொண்டோம், நானும் எஸ்கேவும் விடாதுகருப்பு விடம் என்ன பேசினோம் ? என்பதை சொல்கிறேன்.

நேரில் வந்து சந்தித்த பதிவர் (பகுதி 2) !

2006-11-28T17:55:00.000-08:00

நேரில் வந்து சந்தித்த பதிவர் (பகுதி 1)

மணி மாலை 7.30க்கு மேல் ஆகி இருந்தது. தூரத்திலிருந்தே கைகளை அசைத்தவர் நொடிப்பொழுதில் பாதுகாப்பு இடம் கடந்து அருகில் வந்துவிட்டார். நெருக்கமான உறவினர் நம்மைப் பார்க்க வந்தால் எப்படி இருக்குமோ அப்படி இருந்தது உணர்வுகள். "ஐயா ! வாங்க வாங்க " என்பதை தவிர வேறு எதுவும் பேசும் முன்னும் அருகில் வந்து இரண்டுகைகளாலும் வளைத்து கட்டி அணைத்துக் கொண்டார். இருவருக்கும் இடையில் இருந்தது நட்பா, உறவா எதுவும் தெரியவில்லை. உணர்வுபூர்வமான ஈர்ப்பு, ஒருவரை ஒருவர் நேரிடையாக பார்பதில் மற்றற்ற மகிழ்ச்சியின் வெளிப்பாடுகள் ஆகியவை அணைத்து மகிழ்ந்ததில் உணர முடிந்தது. முன்பே தொலைபேசி வழி 'அப்பா' என்று இவரை என் மனைவி அழைத்து வந்திருந்தாலும், இவர் தோள் தொட, ஆதரவாக இவர் கை தொட்டதும் சென்ற ஆண்டில் திடீரென தன் தந்தையை இழந்திருந்த என் மனைவிக்கு அப்பாவையே உணர்வதுபோல், பார்பதுபோல் என் மனைவியிடம் நெகிழ்ச்சி இருந்தது. பயணவிவரம் கேட்டபடி எல்லோரும் வாடகைக் காரில் வீடுவந்து சேர்ந்தோம்.

எங்கள் வழக்கப்படி வீட்டுக்கு வரும் பெரியவர்களிடம் ஆசிவாங்குவதென்பது வழக்கம். அதன்படி உள்ளே வந்ததும் பூஜை அறைக்கு சென்று வணங்கி விட்டு வந்தவரிடம் தம்பதிகளாக காலில் விழுந்து ஆசி பெற்றோம். ஒரு சில நிமிடங்களில் எனது 6 வயது மகளுக்கு இவர் தாத்தாவாகிவிட இருவரும் வெகு நாட்கள் பழகியது போல் விளையாட ஆரம்பித்துவிட்டனர். ஏற்கனவே தொலைபேசி வழி தொடர்பு கொண்ட நண்பர் குழலி அவர்கள், மீண்டும் தொடர்பு கொண்டு உடனடியாக எஸ்கேவை சந்திக்க எங்கள் வீட்டுக்கு வருவதாக தொலைபேசி வழி தெரிவித்தார். அதன்படி அவருக்கு இறங்க வேண்டிய பஸ் நிறுத்தம் குறித்து சொல்லிவிட்டு, நேராக அழைத்துவர குறிப்பிட்ட இடத்திற்கு சென்றோம். நண்பர் குழலி ஆப்பிள் பழங்களுடன் வந்தார். வீட்டிற்கு அழைத்து வந்து பேசிக் கொண்டிருந்தோம். எஸ்கேவும், குழலியும் விஜயகாந்த் மற்றும் பாமக அரசியல் பற்றி பேசினார்கள். அரசியலில் தன் நிலைப்பாடு என்ன என்பதை குழலி பேசினார். பின்பு தன் குடும்பம், ஊர் இவற்றைப் பற்றி பேசினார். ஒரு இரண்டு மணி நேரத்துக்கு மேலாக மூவரும் பேசிக் கொண்டிருந்தோம். அதன் பிறகு இரவு உணவை சாப்பிட ஆரம்பித்தோம். சோயா பைட்டில் செய்யப்பட்ட குருமா இருந்தது. எஸ்கே சோயா பைட்டை அழுத்தி அழுத்திப் பார்த்தார். ஒருவேளை எலும்பு எதாவது சிக்குமா என்று பார்த்திருப்பார் போலும். நாங்கள் சைவ உணவு சாப்பிடுபவர்கள் என்பது அவருக்கு தெரியும், இருந்தும் ஒரு எச்சரிக்கையாக சோயா பைட்டை அழுத்திப் பார்த்து திருப்தி பட்டுக் கொண்டார். அது குறித்து நான் கிண்டல் அடிக்க உணவு வேலை களைகட்டியது. இரவு உணவை முடித்துபின்பு விடைபெற்ற குழலி மறுநாள் தொலைபேசுவதாக சொல்லிவிட்டு சென்றார். அதன் பிறகு எஸ்கே தன்னுடைய மனைவிக்கு தொலைபேசியில் தான் சிங்கை வந்து சேர்ந்ததை தெரிவித்தார். இரவு 12 மணிக்கு மேலாக நாங்கள் இருவரும் பேசிக் கொண்டு இருந்துவிட்டு பின் இரவில் தூங்கச் சென்றோம்.

மறுநாள் காலை சிற்றுண்டியாக இட்டலியும், கிச்சடியும் முடித்துவிட்டு, வெளியில் சென்று சிங்கப்பூர் முக்கிய இடங்களைப் பார்க்கச் சென்றோம். காலை 11 மணிக்கு நான் முதலில் அழைத்துச் சென்றது லிட்டில் இண்டியா எனப்படும் நம்மவர்கள் இந்தியர் நிறைந்த இடம். அங்கு செல்லவதற்கே மணி 12க்கு மேல் ஆகிவிட்டது. அங்கு கோமள விலாஸ் என்னும் சைவ உணவகத்துக்குச் சென்று மதிய உணவை சாப்பிட்டுவிட்டு வெளியில் வந்தோம். அப்பொழுது பதிவர் வடூவூர் குமார் அழைத்து மாலை 7 மணிக்கு அதே இடத்தில் சந்திப்பதாக சொன்னார். அதன்பிறகு வெற்றிலை பாக்கு போட்டுக் கொண்டே 3D சாமி படங்கள் (ப்ரேம்) Tushiv என்ற கடைக்குச் சென்றோம். அங்கு நவீன தொழில் நுட்பத்தில் செய்யப்பட்ட பல்வேறு கடவுள் உருவங்கள் இருந்தன. அவருக்கு பரிசு பொருளாக வாங்கிக் கொடுக்கவேண்டும் என்று தான் அங்கு அழைத்துச் சென்றேன். அவருக்கு அங்கு எல்லா உருவங்கள் பிடித்திருந்தாலும் எங்கும் கிடைக்கதற்கரிய ஒன்றாக அவருக்கு தோன்றிய, அற்புதமாக செய்யப்பட்ட சத்தியசாய் 3D ப்ரேம் ஒன்றை அவரே தேர்வு செய்து, அவரே கிரிடிட் கார்டு கொடுத்து வாங்கினார். அதில் உள்ள மின்விளக்கு அமெரிக்க வோல்டேஜ் அளவானா 110க்கு மாற்றவேண்டும் அதனால் மாலையிலோ அல்லது மறுநாளோ திருவுருவ ப்ரேமை தருவதாக கடைக்காரர் சொல்ல ரசீதைப் பெற்றுக் கொண்டு மறுநாள் வருவதாக சொல்லிவிட்டு வந்தோம்.

அதன்பிறகு விரைவு இரயில் எனப்படும் MRT யில் ஏறி லிட்டில் இண்டியாவில் இருந்து ஹார்பர் ப்ரெண்ட் எனப்படும் செந்தோசா தீவு முனையத்திற்கு வந்தோம். வெளியில் வந்து புதிதாக திறக்கப்பட்ட VIVO CITY என்ற பெரிய கடைவளாகத்தைப் பார்த்துவிட்டு அதற்கு முகப்பில் இருக்கும் நீர் அலங்காரத்திற்கு முன் புகைப்படம் எடுத்துவிட்டு நேராக செந்தோச தீவிற்கு செல்லும் கேபிள் கார் கட்டிடத்திற்கு வந்தோம். அங்கு விரைவு சுற்றுலா டிக்கெட் இரண்டு வாங்கிக் கொண்டு கேபிள் காரில் ஏறி உட்கார்ந்தோம். அது மிக நல்ல அனுபவம். அன்புடையவர்களுடன் உயரத்தில் அமர்ந்து பயணம் செய்வது என்பது மறக்க முடியாத நிகழ்ச்சி என்று சொல்லலாம். பலமுறை அதுபோன்ற அனுபவம் கிட்டியிருக்கிறது. 6 மாதத்துக்கு முன்பு வரை ஒருவரை ஒருவர் அறிந்ததில்லை, அதன்பிறகு குறுகிய காலத்தில் இவ்வளவு நெருக்கமாக ஒருவருடன் இனிய பயணம் என்பது ஒரு புதிய அனுபவமாக அமைந்தது.

செந்தோசா தீவை சுற்றிப் பார்த்துக் கொண்டே மீண்டும் தொடரும் ... !

இன்று நவ 29, எஸ்கே ஐயாவுக்கு பிறந்த நாள் அதையும் இங்கு நினைவு அவரை கூர்ந்து வாழ்த்துகிறேன்.

நேரில் வந்து சந்தித்த பதிவர் !

2006-11-25T19:20:00.000-08:00

பலநூறு (?) பதிவுகள் இதுவரையில் எழுதியிருந்தாலும்[:)))], பதிவர் யாரையும் நேரில் பார்த்து பழகிய அனுபவம் இருந்ததில்லை. தொலைபேசியில் சில பதிவர்களுடன் பேசி இருக்கிறேன்,சிலருக்கு மின் அஞ்சல் அனுப்பி இருக்கிறேன்.

நானும் திரு எஸ்கே ஐயாவும் ஏப்ரல் 2006ல் தான் வலைப்பதிவுகள் ஆரம்பித்திருந்தோம். அதற்கு முன்பு அறிமுகம் கிடையாது. பதிவர் பச்சோந்தி என்கிற புனைபெயரில் எழுதும் ராம்பிரசாத் அவர்களின் நாய் கவிதைக்கு பதிலாக எஸ்கே ஒரு கவிதை எழுதி தனிப்பதிவாக இட்டார். இருவரின் கவிதையும் என்னைக் கவரவே நானும் ஒரு நாய் கவிதையை எழுதி எஸ்கே அவர்களின் ஆத்திகம் பதிவில் பின்னூட்டமாக இட்டேன். எஸ்கே பதிவுக்கு வந்தது ஆன்மிகம் பற்றி நிறைய எழுதுவதற்க்கத்தான் ஆனால் அவர் அவ்வப்போது நிகழ்வுகளுக்கு ஏற்றவாறு கவிதையும் எழுதிப்போடுவார்.

அவரது ஆன்மிக நம்பிக்கை குறித்து எனக்கு வேறுபட்ட கருத்துக்கள் (கருத்து வேறுபாடு அல்ல) இருந்தாலும் பின்னூட்டத்தில் பொறுமையாக பதில் சொல்லுவார். அவரது எழுத்து நடையும், தமிழ் மொழித் திறனும் வியக்கவைத்தது. அவரது எழுத்தை வைத்து வயது இருபத்து ஐந்துக்குள் இருக்கும் என்றே நினைத்திருந்தேன். அதன் பிறகு அவர் தனது முருகன் அருள் முன்னிற்கும் என்ற பதிவில் தன் வேலையைப் பற்றியும், குடும்பத்தினரைப் பற்றியும் கோடிட்டு இருந்ததை வைத்துதான் வயதில் மூத்தவர் (ஐயா) என்று அறிந்து கொண்டேன். இருந்தாலும் முருகன் அருள் முன்நிற்கும் பதிவில் அவர் சொல்லிய நம்பிக்கை சார்ந்த செய்திகள் குறித்து உடன்படவில்லை. அதுவரை பொதுவான இந்துமத செய்திகளையும், மற்ற கவிதைகளையும் மட்டுமே எழுதிவந்தார்.

என்னதான் மூடநம்பிக்கைகளை சாடுபவராக நாம் இருந்தாலும், நம்மை சமய இலக்கியங்கள், அதுவும் தமிழில் இருந்தால் அவை வெகுவாகவே நம்மை கவர்கின்றனர். அந்த வகையில் திரு எஸ்கே அவர்கள் எழுதிய அருணகிரி நாதர் அருளிய திருப்புகழ் விளக்கம் நன்றாக இருந்தது. அதில் அவர் சிரத்தை எடுத்து தெளிவாக எல்லா பழஞ்சொற்களுக்கும் கவிதை நடையில் பொருள் விளக்கியது மிகவும் அருமையாகவும், பொருள் மிகாமலும் இருந்தது. அவரை ஊக்கப்படுத்துவதற்காக தொடர்ந்து பின்னூட்டி பாராட்டி வந்தேன். அதன் பிறகு சக பதிவர் என்பதை தாண்டி நட்பு எங்களுக்குள் வந்தது. தொலைபேசி எண்கள் அறிமுகம் ஆகியது, குரல் அறிமுகம் ஆகியது. பின்பு முகங்களை புகைப்படங்கள் அறிமுகம் செய்து வைத்தது. குடும்ப உறவுகள் அறிமுகமானது. இருவருக்கும் ஆழமான நட்பு ஏற்பட்டது. இருந்தாலும் தத்தம் பதிவில் எழுதும் எல்லாவித கருத்துக்களுக்கும் இருவருக்கும் மாறுபட்ட கருத்துகள் இருந்தது. அதில் விட்டுக் கொடுப்பதும் இல்லை. கருத்தை மறுத்தல், ஏற்றுக் கொள்தல் என்பதை விடுத்து கருத்தை மதித்தல் என்ற புரிந்துணர்வு இருவருக்கும் இருந்தது.

இதற்கிடையில் வரும் ஜனவரியில் இந்தியா செல்வதாகவும், அப்படியே சிங்கை வந்து சந்திப்பதாகவும் சொல்லியிருந்தார். இடையில் எதிர்பாராத விதமாக அவருடைய அருமை அண்ணனின் திடிர் மறைவை ஒட்டி சென்னை சொல்ல வேண்டிய சூழ்நிலையில் இருந்தார். கூடவே சென்னையிலிருந்து தனிப்பட்ட பயணமாக என்னை சந்திக்க சிங்கை வந்து செல்வதாக சொன்னார். இதுவரை தொலைபேசி மூலமும், சாட் மூலமும் உரையாடி எங்களின் நட்பு நேரடி சந்திப்பு அமைய இருந்ததில் மற்றற்ற மகிழ்ச்சியாக இருந்தது. அவர் குறிப்பிட்ட தேதியில் ஜெட் ஏர்வேஸ் மூலம் சென்னையில் இருந்து டிக்கெட் (11 நவ 2006) முன் பதிவு செய்திருந்தாலும் அவருக்கு திடிரென்று சென்னையிலிருந்து மும்பை செல்ல வேண்டியிருந்த்தால் அன்று வர முடியவில்லை என தெரிவித்துவிட்டு மறுநாள் வருவதாக குறிப்பிட்டார். சொன்னபடியே மறுநாள் வந்தார். ஏற்கனவே இருவரும் சந்தித்து இருக்கவில்லை இதுவரை அவர் அனுப்பிய புகைப்படங்கள் பெரியதாக இல்லாததால் அடையாளம் காணுவதற்கு சிரமமாகவே இருந்தது. அரைமணி நேரகாத்திருத்தலுக்கு பிறகு துள்ளி உற்சாகமாக வந்த ஒருவரை தூரத்திலிருந்தே அடையாளம் கண்டு கையை அசைக்கவே அவரும் பதிலுக்கு அசைக்க அவர்தான் எஸ்கே என்று தெரிந்து கொண்டோம்.

மற்றவை நேரம் கிடைக்கும் போது தொடரும் ...

ஆப்பம் சுடுவது எப்படி ?

2006-11-22T06:50:00.000-08:00

ஆப்பத்துக்கு தேவையான பொருள்கள் :

1 படி பச்சை அரிசி
வெந்தயம் 1 தேக்கரண்டி,
உளுந்து 1/4 படி
பலகார சோட உப்பு தேவையான அளவு
அதிகமாக போட்டால் பெரிதாக உப்பும், வாய் வெந்துவிடும்

செய்முறை :

12 மணி நேரம், அரிசி உளுந்து, வெந்தயம் போட்டு நன்றாக ஊரவைத்த பின் தோசை / இட்டிலிக்கு அரைப்பது போல் அரைத்து எடுக்கவும். தேசை மாவை விட கொஞ்சம் குழைவாக இருக்கலாம். அப்பொழுது தான், ஆப்ப சட்டியில் சுற்றி எடுக்க வசதியாக இருக்கும் !

ஆப்ப சட்டி இல்லாதவர்கள் வாணலியை பயன் படுத்தலாம். நன்றாக சட்டி சூடானதும், ஆப்பமாவை ஒரு இட்டிலி அளவுக்கு மாவை எடுத்து வார்த்து, சட்டி சுழற்றி ஆப்ப வடிவத்தை ஏற்படுத்தவும், ஆப்ப மையத்தில் சிரிதளவு சர்கரையோ, வெல்லமோ வைத்தால் சுவை கூடுதலாக இருக்கும்.

தொட்டுக் கொள்வதற்கு : தேங்காய் பால் அல்லது சைவ / அசைவ பாயா நல்லது !

கோடி நன்மைகள் இலவசம் (கவிதை) ! தே.கூ.போட்டி

2006-11-19T08:33:00.000-08:00

இலவசம், இலவசம்,

பிறப்பில் வாழ்க்கை இலவசம், நாம்
வாழும் காலமும் இலவசம் !

மென்மை இதயம் இலவசம், அதில்
அன்பு ஊற்றும் இலவசம் !

கையில் விரல்கள் இலவசம்,
கை கோர்க்க நல்மனமும் இலவசம் !

கால்கள் இரண்டும் இலவசம், அதன்
நல்வழிப் பாதைகளென்றும் இலவசம் !

கண்கள் இரண்டும் இலவசம், அது
காணும் வண்ணங்கள் யாவும் இலவசம் !

கண்களில் கண்ணீர் இலவசம், கரைப்பவர்
நெஞ்சம் அடையும் அமைதி இலவசம் !

வாயில் பற்கள் இலவசம், அதில்
தவழும் புண்ணகை இலவசம் !

நாக்கில் நன் சொல் இலவசம், அதை
நயமுடன் சொல்ல நாடிவருபவர் இலவம் !

மனதில் உறுதி இலவசம், அதை
திடமுடன் நடத்த வெற்றி இலவசம் !

மூளையில் நியூரான்கள் இலவசம், அதை
தூண்டுவோர்க்கு ஏற்படும் (பகுத்)அறிவு இலவசம் !

காதுகள் இரண்டும் இலவசம், அது
கேட்கும் கானக்குயிலின் பாடல் இலவசம் !

இரவில் தூக்கம் இலவசம், அந்த
தூக்கத்தில் காணும் கனவுகள் இலவசம் !

எண்ணத்தில் இனிமை இலவசம், அதுபுகும்
உள்ளத்தில் மகிழ்ச்சி இலவசம் !

ஒளிதரும் சூரியன் இலவசம், அதன்
சுகம்தரும் மித வெட்பம் இலவசம் !

மேக ஓடைகள் இலவசம், அதுதரும்
தாக நீர்த்துளி இலவசம் !

வான வீதிகள் இலவசம், அதில்
கண்மயக்கும் வின்மீன் தோரணம் இலவசம் !

மலையின் நீர்வீழ்ச்சி இலவசம், அது
நடந்தால் பொங்கும் ஆறுகள் இலவசம் !

இரவில் நிலவு இலவசம், அதன்
இரவல் குளிர் ஒளி இலவசம் !

கடல்கரை அலைகள் இலவசம், அது நம்
கால் தொட சிலிர்ப்புகள் இலவசம் !

உழைப்பில் வியர்வை இலவசம், இவை
சேர்ந்தால் உடல் நலம் இலவசம்

தாயின் கருவரை இலவசம், அதில் வளர்ந்திட
தாய் தரும் உதிரம் இலவசம் !

தலைகோதும் தாயன்பு இலவசம், அவள்
முலைதரும் தாய்ப் பாலும் இலவசம்

அப்பாவின் பாசம் இலவசம், அவர்
தப்பாமால் செய்யும் கடமைகள் இலவசம் !

பிறப்பில் இளமை இலவசம், இளமையில்
ஊற்றெடுக்கும் சுறுசுறுப்பு இலவசம் !

வாழ்வில் முதுமை இலவசம், முதமைதன்
போக்கில் வரும் மரணம் இலவசம் !

புலன்களில் உணர்வுகள் இலவசம், அதை
கட்டுக்குள் வைக்க இன்பங்களணைத்தும் இலவசம் !

நட்பில் நம்பிக்கை இலவசம், நாடிபோற்றினால்,
எவர் வசமும் நமக்கு இலவசம் !

காதலில் அன்பு இலவசம், அதில்
காணும் பரவசம் இருவருக்கும் இலவசம் !

கூடி வாழும் மனம் இலவசம், இருந்தால்
கோடி நன்மைகள் இலவசம் !

பின்குறிப்பு : ஆருயிர் நண்பர் எஸ்கே ஐயா அவர்களின் இலவச போட்டிக்கு சிறிய அளவில் பின்னூட்டமாக இட்ட கவிதை இலவசமாக வளர்ந்து, அதே தேன் கூடு போட்டிக்காக வளர்ந்திருக்கிறது !